الرئيسية / المقالات /
14657 مشاهدة24 ديسمبر 2017

10 أسباب ليه لازم تسافر فيتنام ؟ ! - STJEGYPT

10 أسباب ليه لازم تسافر فيتنام ؟ ! - STJEGYPT


تصدق أن فيتنام سنة 2017 زارها أكثر من 12 مليون سائح من مختلف أنحاء العالم , و لكن للأسف أغلب العرب ميعرفوش كتير عن فيتنام ( غير حربها مع أمريكا )  , بعد زياره استمرت أسبوعين في فيتنام زرت فيها أغلب المدن من الشمال للجنوب ( لم أرى خلال كل رحلتي سائح عربي واحد في كل البلد ) و لكني أكتشفت دولة أعتقد أنها حتكون من أهم الوجهات السياحية للمصريين قريبا و حقولكم الأسباب :
1) من أهم الأسباب بالنسبه للشباب أن فيتنام مش محتاجه فيزا عن طريق سفاره يعني تقدر تسافر بدون كشف حساب و لا اتش ار ليتر و لا محتاج تاخد مواعيد من سفاره و لا غيره , و كل اللي عليك أنك بتقدم على الفيزا أون لاين و بتوصلك بعدها بيومين و تقدر تسافر بيها مباشرة
2) فيتنام من الدول اللي مش محتاجه تصريح أمني , يعني حضرتك سواء كنت طالب أو عامل أو دكتور تقدر تسافر الى فيتنام بدون ما تزور المجمع العريق ( مجمع التحرير ) و لا تاخد أي موافقات أمنية
3) واحد من أهم الأسباب اللي حتخليك تفكر تسافر فيتنام أنها بلد رخيصه جدا سواء كمعيشة أو أنتقالات أو أكل, و معروف أنها بلد الرحاله الشباب اللي بيزوروها من كل دول العالم لرخص سعر المعيشة فيها يعني ممكن تسكن في هوستل من أول 2 دولار في اليوم و الوجبة ممكن تكلفك في حدود دولار أو أقل
4) البلد كلها متصله بشبكة مواصلات بريه متعدده , يعني لو عاوز تسافر من أي مدينة لأي مدينة حتلاقي أكتر من وسيلة للأنتقال حسب ميزانيتك سواء باص عادي أو باص نوم أو قطار من أول درجة ثالثه لحد قطار نوم أو طيران أو حتى موتوسيكل , يعني من الأخر تقدر تلف البلد كلها من شمالها الى جنوبها على موتوسيكل لو حبيت
5) من أكثر البلاد اللي زورتها في العالم اللي فيها تنوع في الطبيعة يعني مهما كانت أهتماماتك حتلاقي اللي يناسبك هناك من أول البحر و الشواطئ و الجزر مرورا بالسهول و الوديان و الغابات وصولا للجبال و الشلالات و الأنهار و الكهوف , يعني كل مدينة حتزورها خلال رحلتك حتكتشف فيها أوجه مختلفه لطبيعة فيتنام الرائعة
6) فيتنام دولة شباب و مغامرات يعني حتلاقي نفسك في يوم على شاطئ بحر في دانانج و اليوم اللي بعده بتتشمس على جزيرة فوكوك و بعدها بكام يوم بتعمل كروز في هالونج باي , أو بتتمشى داخل كهوف في مدينة فون ياه أو بتعمل هايكنج في سابا أو بتعمل دايفنج في نهاترانج أو بتنط في شلالات في مدينة دالات او بتعمل رافتنج في نهر كاي , يعني من الأخر استعد لمغامرات شبابية من العيار الثقيل
7) لو أنت محب للثقافه و التاريخ , ففيتنام من أقدم الثقافات في شرق أسيا تمتد ل 2000 سنة قبل الميلاد , حتلاقي أماكن أثرية و تاريخية رائعه, فهيا خليط من أثار لحضارات هندوسية و صينية و فيتناميه و كمان متؤثرة جدا بالاستعمار الفرنسي , و لو أنت مهتم بالحرب الأمريكية الفيتنامية حتقدر تدخل بنفسك في أنفاق كوتشي اللي استخدمها الفيتناميين في حربهم ضد أمريكا و حتتفرج على الأسلحة و الطيارات اللي تم استخدامها ضد فيتنام في متحف مخلفات الحرب في سايجون
8) من أهم كنوز فيتنام هيا ناسها و أهلها , حتحس بالأمان طول ما أنت ماشي, أي مكان حتزوره حيستقبلوك بحفاوة و إبتسامة كأنك صديقهم حتى لو مش بيتكلموا أنجليزي كويس حيحاولوا يساعدوك بأقصى إمكانياتهم , و للعلم مش بيكونوا منتظرين بقشيش أو إكرامية و لكن هما هدفهم أنك ترجع تزورهم تاني تشجيعا للسياحة
9) لمحبي الأكلات لأسيوية و السي فوود ففيتنام حتقدملكم تشكيلة متنوعة من الأكلات الأسيوية الغنية بالتوابل , و لو كنت بتحب القهوة , فاستعد لتذوق أحلى قهوة ممكن تشربها في العالم , أنسى بقى ستاربكس و بن العميد و الكلام ده , لأنك حتدوق قهوة فيتنامية بالحليب المكثف مميزة جدا
10) أخيرا أحب أقولك أنك بمجرد ما تحول 50 دولار أمريكي لعملة فيتنام فأنت كده أصبحت مليونير و حيكون معاك أكتر من مليون دونج فيتنامي  , ( الدولار = 23000 دونج ) , فلو أنت من عشاق التسوق فلا تفاجئ لما تلاقي البضائع في فيتنام بتتباع بربع التمن اللي موجود في بلادنا العربية


نقلا عن الرحالة / بهاء الدين فاروق

مؤسس أهم جروب للسفر Travel secrets


Share

Suggestions

Back to Top