AD1
الرئيسية / المقالات /
107243 مشاهدة28 سبتمبر 2017

لتحميل أكثر من 400 شكل للسيرة الذاتية | Download CV templates - STJEGYPT

لتحميل أكثر من 400 شكل للسيرة الذاتية | Download CV templates - STJEGYPT

النهاردة هنتكلم عن ازاي تعمل cv أو resume
ناس كتير فاكرة ان الـ CV هو هو الـ Resume مع إن فيه فرق و اختلاف شاسع ما بينهم
اولا السي في دة حاجة عامة عنك فيها كل اللي الانجازات اللي انت عملتها في حياتك و كل مهاراتك و بتقدمه في المنح سواء الداخلية او الخارجية او التدريبات أو في اي حاجة عامة لما يطلبوا منك سي في مش في حالة انك مقدم في وظيفة معينة
أما الـ Resume فهي فيها كل حاجة عنك تتعلق بوظيفة معينة انت مقدم فيها فقط و بالتالي مفيهاش كل مهاراتك ولا كل منحك ولا كورساتك ولا كل انجازاتك
كمان الـ CV لازم يكون فيه مصدر للمراجع بتاعتك أما الـ Resume غالبا مبيكونش فيه
الـ Resume لازم تكتب فيها المجال اللي انت متخصص فيه و لازم تكتب فيها Summary يفيد الـ HR اللي هيشوف الResume بتاعتك انت بتفيد الشركة بإيه و ايه اللي انت بتعمله و اللي انت عايز تكتسبه من الشركة
أما الـ CV زي ما قولنا فبيكون حاجة عامة بتكتب فيه كل خبراتك مش مجال معين انت متخصص فيه
الـ CV لازم يكون على الأقل صفحتين و يكون فيه كل الكورسات اللي انت خدتها و الأعمال التطوعية اللي اشتغلت فيها و الخبرات اللي اكتسبتها في أي شغل و كمان بتحط فيه هواياتك
الـ Resume اوعا تحط فيه هواياتك مهما كانت و يكون صفحة و بالكتير صفحتين و مبتحطش فيه غير الكورسات و المهارات و الخبرات اللي بتتعلق بالوظيفة
طب طريقة كتابة الـ CV عموما ازاي ؟

إبدا بهذا الرابط

من هنا

أولا بتكتب بياناتك الشخصية اللي ليها علاقة بالكونتاكت بتاعك
أولا اسمك بيكون بخط كبير و بوند
ثانيا عنوانك و بلاش تكتبه تفصيلي اكتب بس المنطقة و المدينة و المحافظة و متكتبش الدولة الا لو بتقدم على وظيفة برة او منحة خارجية لأن الغرض من العنوان ان الاتش ار يعرف بس انت مكانك فين هتكون قريب للشركة ولا لأ لكن مش عايز يعرف عنوان بيتك فين تحديدا
ثالثا رقم تليفونك و ممكن تعمل سلاش و تكتب رقم تاني لو معاك رقمين بس بيكونوا متاحين على طول
رابعا إيميلك و دة لازم ولا بد يكون حاجة بروفيشنال يعني يكون فيه اسمك و اسم العائلة فقط مفيهوش أي اسم دلع زي ايميل لينكد ان بالظبط
خامسا ياريت يكون عندك لينكد ان و تحطه تحت الميل بالظبط و ياريت تكون مظبطه و حاطت فيه كل بياناتك مظبوطة و تكون شخصية اجتماعية عليه و يكون اللينك بتاعه اللي هتحطه مبسط مش معقد
السي في مش قرآن عشان كدة بيختلف عليه كل اتش آر مش كله بيتفق على حاجة واحدة فهم اختلفوا في نقطة ...
الاتش ار في شركات كبار بيقولوا انك مينفعش تكتب تعليمك أول حاجة لأن الاتش ار و هو بيقرا السي في عايز يشوف حاجة تخليه يكمل السي في حاجة تخليه يحس انك مميز عن بقيت الناس اللي كاتبين انهم خريجين كذا بتقدير كذا لأن فيه الف غيرك كاتبين كدة
ناس تانية كبار بردو قالوا ان عادي انك تكتب تعليمك اول حاجة لأنك بتعرفه انت خريج ايه معاك شهادة ايه من ايه
و رأيي الشخصي يتفق مع الرأي التاني و انا شايف انك تكتب تعليمك الاول دة اذا مكتبتش summary في الاول
لو انت مقدم على وظيفة زي ما قلنا هتكون بتكتب Resume فبالتالي لازم تكتب الوظيفة اللي انت متخصص فيها اول حاجة بخط كبير و بوند بردو و تحتها سطرين فيهم ايه اللي انت بتقدمه للشركة في المجال دة
اما لو بتكتب cv عام مش لازم تكتب كل دة عادي بس يفضل تكتب summary تكتب فيها سطرين عن ايه اللي انت انجزته سريعا كدة و ايه اللي انت بتقدمه و ايه اللي انت عايز تكتسبه من الشركة او الهدف اللي انت عايز توصله
بعد كدة اكتب تعليمك لازم تكتب السنة اللي دخلت فيها الجامعة و اللي خرجت فيها منها
لو انت لسا طالب هتعمل – Now بعد التاريخ و تكتب الكلية و الجامعة و ممكن تكتب القسم قبل الجامعة او في سطر لوحدها عادي و تكتب تقدير آخر سنة و بعد كدة تكتب التقدير العام و دة في حالة ان التقديرين يكونوا اعلى من مقبول
لو فيه تقدير اقل من جيد اوعا تكتبه طبعا
لو معاك ماجستير أو دكتوراة لازم تكتبه طبعا
بعد كدة هتكتب خبراتك في سوق العمل الاول و يا ريت عنوانها يكون Work Experience مش Experience بس لأن الـ Experience دي خبراتك العامة سواء في التطوع او العمل اما Work Experience فدي خبراتك في سوق العمل بس ...
هتكتب الشغلانات اللي انت اشتغلتها اللي تتعلق بالوظيفة اللي انت مقدم فيها لو انت مشتغلتش حاجة متعلقة بيها ممكن تكتب اي شغل اشتغلته و هتكتبه كله من الاحدث للاقدم بتواريخ تبين فترة استمرارك في الشغل دة اد ايه و تحت الشغل دة اكتب المهام اللي كانت بتطلب منك في الشغل دة
بعد ما تكتب شغلك اكتب اعمالك التطوعية لأنها من اهم الحاجات اللي ممكن يشوفها الاتش ار في السي في بتاعك و ياريت تكتب اللي يتعلق بالوظيفة اللي انت مقدم فيها بس الا اذا مكانش فيه اعمال تتعلق بالوظيفة ممكن تكتب الاعمال التطوعية بتاعتك بس بردو من الاحدث للاقدم بتواريخ تبين فترة استمرارك في العمل التطوعي
لو هتكتب اسم نشاط او مؤسسة تطوعت فيها يا ريت توضح هي ايه المؤسسة دي و بتعمل ايه و تكتب مهامك داخل المؤسسة او النشاط دة
بعد كدة لو خدت منح يا ريت تكتبها في عنوان لوحدها و تقول كل منحة من الاحدث للاقدم بتواريخها و تكتب الجهة المانحة و البرامج اللي انت خدتها في المنحة دي
بعد كدة لو خدت كورسات في حاجات تيكنيكال في مجالك او الحاجة اللي تخص الوظيفة اللي انت مقدملها هي دي بس اللي تكتبها اي حاجة تانية مالهاش لازمة بينله ان انت شاطر فيها خلال الانتر فيو زي الانجليزي او انك بتعرف تعملها لما تيجي تكتب المهارات بتاعتك و دي لسا هنجيلها
طبعا لو انت بتكتب Resume مش هتكتب انك درست حاجة self-study انما لو بتكتب cv لازم تكتب الحاجات اللي انت عرفتها لوحدك و دي ليها تأثير كبير على الاتش ار و في المنح و التدريبات و غيرهم
بعد كدة تكتب مهاراتك و دي ببتنقسم لمهارتين
مهارات الكمبيوتر و دي هتكتب فيها انت بتعرف تشتغل على ايه في الكمبيوتر و مستواك في ايه
مهارات اللغة و دي هتكتب فيها اللغة الام بتاعتك الاول و تكتب انها اللغة الام بتاعتك و تكتب اللغات اللي انت عارفها تاني بداية من الانجليزي و بعد كدة اي لغة انت قوي فيها بعد الانجليزي على طول فالاضعف فالاضعف و هكذا
لو بتكتب Resume اكتب مستواك العام في الانجليزي
اما لو بتكتب cv فالانجليزي هنا بينقسم لاربع مهارات و هم القراءة و الكتابة و الكلام و السمع لازم تكتب مستواك في كل واحدة فيهم دة ايه
في حالة انك بتكتب cv هتكتب بعد كدة هواياتك و اهتماماتك بشرط انها تكون هوايات تيكنيكال يعني متكتبش انك بتحب تلعب كورة بس لو بتحب القراء او الكتابة او اي حاجة مفيدة اكتبها بشرط يكون ليك عليها مواقف يعني اعمل حسابك انك ممكن تتسئل فيهم في الانتر فيو زي مثلا انه يقولك ايه اخر كتاب قريته
بعد كدة هتكتب معلومات شخصية عنك هتكتب فيها تاريخ ميلادك و حالتك الاجتماعية و موقفك من الخدمة العسكرية بالنسبة للولاد و لو مقدم على حاجة برة مصر يا ريت تكتب الجنسية كمان
في حالة انك بتكتب cv بردو هتكتب بعد كدة المراجع اما انك تكتب انها موجودة عند الطلب او تكتب اسم شخصية تعرفك كويس و عارفة المهارات اللي عندك زي مديرك السابق في العمل او العمل التطوعي و هكذا و تكتب اسمه و رقمه

أخطاء شائعة و ملحوظات:
- في التواريخ لازم تكتب الشهور بأساميها مش بأرقامها بس بالاختصار بتاعها
- اوعا تكتب Career objective لأن دة بيبينله انت عايز ايه مش هو عايزك ليه و دة مش هيفيده في حاجة و بالتالي مش هيكمل قراءة السي في بتاعك
- يا ريت ميبقاش فيها أي غلطات تنسيقية ولا املائية في السي في خالص يكون الحرف الاول دايما كابيتال و اول حرف من كل اسم من اسمك كابيتال و تكون كاتبه بروفيشنال
- متحطش في السي في صورتك خالص الا في حالة انه يطلبها منك و لو طلبها لازم تكون صورة رسمية بروفيشنال جدا تكون لابس فيها على الاقل سيمي فورمال و يكون فيها وشك بس و متكونش سيلفي تكون صورة زي اللي بتتصورها 4 x 6
- متحطش frame للسي في بتاعك خالص
- يا ريت متكبرش الفونت عن 14 و ميقلش عن 10 في السطور العادية و تستخدم خط Times New Roman عشان شكله فورمال اكتر
- خلي اسامي المؤسسات و الانشطة و الشركات و الكورسات و المنح و المهارت Bond.
- التواريخ كلها زي ما ذكرت لازم تكون من الأحدث للأقدم
- لو تقديرك مقبول اوعا تكتبه ابدا و متحاولش تظهر عيوب ليك في السي في بتاعك خالص
- اوعا ابدا تكتب Soft skills متعلقة بيك في السي في خاااااالص دي حاجة هو هيكتشفها فيك في الانتر فيو و لو كتبتها 90 % مش هتكون صادق فيها و هو عارف و هيفصلهوملك واحدة واحدة يسألك على مواقف فيهم في الانتر فيو و مش هتعرف ترد و بالتالي هتترفض
خلاص الكلام الـ soft skills مبتتكتبش في السي في لأي سبب كان
- لما تيجي تبعت السي في لشركة ابعته بصيغة PDF
- لو خدت كورس انجلش أو ICDL
متكتبوش مالوش لازمة يكفي بس انك تعرفه انك بتعرف تعمل الحاجات دي من نفسك ف الانتر فيو و في السي في بس
هتلاقي اشكال كتير للـ CV أو الـ Resume على الموقع دة http://www.cvtips.com/
http://www.hloom.com/resumes/

ده كمان ملف لتحيمل نسخ للـ CV

من هنا

Download CV templates

تحميل CV


Share

Suggestions

AD1

Back to Top