لو عاوز تنجح فى السوق وتلاقى الوظيفة اللى بتحلم بيها فى الشركة اللى بتتمنى تشتغل فيها.. يبقى لازم تتعامل زى ما الماركتيير بيعامل المنتج بتاعه..
1- مش هيفيدك بحاجة تبعت الCV بتاعك فى مليون حتة.. اذا كان الCV ضعيف (الترويج مبيخدمش منتج ضعيف).
2- الناس بتتكلم عن الموظف الكويس زى ما بتتكلم عن المنتج الكويس، وده من اهم اسباب انتقالك لوظايف وشركات احسن (قوة ال word-of-mouth).
3- مينفعش تعرض نفسك فى الانترفيو زيك زى أى حد.. من غير ما تبين ميزتك التنافسية (مبدأ البيع الفريد - Unique Selling Proposition).
4- قبل ما تقعد فى انترفيو اعرف اسعار السوق وحطّ سعر لنفسك، عشان لما يسألك فى الانترفيو عاوز كام، تتكلم فى salary مظبوط، لا أقل من امكانياتك فيتضحك عليك، ولا اكتر من امكانياتك فتفقد الوظيفة (فن الpricing).
5- لما كل الناس تروّج لنفسها بالطرق الجديدة (عن طريق مواقع التوظيف مثلاً)، ابعد انت عن الزحمة وجرّب الطرق القديمة، زى مكاتب التدريب والتوظيف التقليدية (Old is Gold).
6- طبعاً تبقى غلطان لو نزلت سوق الوظايف بدون ماتعرف اصلاً ايه اكتر حاجة مطلوبة فى السوق، ومناسبة لامكانياتك عشان تتطوّر فيها، وتتميز بيها (ال Market Research).
7- عندك منتج كويس (CV) ، و مناسب لاحتياجات سوق الوظايف، يبقى ناقصك شوية ترويج. انت محتاج مثلاً ناس تتكلم عنك وترشحك (Referrals) ، ودى قوة العلاقات العامة (PR). محتاج تبعت الCV من غير ماتستنى الشركة تجيلك او تطلب (Direct Marketing)، ممكن تحط نفسك فى شوية ادلّة زى مواقع الfreelance والشركات تدوّر عليك وتجيبك (Emarketing).
8- ابعت مع الCV بتاعك حاجات عملتها فعلاً، أو قايمة بأسباب تميزك عن غيرك (الCompetitive Advantages).
9- طبعاً انت لو مُقنع وبيّاع شاطر وبتعرف تتفاوض، فنسبة نجاحك فى الانترفيو بتبقى اعلى من غيرك، بفرض التساوى فى الامكانيات والخبرات. (قوة الPersonal Selling).
10- أخيراً لو طول عمرك فى تخصص واحد وبتتعلم فيه كل حاجة وبقيت استاذ فيه، هتتحول لBrand فى المجال ده والشركات هتتمنى انك تشتغل معاهم (عبقرية الPositioning).
