الراجل الياباني الغريب ده حول أكبر نقطة ضعف عنده لمصدر رزقه، ونجح وتحول لشخصية دولية مشهورة! كوتاني ماكوتو ممثل كوميدي فاشل! شخصيته تعبانة وموهبته متواضعة ومعندوش أي مهارات. مدهول ومش منظم ومبيعرفش يدير حياة، بس طيب وخدوم وبيحب الناس. حاول يشارك واحد صاحبه في السكن ويقسموا التكلفة، بعد شوية من كتر تصرفاته الغريبة صاحبه قاله امشي يابني انت متنفعش تعيش في بيوت، انت مكانك تبقى مشرد في الشارع!
صاحبنا بدل ما يزعل عجبته الفكرة وقرر يجرب حياة المشردين
اليابان فيها مشاكل اجتماعية كتير بسبب نمط الحياة السريع والتركيز التام على العمل، فعدد ضخم من الناس وحيدين ومش لاحقين يتجوزوا ومعندهمش أصحاب. فظهرت خدمة غريبة: أجر ونيس! تدفع فلوس وتأجر حد يونسك في وحدتك، يكلمك أو يخرج معاك أو يعمل لك مشاوير. أو حد كبير في السن يسمع مشاكلك وينصحك من خبرته.
صاحبنا سمع على الخدمة دي، فضاف نفسه في القايمة كشخص للإيجار لتسلية الناس بما إنه كوميدي ومدهول. وقرر إن إيجاره لازم يبقى رخيص جدا لإنه معندوش مواهب تستاهل ولإن هدفه الخبرة ومقابلة الناس مش المكسب. فحط أجرة 50 ين في اليوم! (اللي هي زي 5 جنيه عندنا مثلا) فالناس بدأت تأجره من باب الاستخسار بما إنه رخيص قوي كدة، وبعدين يصعب عليهم فيقولوا له اتغديت؟ يقول لهم لأ، فياخدوه معاهم المطعم الشيك اللي بياكلوا فيه يغدوه. عندك هدوم؟ لأ، فياخدوه يشتروا له من المحلات اللي بيشتروا منها. فيستأذن يتصور معاهم يقولوا له اتفضل. ففتح أكاونت إنستاجرام وبدأ يحط الصور ويحكي مغامراته بطريقته المدهولة الكوميدية... فاتشهر! وبدأوا زباينه يبقوا مشاهير. منهم مصمم أزياء بدأ يصمم له ملابسه المميزة العجيبة دي.
شوية، وبدأوا يطلبوه في بلاد تانية، فيقول لهم مفيش مانع، أجرتي زي ما هي، 50 ين في اليوم بس، لكن ادفعوا التذاكر والإقامة والأكل. فأصبح بيسافر ويلف العالم وياكل في أحسن أماكن ويسكن في أحسن أوتيلات ويصاحب المشاهير والأغنياء، من غير ما يدفع ولا مليم. وعمل موقع عليه جدوله علشان بقى مش ملاحق على الحجوزات في البلاد المختلفة. كل ده وهو لسه مشرد. بقت هي دي نقطة القوة عنده بعد ما كانت أكبر عيب! وبعد ما كان فاشل ومحدش عايزه، بقى عنده "أسرة" من عشرات الآلاف من الأشخاص اللي بيتابعوه على السوشيال ميديا وبيحبوه وبيصعب عليهم، وممكن يستضيفوه في أي مكان في العالم.
القصة الغريبة دي جايز مينفعش تحصل غير في اليابان بسبب ظروفها الخاصة. وأكيد مش المقصود أشجعكم تبقوا مشردين لكن فيه دروس مهمة أي حد فينا ممكن يتعلمها منها
- مش مستحيل إنك تستثمر نقطة ضعفك وتحولها لقيمة تنافسية competitive edge مش عند أي حد غيرك، وتعمل منها بيزنس!
- البداية كانت إنه قرر ياخد مخاطرة ويجرب نوع من الحياة عمره ما فكر فيه، بما إنها بايظة بايظة وهو مش خسران حاجة، ومفيش أوحش من اللي هو فيه
- جرب الاختيار الجديد وهو متقبل مش وهو متأفف
- فكر بإيجابية ازاي يعيش في الوضع الجديد بشكل يسعده ويفتح له أبواب جديدة ويتعلم منه خبرات جديدة رغم إنه وضع سلبي والمفروض يخليه محبط وتعيس، بس هو استغله علشان يبقى مبسوط وسعيد!
فنجح!
فكروا بالطريقة المختلفة دي هتكتشفوا احتمالات وأفكار جايز عمرها ما خطرت لكم قبل كدة.
لينك القصة بالصور وحسابه على إنستاجرام
من هناكتبه /
سحر النادي
