..آثر تاريخي كان من عجائب الدنيا السبعة القديمة..آثر كان مبني عظيم وعملاق بالنسبة للحقبة القديمة من الزمن في عصر البطالمة..هنتكلم عن "فنار الإسكندرية" وحاليا مكانها مبني "قلعة قايتباي" الشهيرة بالإسكندرية..ياتري ايه قصة "فنار الاسكندرية"؟؟
اتبنت "فنار الإسكندرية" بين عامي 247-270 ق.م وبدأ العمل فيها في عصر "بطليموس الاول" ولما توفي ومسك "بطليموس التاني" الحكم كمل العمل في بناء الفنار..وكان المهندس الاغريقي المسؤول عن إنشاءها اسمه "سوستراتوس".
موقعها كان علي طرف شبه "جزيرة فاروس" ويقال إن كلمة "فنار" جت من كلمة "فاروس"..وكانت "فنار الإسكندرية" أول منارة تتبني في العالم القديم.
اتبنت الفنار في حوالي من 12-20 سنة..وكان إرتفاعها حوالي 450 قدم والإرتفاع دة بالنسبة للوقت دة مبني مهول الحجم..وكانت مكونة من تلات أقسام القسم الأول خاص
بالمكاتب الحكومية والاسطبلات، والقسم الاوسط كان جواه شرفة للسياح عشان يتمتعوا بالمنظر ويجلسوا فيها، أما القسم العلوي إسطواني الشكل وكان بيقيد فيه النيران دايما عشان تحافظ علي آمن البحارة، وفي أعلي المنارة كان فيه تمثال كبير لإله البحر في اليونان..وكان بداخل المنارة منحدر متصاعد عشان تسمح للخيول والعربات نقل الإمدادات للأقسام العليا.
قاعدتها علي شكل مربع وقمتها دائرية الشكل..استخدم في بنائها كتل حجر جيري مع رصاص منصهر عشان تصمد قصاد الأمواج..وللفنار سلم دائري بيوصل للاعلي..وكان فيه مراية منحنية ضخمة بتعكس ضوء النهار وبالليل كان فيه شعلة علي قمة المنارة..وفيه مصادر غير مؤكدة بتقول إن المراية اللي بتعكس ضوء النهار كانت بتستخدم برده في كشف وحرق سفن الأعداء.
كانت "الإسكندرية" من أهم المدن الكبري في العالم القديم وكان بيتردد عليها بحارة وتجار كتير بيتوجهوا *لميناء الإسكندرية" ولكثرة الصخور الموجودة في البحر المتوسط بني *بطليموس التاني" المنارة عشان تساعدهم في الوصول للميناء بدون خساير.
وصف "فنار الإسكندرية" عدة مؤرخين منهم "المسعودي" عام 944م قبل ماتدمر بسبب الزلازل العديدة اللي ضربتها ووصفها "ابن بطوطة" بعد ماضربها عدة زلازل دمرتها.
يقال انها بواقي من فنار الاسكندرية لقوها في البحر المتوسط
مر علي "فنار الإسكندرية" حوالي 22 زلزال صمدت قصادهم وكنت شغالة لحد ماجه زلزال 1303م بالأخص في عهد السلطان "الناصر محمد بن قلاوون" السلطان المملوكي وضرب الزلزال شرق البحر المتوسط ودمر حصون "الإسكندرية" وأسوارها ومنارتها ووصف "المقريزي" اللي أصاب الاسكندرية من خراب وتدمير وذكر أن الأمير "ركن الدين بيبرس الجشنكير" رمم المنارة من تاني..عام 1350م زار "ابن بطوطة" الاسكندرية وقال [وقصدت المنارة عند عودتي لبلاد المغرب فوجدتها قد إستولي عليها الخراب بحيث لا يمكن دخولها ولا الصعود إليها وكان "الملك الناصر" شرع في بناء منارة بإزائها فعاقه الموت عن اتمامها] ..وكلام "ابن بطوطة" دليل علي انهيار الفنار في ذلك الوقت وبالتحديد في العصر المملوكي في مصر.
قلعة قايتباي الموجودة حاليا مكان فنار الاسكندرية
أما "ابن اياس" المؤرخ المصري ذكر أنه عندما زار السلطان "الاشرف قايتباي" الاسكندرية 1477م أمر أن يبني مكان الفنار برج جديد اللي اتعرف بعد كدة بإسم قلعة قايتباي..واستخدموا في بناء قلعة قايتباي الاحجار المتبقية من فنار الاسكندرية.
المقال بواسطة |
أميمة عبد المنعم
