الشئ العجيب ده ؟؟ .. يبقي أضخم آلة بناها الانسان علي الاطلاق !
- ايوه بردو ايه ده ؟
= ده يا سيدي اسمه ( LHC ) اختارا لـ Large Hadron Collider
أو مصادم الهدرونات الكبير ... الكبير أوي :D موجود في CERN
قبل ما اقولك اللي بيحصل جوا الشئ ده .. أحب اقولك اللي قالته البروفسير ليزا راندال - ودي عالمة كبيرة في الفيزياء النظرية وخبيرة في فيزياء الجسيمات وعلم الكون - عن المصادم ده :
.
( رغم تجنبي المبالغة، إلا أنّ مصادم الهدرونات الكبير (LHC) ينتمي إلى عالم لا يمكن وصفه إلا بأسماء التفضيل. فهو ليس بمجرد مصادم كبير: الـ(LHC) هو أكبر آلة بناها الإنسان. هو ليس مجرد منطقة مُبرّدَة: درجة الحرارة المطلوبة لتشغيل الممغنطات المحوسبة بداخله هي أكثر منطقة ممتدة باردة نعلم عنها في الكون - أكثر برودة حتى من الفضاء الخارجي.
المجال المغناطيسي فيه ليس مجرد مجال شديد: المغناطيسات ثنائية القطب فائقة التوصيل تولّد مجال مغناطيسي أقوى 100 ألف مرة من مجال الأرض، وهي أقوى مغناطيسات يتمّ تطويرها في تاريخ الإنتاج الصناعي على الإطلاق.
والأمر لا ينتهي هنا. الفراغ بداخل الأنابيب التي تحتوي البروتونات، بقيمة جزء من تريليون من الجو، هو أكثر فراغ أقرب للكمال على أكبر منطقة يتم عملها على الإطلاق. طاقة الإصطدامات هي أكبر طاقة يتم توليدها على الأرض على الإطلاق، مما يسمح لنا بدراسة التفاعلات التي حدثت في الكون المبكر في بداية الزمان )
.
- اممم .. واضح ان الست دي بتقول كلام كبير أوي .. طيب ودول عملوه ليه بقي ؟!!
= أه والله ، أحبك وانت بتدخل في المفيد ، هقولك :D
لو معاك فازة مثلا مقفولة من كل حتة وانت حاسس ان جواها حاجات كتير وعايز تعرف اللي جواها ده ايه .. ايه ابسط حاجة ممكن تعملها ؟؟
اول وابسط حل هتفكر فيه انك تخبطها في الارض فتتكسر ف كل المحتويات اللي جواها تطلع وتقدر تشوفها .. تمام كده ؟ مش مهم امك هتعمل فيك ايه بس المهم انك عرفت اللي فيها :D
اهو ده تقريبا فكرة عمل المصادم ده .. العلماء عايزين يعملوا تعجيل او تسريع للبروتونات وبعدين يطقشوها في بعض ، او يعملوا تصادم بين الجسيمات وبعض عشان يشوفوا الطاقة الهائلة والجسيمات اللي هتنتج نتيجة التصادم ده ويقدروا يدرسوها ويعرفوا خصائصها زي هيجز بوزون اللي اكتشفوه ده مثلا ( نبقي نتكلم عليه وقت تاني ) .. والمعلومات دي بتساعدهم في تكوين تصور اعمق وأوضح لبداية الكون ده ، ازاي (الانفجار العظيم - Big bang ) ده حصل ؟ .. اوكيشن :D
.
ايه بقي اللي بيعملوه بالظبط جوا الـ LHC ده ؟؟
جابو حضرتك ذرة هيدروجين لطيفة كده .. وبما ان الذرة دي عبارة عن نواة والكترونات بتدور حواليها .. قاموا عملوا ايه بقي ؟؟
1- قالوا بصوت احمد زكي .. دول شوية الكترونات ملناش دعوة بيهم :D ، احنا عايزين النواة لوحدها .. فقاموا ضخوا ذرات الهيدروجين دي جوا أنبوب كده سموها ( حجرة المصادم للمسارع اللحظي ) او ( Linear accelerator 2 ) وهوب يسحبوا منها كل الالكترونات ( في حالة ذرة الهيدروجين فيها الكترون واحد بس )
.
2- كده هيتبقي نواة هيدروجين ، والنواة معروف ان جواها بروتونات ونيترونات ( نواة الهيدروجين مفيهاش نيترون خالص ) .. وطبعا بما ان البروتونات موجبة الشحنة.. يبقي نواة الهيدروجين هتبقي عبارة عن بروتون موجب الشحنة .. جميل جدا ، ومادام في جسيم مشحون ، كده هقدر اتحكم في حزم البروتونات دي بواسطة اي حقل كهربائي .
وبكده هقدر اخليها تتحرك جوا الانبوب دي وبعد شويه هتبقي سرعتها ( تلت سرعة الضوء !! ) .
يتهدوا بقي ؟؟ لاااا
.
3- قاموا دخلهم لانبوبة دائرية كده محيطها 157 متر بيسموها ( المعزز ) هنخليهم يلفوا فيها عشان بردو ازود من سرعتهم اكتررر وكمااان هيستخدموا الحقل الكهربي تاني ؤبشكل متزبزب او متردد عشان يزوقهم فيزود سرعتهم ( كانك بتزوق المرجيحة بتاعة ابن خالتك .. كل ما يجي عندك تزوقه اكتر فسرعته تزيد واخدلي بالك ) وكمان هيستخدموا جهد مغناطيسي عشان يزودها اكتر :D
- هي الجسيمات دي ملهاش أهل يسألوا عليها ؟
