”تقدير الجامعة اثبت انه معيار فاشل في تقييم المتقدمين للعمل ، وكمان سكورات الامتحانات” ، دي كانت اول حاجة قالها لازلو بوك المسؤول عن الpeople operations and hiring في جوجل لمحاوره في نقاش مطول عن المعايير الي جوجل بتهتم بيها في تعيين موظفيها منشور في صحيفة النيويورك تايمز (
اللينك الأصلي هنا)، “والملاحظ ايضا ان نسبة الي متعلموش في جامعات في جوجل وصلت لانها ممكن تكون 14% في بعض الاقسام”
طبعا بوك مش بيقلل من قيمة التقدير الجامعي، لانه ببساطة جزء كبير جدا من الوظائف في جوجل هي وظائف تقنية، مطلوب درجة مرتفعة من المعرفة في البرمجة والرياضيات الحديثة والكمبيوتر بشكل عام. فالتقدير الجامعي طبعا بيديك نقطة قوة لكن بيأكد ان جوجل بتبص لأبعد من كدا، في سياق النقاش اختار بوك يحدد 5 صفات اساسية جوجل بتحاول تختبرها في المتقدمين ليها وهي :
1- القدرة على التعلم والتحليل Cognitive ability :
غم ان اغلب الوظائف في جوجل بتتطلب مهارة في البرمجة وطبعا من اسس قياس صلاحية المتقدم لكن الصفة الأهم الي جوجل بتدور عليها هي ما يسمى بالcognitive ability، او القدرة على التعلم والتحليل، جوجل مش مهتمة بالIQ اد ما مهتمة بقدرتك السريعة على اكتساب المهارات والمعرفة، وتحليل معلومات مختلفة بسرعة عالية بدماغك ، ان تبقى دماغك حلوة وتعرف تترجم بسرعة ، وجوجل بتقيس المهارات دي عن طريق انترفيوهات قايمة على قياس ردود افعالك وسلوكيات في مواقف متصممة مخصوص عشان تقيس القدرة دي Structural behavioral interviews.
2- القدرة على القيادة Leadership
تهتم جوجل جدا بتعيين اصحاب الشخصية القيادية، وطبقا لـبوك ، مش المقصود هنا القيادة بالمنصب، كونك كنت رئيس اتحاد الطلاب او نادي الشطرنج مش هو الي يهمنا، وصلت للمركز دا في اد ايه برده ميهمناش، سؤالنا ليك، وانت عضو في فريق، وفي وقت المشكلة ، تقدمت للامام وقدت فريقك لحلها في الوقت المناسب ؟ اتراجعت وسبت القيادة لحد تاني لما الوضع استدعى؟ لان القدرة انك تبقى شخص قيادي في وسط مجموعة فيها نوع من المسؤولية مش رغبة في السلطة، تراجعك عن القيادة في اوقات بيوضح دا.
3-المسؤولية Ownership
الاحساس بالمسؤولية ، التدخل في المشاكل لحلها حتى لو مش مسؤوليتك الشخصية والتمتع بحس ownership، ان المشكلة تخصك وبتاعتك ومسؤوليتك لحد ما تخلص
4- التواضع Humility
ودي فضيلة مهمة في الشغل، ومش مقصود بيها بس التواضع في انك تتراجع عن القيادة بعد ما تكون ادليت بمساعدتك في الحل، لكن هي طريقة تفكير وصفة، ان يكون هدفك التحرك كفريق لحل المشكلة مش رغبتك في البروز الفردي والتنجيم تطغى عليك، لازم تبقى قادر توسع وتدي مساحة لاسهامات الآخرين لان الهدف حل المشكلة بافضل وسيلة.
ومش بس كدا، التواضع العقلي مهم، ان يبقى عندك احساس انك مش الاعظم والافضل طول الوقت والا مش هيبقى عندك الاستعداد انك تتعلم اي حاجة، القناعة ان كل حد عنده حاجة ممكن يعلمهالك، ودي صفة حسب كلام بوك صعبة لما بيلاقيها لان اغلب الطلاب المتفوقين واللامعين نادرا ما بيواجهوا الفشل فقليلا ما بيتمتعوا بالقدرة على التعلم من الفشل والتواضع.
5-الخبرة Expertise
طبقا لبوك ، الخبرة هي اقل الصفات اهمية بالنسبة لجوجل، لو انت شخص عنده قدرة عالية على التعلم، ذكي وسريع البديهة وعندك شخصية قيادية وحماس وفضول ، الخبرة اخر حاجه هتهمنا لان التجربة اثبتتلي ميت مرة انه بيكون افضل.
وفي نهاية حواره لخص بوك فلسفتة في التعيين :
“الموهبة بتيجي في الف شكل واغلبها غير معتاد ولا متوقع، لما تشوف ناس ما دخلتش كليات ومع ذلك شقوا طريقهم في الحياة وبقوا حاجة، دول ناس استثنائية! لازم ندور عليهم ونجيبهم هنا، المعايير التقليدية اغلبها اثبت فشله في التقييم والتعليم الجامعي نادرا ما بيكون السبب في خريج موهوب جاهز للشغل، كليتك متهمنيش وجامعتك متهمنيش، معرفتك، قدراتك، صفاتك الشخصية وقدرتك على التعلم والقيادة واحساسك بالمسؤولية والتواضع هي الي تهمني، ومتهمنيش اكتسبتها ازاي ومنين، حبك للعمل وقدرتك على التكيف هي الي بدور عليه”
