إيه هي قاعدة 52_17؟
مجموعة باحثين عملوا حاجة يقدروا بيها يتتبعوا الطريقة اللي بيشتغل بيها الناس اللي انتاجهم عالى جدا في الشركات.
اللي دايما تلاقيهم مخلصين شغلهم ومبدعين ورايقين ومبيشتكوش من كتر الشغل ولا بيقولوا انهم طول الوقت مشغولين!
لقوا ان الناس دي بياخدوا فترات متكررة من "الراحة الإيجابية الفعالة" تقريبا كل 52 دقيقة شغل بياخدوا 17 دقيقة راحة تامة بيرحوا فيها العقل من اي مجهود.
اللي بيخلي ال 52 دقيقة فعالين فعلا ومنتجبن، انهم بيكونوا منخرطين تماما ومركزين على مهمة محددة او هدف واضح بيشتغلوا عليه، وبيكونوا قافلين كل مصادر التشويش او المقاطعات، فتخيل فعلا لو عندك 4 او 5 "52 دقيقة" في اليوم بتكون مركز فيهم ومنخرط في مهمة معينة بشكل كامل، هتنجز وتبدع ولا لأ؟!
طيب ايه اللي يخليك قادر تركز لمدة 50 دقيقة فعلا؟
فترات "الراحة الايجابية" المتكررة هي اللي هتخلى مخك قادر يركز ويمدك بطاقة تخليك تقدر تنجز وتبدع.
وعلشان فترات الراحة بتاعتك تكون فعلا ايجابية خد بالك من الحاجات دي:
• ابعد تماما عن الكمبيوتر والسمارت فون، فترات الراحة الايجابية بتكون بعيدة تماما عن اي حاجة بتحتاج مجهود عقلي، حتى الايميلات او قراية بوست في معلومات جديدة ع الفيس بوك.
• الجسم البشري مش متصمم علشان يقعد فترات طويلة في مكان واحد من غير حركة، فحاول في وقت البريك تخرج تتمشى في مكان هادي قريب لو ده متاح او اعمل شوي تمارين بسيطة في مكتبك او اودتك.
• كل او اشرب حاجة فاكهة او عصير فريش علشان تزودك بطاقة جديدة منعشة ومارس الأكل بوعي وإتأمل طعم الاكل واحساسك بيه، او اشرب كوباية ماية هتزود تركيزك.
• ممكن تتكلم مع حد من زمايلك في الشغل لكن في حاجة بعيدة تماما عن الشغل.
• لو مضطر تقعد على الكمبيوتر في اوقات البريك لاي سبب، فحاول تشوف فيديو مسلي او مضحك او فيديو عن الحيوانات والطبيعة زي الحاجات بتاعت ناشونال جيوجرافيك وهكذا.
• مهم تكون فترات الراحة هي فترات متخطط ليها بشكل اختياري يعنى متستناش لما تموت من التعب علشان تاخد راحة او تنام على نفسك من الشغل او المذاكرة.
الكلام عن الراحة الإيجابية بينطبق على الانجاز والابداع في الشغل وفي المذاكرة والتّعلم.
معظم الناس اللي فعلا ناجحين ومنتجين ومبدعين مبيشتغلوش 8 ساعات في اليوم، وبيكون عندهم وقت كبير بيتبسطوا فيه ويمارسوا حاجات بيحبوها.
لانهم بساطة بيشتغلوا بذكاء أكتر وجهد أقل
