الرئيسية / المقالات /
8258 مشاهدة03 يونيو 2018

الكلمه الطيبه لها مفعول السحر قصص هتغير مفهوك عن روعة الكلمة الطيبة - STJEGYPT

الكلمه الطيبه لها مفعول السحر قصص هتغير مفهوك عن روعة الكلمة الطيبة - STJEGYPT


واحد صاحبي دكتور علم نفس  
مراته اسلوبها طيب جدًا قمة الاحترام  
ولو دخلت ضيف مع جوزها .. تشيلك فوق دماغها  
الكلمة الطيبة
= بقوله ماشاء الله زوجتك ذوق جدًا ربنا يحفظها .. قالي تعرف .. مكنتش كدا نهائًيا .. كان ممكن يجيلي صديق تدخل وتنام ومتجيبلناش واجب .. تهملني ف الاكل والسؤال ..

عصبيه بطريقه غريبه .. لدرجة اني طهقت وقرفت وقررت الانفصال .. لكن قولت ليه ميكونش العيب مني ! مراتي زي الزهره .. ليه مسقيهاش ..

يمكن دبلانه من قلة الاحتواء ليها فبتجرح زي الزهره الدبلانه الناشفه .. بقيت اقعد مع اهلي وهي موجوده واقول مراتي زي التاج والله بحس اني ملك طول ما هي في حياتي ..

الله يحفظها .. دي اكلها تحفه مابدوقش اطعم منه ربنا يبارك ف عمرها .. لما بيجيلي حد بتشرفني وتقدمله اعلي واجب .. يوميًا علي كدا امدح فيها ف بوست ع الفيس .. قصاد اهلي ..

مشتكيهاش لحد ومخرجش سرنا بره .. بنصحها بكل هدوء بس بطريقه غير مباشره .. بنت اللذينه اتغيرت .. لقيتها جايه ف ليله بتبوس دماغي وانا تعبان وسهرانه علي الارض جنبي ..

بتهتم بنفسها .. بتعتذرلي كتير علي تقصيرها بتهاديني .. اكتشفت ان النصيحه بهدوء والمدح واني اذكر قيمتها ومنكرهاش .. اقرب سبيل لاني اسرق قلبها .. وتبقي زي ما انت شايف .. مشرفاني ورافعه راسي ..
-
قالولي مره ان شاب كان بيصلي في المسجد ف موبايله رن .. الناس زعقوله وجرحوه .. مدخلش المسجد تاني !! ..

- وشاب غيره كان ماشي ف الطريق فغصب عنه خبط في صنية شاي علي القهوه ف كسر الكُبايات اللي فيها .. صاحب القهوه ضحكله وقاله فداك ١٠٠ ألف كُبايه .. الشاب بقي زبون دايم علي القهوه .. بسبب اسلوب صاحب القهوه !!

- الامام احمد بن حنبل دخل عليه بالليل حرامي وهو بيصلي ف بيته .. عمال يدعبس ف الكراكيب ويدور مهواش لاقي اي حاجه .. الامام احمد خلص صلاه وقاله : ملقتش حاجه من الدُنيا في البيت ..

ايه رايك لما يبقالك نصيب من جنة الاخره ؟! قاله ازاي .. الامام احمد ضحكله وقاله الاول تتوضي وتصلي .. علمُه الوضوء والصلاه .. وخلاه يصلي ركعتين ونصحُه بكل طيبه ..

الفجر أذن .. خرجوا سوا للصلاه .. الناس شافوا الحرامي والامام احمد معاه .. اتعجبوا .. معقوله !! بيعمل معاك ايه الراجل دا يا امام ؟! ..

قالهم : جه يسرقنا .. فسرقنا قلبُه ! .. بحُسن الاسلوب وبالطريقه سرق قلبه .. ممسكش عصايه ونزل فوقيه ضرب .. او شتمه او بلا بلا بلا ..

- واحد راح لسيدنا عُمر بن عبد العزيز وقاله هنصحك نصيحه بس شديده شويه ممكن تقبلها ؟! قاله متنصحنيش ومش هقبلها ! دا ربنا قال لسيدنا موسي ينصح فرعون بقول لين وطيب وهو طاغيه وفاجر .. تيجي انت تنصحني بعُنف وانا موحد بالله ؟!

- لما راح شاب للشيخ الغزالي وقالي ايه حُكم تارك الصلاه ؟! .. الغزالي رد عليه رد صادم .. قاله حُكمه أن تأخذه معك الي المسجد !

- ولما شاب مراهق في سن العشرينات .. راح للشعراوي وقاله انه حلال نفجر اي ديسكو او بار ليلي باللي فيه .. لانهم فجره عُصاه .. الشعراوي قاله الشيطان عاوزهم يدخلوا النار ولا الجنه ؟! قاله النار طبعًا .. قاله وانت عاوز تفجرهم وتموتهم وهما علي معصيه وتدخلهم النار وتساعد الشيطان !! الاولي انك تنصحهم وتدعيلهم بالهدايه !

النصيحه ياجدعان .. إحنا داخلين علي رمضان ،، ناس كتير هتتكلم في الدين وهتنصح .. ف بالله عليك وانت بتنصح حد .. إنصحه بهدوء .. بإبتسامه ..

بينك وبينه وماتجرحهوش !! النبي صلى الله عليه وسلم مكنش بيجرح حد .. ويستحيل كان يتكلم في الدين وينصح إلا وهو مُبتسم ! فاكرين سيدنا الحسن والحسين لما لقوا راجل عجوز بيتوضي غلط .. مقالوش له ايه الجاهل دا !

ولكن قالوله احكم بينا وشوف مين بيتوضي احسن .. ولما اتوضوا قالهم والله انتم الاتنين بتتوضوا صح وانا الغلط ! نصحوه بدون ما يجيوا علي مشاعرُه او يقللوا منه .. علي راي احد العلماء بيقول : بُلينا بقوم يعتقدون أن الله لم يهدي غيرهم ! ..

- الامام الحسن البصري قال اذا نصحتني علي الملأ ( قصاد الناس ) تبقي بتفضحني ! واذا نصحتني بيني وبينك ( تبقي فعلاً بتنصحني ) اذًا اختار كلامك .. نقي اسلوبك .. لان فعلاً والله في ناس من طريقة كلامها ونصيحتها بتخلينا نعمل الغلط وضميرنا مرتاح 
 
 

Share

Suggestions

Back to Top