AD1
الرئيسية / المقالات /
1015 مشاهدة07 سبتمبر 2018

الجملة الشهيرة ,, الشغل مابيقفش على حد ,, القنبلة الموقوتة !! - STJEGYPT

الجملة الشهيرة ,, الشغل مابيقفش على حد ,, القنبلة الموقوتة !! - STJEGYPT

غيَّر مفاهيمك و لو شركتك قالت لك الشغل ما بيقفش على حد ..اعرف انها محل بقاله

من كلام الكبار اللي بنسمعه كتير في معظم الشركات و البنوك في هذا الجزء المُظلم من العالم كلمة الشغل ما بيقفش على حد ..
أول ماتلاقي حد عاوز يسيب الشركة او البنك تلاقي مديرة يروح ينزل ضهر الكرسي لحد ما يبقى شيزلونج وياخد نفس من الشيشة ويقول له ربنا يوفقك عموماً الشغل ما بيوقفش على حد ..
الكلمة دي عادة بتتقال قبل ما المدير حتى يكلف خاطره أنه يسأل الموظف هو عاوز يمشي ليه وبغض النظر عن كون الموظف ده موظف كويس ولا لأ ...
أي حد عاوز يمشي مع السلامة الشغل مابيقفش على حد ...
طبعاً ده لا كلام كبار ولا نيله ده كلام بقالين ماعندهمش أدنى فكرة عن أبسط قواعد البيزنس
وهو ما أختصره خالد الذكر جاك ويلش حين قال Company is people الشركة عبارة عن موظفين ولو مافيش موظفين مافيش شركة ولو مافيش موظفين كويسين مافيش شركة كويسة
و الشغل مش هيقف اه صح .. بس هيتكعبل ..ليه تسيبه كده ؟!
ولو كان موضوع أن الشغل ما بيقفش على حد ده في أدنى درجة من درجات الصواب ماكنتش الشركات المحترمة تعمل حاجه أسمها retention plan علشان تحافظ على الموظفين الكويسين وتخليهم مايمشوش
و لو الشغل مابيقفش على حد ماكنش هيبقى في حاجة أسمها exit interview للموظف لما ييجي ماشي من الشركة علشان الشركة تعرف الموظفين بيمشوا ليه فيتجنبوا الأسباب اللي بتخلي الموظفين الكويسين يمشوا فيشتغلوا على الأسباب دي علشان الناس الكويسين مايمشوش
ولو الشغل مابيقفش على حد ماكنش يبقى الturnover العالي للموظفين يعتبر من المؤشرات السلبية لإدارة الشركة بصفة عامة والHR بصفة خاصة
ولو الشغل مابيقفش على حد ماكنش يبقى في حاجة إسمها regretted loss في الموظفين
وهنا يبقى السؤال ليه موضوع الشغل مابيقفش على حد مابنسمعوش في الشركات المحترمة وبنسمعة في الشركات التعبانه حتى لو كانت بتحاول تعمل نفسها محترمة؟
الإجابة ببساطة أنه الشركات المحترمة فاهمين أنه الهدف الأساسي للبيزنس هو تعظيم الربحية profit maximization ففكرة أنه موظف بيكسبها فلوس يمشي معناها خسارة فلوس وده موضوع خطير جداً
(( أما الشركات التعبانه فهي الحقيقة أقرب للNPOs أو المؤسسات الغير هادفة للربح منها للشركات وبيبقى الهدف الأساسي منها تقديم خدمات إجتماعية للمديرين اللي مسيطرين عليها وكل موهبتهم في الحياة أنهم بيعرفوا يقرطسوا الowner بشكل أو بأخر ))
فبالتالي كون الشركة كويسة ولا تعبانه مش ده المهم المهم إنها مكفياهم ومعيشاهم ملوك وبتديهم مرتبات ومزايا مش هيلاقوا ربعها لو خرجوا بره بل على العكس كل ما الناس الكويسين يمشوا ده أحسن ليهم لأن الناس الكويسين بيمثلوا خطر عليهم ...
خلاصة الموضوع أول ماتلاقي مدير بيقول الشغل مابيقفش على حد أعرف أنك بتتعامل مع بقال حتى لو بيلبس بدله وقاعد على مكتب والناس بتقوله يا مستر او يا دكتور

كتبه | محمد أحمد

نصائح شغل


Share

Suggestions

AD1

Back to Top