الرئيسية / المقالات /
18996 مشاهدة29 ديسمبر 2016

أسرار حجز تذكرة السفر بأرخص سعر - STJEGYPT

أسرار حجز تذكرة السفر بأرخص سعر - STJEGYPT


أسرار حجز تذكرة السفر بأرخص سعر =D
من أهم مراحل تنظيم رحلة بسعر كويس هو حجز تذكرة طيران بسعر رخيص لأن ده بيكون تقريبا أغلى حاجه في الرحلة , و الحمد لله أن دلوقتي و انت في مكانك تقدر تحجز لأي مكان في العالم في 3 دقائق بدون الاعتماد على أي شركة سياحة .
مبدئيا خلينا نعرف الفرق ما بين أنواع شركات الطيران :
النوع الأول : بيكون مملوك للدولة زي طيران المصرية و الاماراتية و الكويتية و غيرهم و ده بيكون سعره غالي الى حد ما مقارنة بالشركات الخاصة و ده نقدر نحجزه أون لاين .
النوع الثاني : الطيران المنخفض التكاليف و ده بيكون سعره أرخص كتير لأن بيقدملك تذكرة بدون أي زيادات زي الوزن و اختيار الكرسي و الوجبة ( يعني بيديلك كرسي و بس ) مثال عليها شركات أسيوية مثل ( اير اسيا , نوك اير , فاير فلايز , ليون اير ) و شركات اوربية زي ( رايان اير , ايزي جيت , فويلينج ) , طبعا أنا بفضل النوع ده لأنه سعره أرخص كتير و لكن للأسف غير متوفر عندنا من مصر شركات زي دي كتير , غير كام شركه بتطلع لأوروبا من شرم الشيخ و الغردقه , و أحنا بنحتاج الشركات دي خارج مصر في التنقل من دولة لدولة او مدينة لمدينة. و النوع ده غالبا متوفر للحجز أون لاين فقط . علشان يوفروا مصاريف المكاتب و الطرق التقليدية القديمة في الحجز .
أنت عارف اني مره حجزت تذكرة ما بين مدينتين بسعر لا يتعدى 200 جنية , لأ و المفاجأة كمان ان ساعات بتكون فيه رحلات مجانية , مره حجزت رحلة من ماليزيا الى سنغافورة بسعر 250 جنيه و كمان كانت العودة مجانا , فأهم حاجه هو البحث الدقيق و اختيار الوقت المناسب.
النوع الثالث : و هي الرحلات الشارتر و دي بتكون طائرات صغيرة مؤجرة بالكامل من احدى شركات السياحه للسفر من دولة معينة الى دولة أخرى و دي غالبا منقدرش نحجز فيها اون لاين لأن بتبقى تابعة لمجموعات منظمة .
حلو أوي الكلام ده , المهم بقى أزاي نعرف نختار الوقت المناسب للسفر و ازاي نعرف نحجز أرخص رحلة طيران و ازاي نحجزها !!!؟؟؟
أهم أسرار حجز أرخص رحلة طيران :
1) اختيار الوقت المناسب للسفر : من أهم الحاجات اللي تخليك تجيب سعر تذكرة كويس أنك تختار الوقت المناسب للسفر بعيد عن الزحمة , يعني مثلا أنسب وقت للسفر لأوربا هو شهر 4 و شهر 10 و ده تقدر تجيب فيه أقل سعر لتذاكر الطيران و في نفس الوقت بتكون أوروبا رخيصه في الفتره دي من حيث الفنادق لأن بيكون الموسم خلص , و كمان بتكون مش زحمة . بالنسبة لشرق أسيا أحسن وقت للسفر من شهر 10 الى شهر 5 و ده بيكون أحسن طقس عندهم و بيكون الأمطار قليلة جدا . فالسر الأول أبعد عن شهور الصيف عموما و المواسم و الأعياد .
2) وقت حجز تذكرة الطيران : طبعا كل ما تحجز بدري تلاقي تذكرة أرخص و ده حقيقي فعلا , لكن أنسب وقت للحجز هو من 3 الى 4 شهور قبل السفر و بالتحديد قبل 81 يوم من السفر و ده بيكون أرخص سعر للتذكرة .
4) خلي بالك دائما من وقت وصول رحلة الطيران للمدينة و حاول تختار رحلات توصل الظهر مثلا أو توصل بدري شوية و ده ليه ؟؟ لأنك لو اخترت رحلة بتوصل بليل مثلا الساعه 11 أو 12 بليل مثلا حتجبر أنك تحجز ليلة في فندق و تدفع تمنها و مش حتستفيد من اليوم ده غير أنك نمت في الفندق و بس , لكن لو اخترت رحلة تصل الظهر أو الصبح , حتبدأ يومك من أوله في المدينة فميضعش عليك يوم.
5) الرحلات الوجهتين أرخص من وجهه واحده , يعني لو مثلا حتحجز طيران ( قاهره – بانكوك – قاهرة ) حتكون أرخص من ( قاهره – بانكوك ) ( بوكيت – قاهره ) مثلا فحاول أنك تروح و ترجع من نفس المدينة
6) في الرحلات منخفضة التكاليف متدفعش تمن الكرسي و لما الطياره تطلع تبقى تعد في الكرسي الفاضي اللي يعجبك و بردو في رحلات منخفضة التكاليف لو حيكون معاك وزن و انت مسافر فنصيحه اشتري وزن أون لاين بيبقى أرخص كتير بدل ما تدبس في المطار. و مالوش لازمة تشتري التأمين وقت الحجز لأن مش حيفيدك أوي و تكلفه على الفاضي.
7) بخصوص اختيار اليوم المناسب للسفر حاول تبعد عن عطلات الويك اند لأنها بتكون أغلى من وسط الأسبوع
8) أحسن يوم لحجز تذكرة هو بعد ظهر يوم الثلاثاء خلال الأسبوع، باعتبار أن العروض الأساسية لشركات الطيران الكبرى يتم إدراجها يوم الإثنين، وبعدها بيتم تقديم عروض منافسة لها من قبل الشركات الأخرى في اليوم اللي بعده..
9) تابع دائما رحلات اللي بيكون فيها ترانزيت و دي بتكون أرخص بكتير من الرحلات المباشرة و فيه دول لو الترانزيت طويل بتكون فرصة ليك انك تدخل البلد دي و تتفسح فيها شوية و تتفرج على معالمها بدون ما تتكلف فلوس طيران اضافية .
10) أول رحلات طيران الصباح الباكر هي الأرخص وتليها رحلات وقت الغداء والعشاء.
11) حاول دائما تسافر بشنطة واحده معاك على الطائرة ميزدش وزنها عن 10 كيلو و خاصة في أوروبا ده حيوفر عليك كتير في الفلوس و كمان في الوقت .
أتمنى أن الأسرار دي تفيدكم في حجزكم القادم لتذكرة طيران

رحلة سعيدة 

Travel Secrets

Share

Suggestions

Back to Top