AD1
الرئيسية / المقالات /
1278 مشاهدة13 يونيو 2018

إيه الحاجة اللي اتعملت قدامك، وخلتك تعتقد إن اللي عملها ذكي فعلًا؟ - STJEGYPT

إيه الحاجة اللي اتعملت قدامك، وخلتك تعتقد إن اللي عملها ذكي فعلًا؟ - STJEGYPT

سؤال على Quora بيقول:
إيه الحاجة اللي اتعملت قدامك، وخلتك تعتقد إن اللي عملها ذكي فعلًا؟

دي إجابة "Rachel Sweeney":
أنا كنت عارفة إن بنت أختي ذكية جدًا، لكنها عملت حاجة عبقرية في يوم أجازة لما كان عندها خمس سنين - تخليك تحطها في فئة أعلى من الذكاء بشويتين تلاتة!

في اليوم ده كنا مستمتعين بوقتنا وبنلعب لما جه وقت إنها تمشي... ساعتها طلبت مننا (وكنا حوالي عشرة بالغين) إننا نلعب معاها لعبة أخيرة قبل ما تسيبنا وتمشي.

اللعبة كانت عبارة عن مسابقة تلوين، وهي خرجت من جيبها Sticker (البتاع اللي بيتلزق في الكراسات ده ) وقالت إنها هتديه للفائز علشان تشجعنا بقى وكدة!

طبعًا كنا معتقدين إن دي حِجَّة بتعملها علشان تلعب لها عشر دقايق كمان ولا حاجة؛ وهي قالت لنا شروط المسابقة:
كل واحد مننا معاه ورقة هيرسم فيها شكل هندسي، ويكتب في الورقة من فوق الشكل ده عبارة عن إيه؛ وبعدين هتحكم هي مين الفائز.

اللي حصل إن كلنا شاركنا معاها، وكل واحد رسم اللي جه في دماغه؛ اللي رسم مثلث، واللي رسم قلب، واللي رسم معين... إلخ، وبعدين إديناها الورق اللي رسمنا فيه.

بعد ما خلصنا واديناها الورق لقيناها جَمَّعته كله على بعضه، وبدل ما تحكم على الرسومات بتاعتنا راحت مطَبَّقَة الورق وحاطّاه في ظَرف وكتبت عليه اسمها، وكتبت تحته "أشكال هندسية"، وأخدت الظرف ده وطلعت تجري على الباب وهي بتقول:
"كدة الواجب اتعمل"!
_____
حقيقي على قد ما الموقف ده ظريف، على قد ما بيعلمنا درس مهم جدًا؛ إنك ماتستخفش أبدًا بذكاء الأطفال ولا بقدراتهم على التفكير والابتكار...

كم واحد ممكن يقول كلام مهم قدام طِفل وهو متخيل إنه مش هيستوعب الكلام ومش هيهتم به، ويفاجأ إن الطفل ده فضحه بالكلمتين اللي سمعهم فضيحة اللحمة في السوق!

وكم واحد حاول يحكي قصة خيالية لطِفل ولقاه بيفَنِّد الموضوع منطقيًا وبيوصل لإن الشخص البالغ ده بيسرح به وبياكل بعقله حلاوة!

نصيحة لوجه الله... بلاش تستخف بعقول الأطفال... ده لمصلحتك انت والله!

أصل السؤال من الموقع نفسه

من هنا

كتبه | محمد ياسر

الذكاء


Share

Suggestions






Popular Summer Training


Popular ScholarShips

Popular Cinema

AD1

Back to Top