بإختصار الشخص ده الإنتربرنور اللي قدملنا إي باي ..
بيير اتولد في باريس و عاش هناك اول 6 سنين في حياته و بعدها سافر لأمريكا ، و هو طفل صغير كان مبهور بالإلكترونيات و كان بيشتري آلات حاسبة و يفكها و يحاول يركبها و يصلحها تاني ، و طبعا في أغلب الاحيان مكنش بيقدر يصلحها تاني
و كمان و هو في سن صغير علم نفسه البرمجيات و كان حلمه انه يكون مهندس كمبيوتر و في أول سنة قعد يذاكر كيمياء و بذل مجهود كبير جدا .. و في الاخر جاب 25 من 100 !
و من هنا حول لـ "Computer science" و بدأ رحلة تميزه في البرمجيات ..
تعرفوا أول مرتب ليه كان كام ؟! .. كان 6 دولار في الساعه و وقتها كان بيشتغل مبرمج شاب في مكتبة و بعدها قدر يشتغل لشركة برمجيات كبيرة في كاليفورنيا ..
بيير مبيوصفش نفسه كإنتربرنور ، هو شايفه انه انسان عنده ثقة بنفسه و مبيخافش انه يجرب
فكرة eBay نفسها كانت تجربة !
و هو موظف قرر انه يبدأ الفكرة كهواية مش بيزنس ، و طبعا لازم الناس اللي بتحط التاتش بتاعه تطلع كده و قالوله ان فكرته هتفشل !
عارفينهم انتم الناس دي صح ..
لأنه مينفعش يثق في الناس انهم يبيعوا و يشتروا من بعض في العالم الافتراضي .. لكن كان مؤمن ان الانسان أصله خير
و دوره انه يديهم أرضية للتفاعل و يشجعهم علي الامانة و التعامل النزيه
و فعلاً نجح بيير !
في أول 6 شهور بدأت eBay تحقق أرباح و ايرادات ، و بعد 9 شهور حقق أرباح أعلي من مرتبه مع الشركة الكبيرة اللي هو شغال فيها
و جه الوقت انه يسيب و ظيفته و يتفرغ لحلمه علشان يقود eBay انها تكون واحدة من أكبر الشركات في العالم
و بيير أسس شركات تانية في الاعلام و صناعة الافلام
انا عاوز اوصلك و انصحك انك تجرب لأن مع أي فكرة جديدة هتسمعوا "مينفعش" و "هتفشل مش هتنجح" من ناس بتحترمهم !
لكن انت واثق في فكرتك و واثق في نفسك .. جرب
و كمان الشغف بالفكرة و العمل الجاد هو سر النجاح ..
اللي بيدور علي مكسب سريع صعب يكمل المشوار ، و كمان الفشل مهم زي النجاح .. و الفشل اللي ميقتلش طموحك و عزيمتك هيخليك أقوي
و بس يا سيدي خلصت و مش هطول عليك أكتر من كده
كتبه |
اسلام هاني
