18 مليار دولار .. مبيعات شركتك .. في يوم واحد .. يا فاشل !!
موقع (علي بابا ) باع أشياء بـ 18 مليار دولار في يوم واحد فقط !
وانت بتقرأ الخبر ده لازم يتبادر إلى ذهنك المعلومات الآتية:
• «جاك ما» مؤسس موقع «علي بابا» فشل في اختبار الالتحاق بالجامعة 3 مرات .. اتقدم عشرات المرات للالتحاق بجامعات أمريكية واترفض منهم جامعة هارفارد قدم طلب التسجيل فيها 10 مرات واترفض .. اتقدم بطلب لـ 30 وظيفة واترفض .. اتقدم للعمل كعامل نظافة في محلات كنتاكي وكان عدد المتقدمين للوظيفة 30 اتقبل منهم 29 فرد والوحيد اللتي اترفض كان جاك .. اتقدم للتطوع في الشرطة الصينية وكان من بين 14 رجل تم قبول 12 فرد واترفض فردين كان جاك واحد منهم.
.
• جاك كان كل يوم يركب عجلته لمدة 40 دقيقة وعلى مدار 8 سنوات عشان يوصل لفندق قريب من بحيرة هانغتشو، عشان يحتك بالسياح ويقدم لهم خدماته كدليل سياحي مجاني عشان يحسن اللغة الإنجليزية بتاعته .. واتقبل في جامعة وصفها إنها أسوأ جامعة في مدينته .. واتخرج واشتغل مدرس إنجلش بـ 12 دولار في الشهر!
.
• جاك ثروته دلوقتي تصل إلى 21.9 مليار دولار .. وتم تصنيفه كأغنى شخص في الصين .. ويحتل المرتبة 34 بين أغنى أغنياء العالم ، وفقاً لمجلة Bloomberg.
.
• شركة علي بابا دلوقتي هي أكبر شركة تجارة إلكترونية في العالم ، بيشتغل فيها أكثر من 22 ألف موظف، في أكثر من 70 مدينة حول العالم .. تتجاوز مبيعاتها السنوية 170 مليار دولار، يعني أكبر من الاحتياطي النقدي لـ ( مصر والمغرب ولبنان والأردن وتونس ) مجتمعين وفقا لاحصائيات 2015 .. يعني أعلى من مبيعات موقع «أمازون» مرتين... أنشأها جاك بعد قعدة مع صحابه في شقته بيفرجهم على الاختراع الجديد وقتها (الانترنت) ولما بحث عن كلمات باللغة الصينية اكتشف إن مفيش أي نتائج ظهرتله بالصيني ! فـ قرر انه يستغله وينشئ موقع تجارة صيني يعمل كوسيط بين التجار في جميع أنحاء العالم وكمتجر تقدر تشتري منه أي شيء، ينافس المواقع العالمية زي أمازون .. طبعا كان الأول من نوعه في الصين فعمل طفرة هائلة في سوق التجارة الصينية وجعل من اسمه امبراطورية.
.
• إجمالي صادرات مصر هو 15 مليار و361 مليون دولار خلال سنة كااااملة (2015) .. يعني اللي بتصدره دولة بكل مؤسساتها ومصانعها ومزارعها وبابا غنوجها خلال سنة كاملة .. جاك موقعه باع بأكتر منها في يوم واحد يا مؤمن !!.
.
• أم الدنيا بانية كل آمالها وأحلامها على قرض من صندوق النقد الدولي مقداره 12 مليار دولار .. فلتتأمل.
.
• نجاح جاك مش إنه أصبح من أغنياء العالم .. لأن عمر جمع المال ما كان مقياس للنجاح ... ولكن لأنه ألهم ملايين الشباب وأثر فيهم وغير تفكيرهم تماما تجاه العمل .. نجاحه يكمن في إصراره إنه ميكونش من الشكائين البكائين الندابين ذوي الشماعات المتعددة .. في إصراه على النجاح رغم فشله المتكرر .. نجاحه يتمثل في الرسالة اللي وصلها للعالم كله إني مش فاشل ، وإني برغم صغر جسمي إلا إني مش قليل !
.
• المعلومة الاخيرة: إنت مش قليل !
كتبه :
أحمد عبد المنصف
