ليه دكتور مجدي يعقوب مش مهندس?!
دفعتنا تعتبر هيا اكبر دفعة دخلت كلية تجارة قسم إنجليزي جامعة الأزهر، عددنا كان 1000 وكسور تقريباً ووصلنا لسنة رابعة أقل من 400، قسم إدارة 30 تقريباً وإحصاء 5 والباقي محاسبة!
كتير من صحابي اللي دخلو قسم محاسبة كانو بيقولولي: انت ليه دخلت إدارة?! كنت برد بإني حابب مجالات إدارة أكتر وطبعا علي رأسهم الMarketing
بس لما بسألهم نفس السؤال وليه دخلوا محاسبة?! كتير من
هم بيقولي مجال محاسبة أوسع من إدارة!! أو إدارة ملوش شغل!!!! أو يرد بسؤال هشتغل إيه لما ادخل إدارة?! (وطبعا الفضل في ده يرجع للدكاترة اللي ناسية إن من واجبها توضحلنا كل الطرق المتاحة وإحنا نختا.... نسيت صحيح ده هما أصلا مبيشرحوش
البوست ده مش لتفضيل قسم عن قسم خالص، الفكرة اللي عايز أوصلها إن كل قسم ليه دوره ومفيش قسم ليه شغل أو فرصة أحسن والتاني ملوش، واللي بيفكر كده يبقي هو لسه عالق في الحقبة بتاعت "ذاكر عشان تدخل طب أو هندسة وتبقي في كلية قمة"
اختيار القسم اللي هتتخصص عشان عايز تشتغل فيه مهم بالظبط زي اختيارك للكلية، محدش هيفهم ده قدك عشان محدش عارف انت بتحب ايه ونافع في ايه غيرك، انت اللي لازم تحدد مستقبلك عشان ببساطة انت اللي هتعيشوا مش أبوك او أمك او عمك الفيلسوف اللي لف الدنيا وعارف اكتر منك وانت تسكت خالص ومتفتحش بقك وهو اللي يتكلم!
مش قصدي إنك متسمعش كلامهم او تضايقهم، لكن هما ممكن يكونوا محتاجين يشوفوك ناجح وهو ده النجاح بالنسبالهم بس أكيد النجاح بيختلف في كيفية تحقيقه من شخص لشخص، واللي بيحدد الكيفية دي هو الشخص نفسه اللي محتاج ينجح.
يبقي طريقك هو الطريق اللي فيه شغفك ومفيش أي حد هيبقي مبدع زيك في مكانك عشان كده لازم تختار اللي بتحبه واللي انت فعلا موهوب فيه بغض النظر عن آراء اللي حواليك، ولو انت محتار فعلا ومحتاج تسأل، متسألش حد غير ربك "إستخارة" وهو هيدلك علي اللي فعلا أنفع وأصلح ليك، لكن أبدا متسلمش دماغك للي حواليك أو تتبع سياسة القطيع في إختيارك لأن محدش هيشوف عواقب الإختيار ده غيرك انت.
عرفتو بقي ليه دكتور مجدي يعقوب مش مهندس?!
كتبه : عبد الله يسري
