سنة 1973 أتولد طفل أسمه “larry page” لأم وأب مجانين بالكمبيوتر!!
الأب كان أستاذ جامعى فى "علوم الحاسب" والأم كانت محضرة ماجيستير فى "علوم الحاسب" بردوا
متخيل بيت زى كدة ممكن يطلع منه ايه؟ -سنة 1978 لما "لارى" كان عنده 5 سنين أهله أشتروله أول جهاز كمبيوتر واللى تكلفته كانت غالية جداً!!
بس هما كانوا مؤمنين بأن التعليم فى السن الصغير دة ممكن يخلى ابنهم حاجة عظيمة بجد، ودة اللى حصل قدام فعلاً، "لارى" كان طول الوقت بيشتغل على الكمبيوتر بتاعه لدرجة أنه كان بيعمل الواجب المدرسى بتاعه على الـ Word فى نفس الوقت اللى اصحابه فى المدرسة كانوا لسة بيعملوا الواجب على ورق عادى!!
أخوه الكبير كان بيشجعه يفكك أى حاجة إلكترونية حواليه ويعيد تركيبها تانى عشان يفهم هى متكونة من ايه ويقدر يعدل عليها كمان!!
كبر "لارى" شوية ودخل جامعة "ميشجين" قسم "هندسة الحاسب" وبعدها وبالتحديد فى سنة 1995 قرر أنه هيقدم على برنامج لتحضير الدكتوراه فى جامعة "ستاندفورد"
واللى كان بيساعده هناك وبيشرحله نظام الدراسة كان “Sergy brain” اللى بعد كدة هيغير العالم معاه :)
وفعلاً اتصاحبوا الأتنين وبدأوا يفكروا مع بعض ازاى يربطوا كل الروابط اللى فى العالم مع بعض؟ -قدر "لارى" و "سيرجى" أنه يعملوا "كود" ولوغريتمات خاصة بيهم تمكنهم انهم يسهلوا عملية البحث على أى حد فى العالم.
سنة 1996 جامعة ستاندفورد سمحتلهم أنهم يجربوا الأكواد واللوغريتمات دى على نظام الجامعة الخاص ونجح جداً، والسنة اللى بعدها طوروا فيه أكتر، وسنة 1998 أنشأوا شركتهم فعلاً!!
بعد ما قدروا يقنعوا كذا مستثمر بفكرتهم جمعوا 1 مليون دولار وبدأوا يشتغلوا من جراج فى بيت واحد صاحبهم.
ومن هنا حصلت عملية تطوير كبيرة جداً لغاية ما وصلوا سنة "2000" لنظام الإعلانات وهو دة اللى بقى مصدر مكسبها واللى سمحهلهم انهم يطوروا من خدماتهم ومنتجاتهم فيما بعد،
لغاية ما وصلوا للى وصلوله دلوقتى وثروة "لارى" بقت 31 مليار دولار !!
