إلي إبني المستقبلي ( إن شاء الله
- مش هدخلك مدرسه لغات ، عشان مش دي اللي هتخليك برفيكت في الانجلش ، ولا هدخلك مدرسة أزهرية عشان مش دي اللي هتخليك شيخ و فاهم دينك كويس، خلاصة الـ 12 سنة دول هديهوملك في سنتين تلاتة بالكتير.. مش هسيبك ضحية لمدرس متخلف يشتمك او يضربك ويجبلك عاهة أو يقتلك بالغلط .. مش هسيبهم يحولوك لمسخ بتجري ورا درجات وخلاص .. مش هسيبهم يدمرولك نفسيتك وثقتك بنفسك عشان تعليم قبل الاخير علي مستوي العالم.
.
- الآلافات اللي هوفرها بدل ما ادفعلك مصاريف مدارس خاصة و دروس خصوصية وكلام فاضي هخليك تاخد كورسات في أنضف أماكن في البلد، هخليك بروفيسور في المجال اللي انت بتحبه باذن الله :D وصدقني المدرسة مش هتعلمك لغات، هخليك بردو تاخد كورسات عشان تتعلمها صح.
هخليك تاخد كورسات في أي حاجة حابب تتعلمها رسم، موسيقي، برمجه .. عشان العلم عمره ما كان محصور جوا أسوار مدرسة أو كلية وهشتركلك في نادي نضيف تلعب أي رياضة انت حاببها.
.
- مش هجيبلك شيخ يحفظك قران .. هجبلك فيديوهات تفسير الإمام الشعراوي كله أواجبلك شيخ يفهمهولك ويعرفك أصول الدين، وبعد ما تسمع تفسير كل سورة وتفهمها كويس هسيبك تحفظها وهسألك في تفسيرها قبل ما اسمعهالك.. عشان العبرة عمرها ما كانت بالحفظ يابني إنما بالعمل، عندك داعش مليانة بحفظة القرآن ولكنهم أكثر من يسيؤن للإسلام بفهمهم الغلط.
.
- أسبوع هخرجك لدريم والأسبوع اللي بعديه للمكتبة .. اسبوع هتاخد لعبة هدية والأسبوع التاني هتاخد قصة هدية واما تكبر هيبقي كتاب .. لان أول حاجة هحببك فيها هي القراءة .. وأنا عارف إزاي هحببك فيها ..
ويوم ما تحبها وتطلب مني تروح المكتبة بدل دريم بارك ساعتها هموت وأنا مطمن عليك ^^
.
- مش هقولك قوم صلي بدل ما تخش النار، هحاول اعرفك الإله اللي المفروض تروح تقابله وإنت أما تعرفه هتحبه وهتقوم من نفسك تصلي ولو مقومتش هسيبك بس هقوم اصلي قدامك وأكسفك.
.
- مش هخليك تتابع أخبار البلد ولا تتفرج علي التلفزيون المصري ولا الأفلام المصري ولا تسمع الأغاني الشعبي ابدًا لمصلحتك إنت والله :D هخليك تتفرج علي ناشونال جيوغرافيك مثلا أو الجزيرة الوثائقية وشوف كرتون براحتك و الأفلام عندك الاجنبي و عيش .
.
- علاقتي بيك مش هتبقي علاقة أب بابنه لا هبقي صاحبك اللي تيجي تحكيله صحابك اللي اتعرفت عليهم في النادي .. هبقي أول شخص يجي في بالك تكلمه لو حصلك مشكلة مش أخر شخص . :)
.
هبقي مبسوط أوي اما اشوفك قدامي شاب واثق من نفسه فاهم دينه صح جسمه رياضي مثقف و عنده معلومات عن حاجات كتير .. طموح و بيعشق القراءة وعنده شغف إنه يعرف أو يتعلم حاجة جديدة كل يوم، أكتر ما هكون مبسوط إنك مقضي حياتك كلها مذاكرة و بتطلع الاول كل سنة و تاخد شهادات تقدير في الاذاعة وتجيب 100% في الثانوية وتطلع الأول كل سنة في الكلية و تتخرج إنسان جواه حشو مناهج عقيمة أغلبها ملهوش أي تلاتين لزمة و تقعد بالحشو ده علي القهوه اللي تحت بيتنا ! :)
.
وأولا وأخيرًا هحاول أسفرك فـ أسرع وقت لـ بلد تحترم آدميتك وعقليتك وتقدر مجهودك و أفكارك وتعاملك كـ بني آدم له حرية وكرامة وتعلمك صح وتطلعك انسان مبدع عارف هو عايز إيه وبيسعي عشان يحقق اللي بيحلم بيه.
بس كده
كتبه :
أحمد عبد المنصف
