AD1
الرئيسية / المقالات /
7080 مشاهدة25 فبراير 2017

كيف رد رئيس الوزراء الكندي علي هذا السؤال ؟ - STJEGYPT

كيف رد رئيس الوزراء الكندي علي هذا السؤال ؟ - STJEGYPT

رئيس الوزراء الكندي كان في زيارة لمعهد الفيزياء النظرية .. واحد من الصحفيين حب يهزر ويحرجه بما انه خريج اداب انجلش ، فبيقوله في الحقيقة انا كنت عايز اسألك عن الكمبيوتر الكمي بس ما علينا وبدأ في سؤال تاني عادي فالناس ضحكت .. بعد ما خلص سؤاله ، رئيس الوزراء بدل ما يرد علي سؤاله .. رد علي السؤال الهزلي الأولاني و شرح الفكرة الأساسية لعمل الكمبيوتر الكمي والفرق بينه وبين الكمبيوتر العادي في دقيقة والناس سقفت وانبرهت والجرايد كتبته عنه ) :D

طيب ما تيجي نعرف بقي ايه حكاية الكمبيوتر الكمي ده وايه الفرق بينه وبين الكمبيوتر العادي بتاعنا عشان محدش يعرف يحرجنا ؟

الكمبيوتر بتاعنا ده يا سيدي عبارة عن شرائح الكترونية دقيقة من السليكون ودوائر كهربية صغيرة جدا ماشية بنظام ثنائي ( binary system ) .. يعني الكمبيوتر مبيفهمش غير حاجتين ( صفر و واحد ) يعني اي بيانات بتدخلها للكمبيوتر افلام صور اصوات اي حاجة .. لازم يحولها لمجموعة من البيتس (bits ) عبارة عن سطور مكونة من صفر وواحد .

* الـ ( bit ) هي أصغر وحدة بقيس بيها كمية البيانات في الكمبيوتر ( زي الكيلو بقيس بيه الخضار في السوق مثلا )

يعني اللي بيفهمه الكمبيوتر بتاعنا هو اختيار واحد من الاتنين .. يعني الزرار ده يا on يا off مينفعش الاتنين مع بعض وعشان كده العمليات الحسابية اللي يقدر يعملها بتبقي محددة بين الاختيارين دول فقط

نيجي بقي للكمبيوتر الكمي .. قالوا احنا عايزين نوصل لاصغر وحدة نقدر نخزن عليها بيانات .. وصلوا ان اصغر وحدة هي الالكترون .. عشان نستفيد من خواص الالكترون الكمية .. ايه خواصه الكمية دي بقي ؟
احنا كنا اتكلمنا قبل كده في 3 أجزء عن جنون ميكانيكا الكم و الحاجات العجيبة اللي اكتشفناها في سلوك الالكترون .. و الـ 3 اجزاء هتلاقيهم في أول كومنت
وقولنا ان الالكترون له طبيعة موجية يعني ممكن يبقي في كل الاماكن في نفس الوقت كاحتمالات إلي أن يتم رصده وده اللي سميناه الـ ( Superposition - التراكب الكمي ) !! .. وممكن كمان يلف في اتجاهين ف نفس الوقت !! يعني لو سالتك الكورة دي بتلف حول نفسها في انهي اتجاه مقدمكش غير اختيار من اتنين ( مع عقارب الساعة أو عكس عقارب الساعة ) يعني بلغة الكمبيوتر يا صفر يا واحد .. لكن لو سالتك الالكترون بيلف حول نفسه في انهي اتجاه .. هنا لازم تحتار، لان طبقا لقوانين ميكانيكا الكم .. الالكترون بيلف حول نفسه في الاتجاهين في نفس الوقت ومتقوليش ازااي .. يعني ممكن يبقي صفر و واحد مع بعض !

يعني الاختيارات اللي قدام الالكترون بقت كتيررر جدا بين الصفر والواحد مبقتش صفر أو واحد .. وبالتالي يقدر يعمل كذا عملية في نفس ذات الوقت طبعا الموضوع أعقد من كده بكتير لكن دي الفكرة ببساطة .. وساعتها الـ ( bit ) هتبقي اسمها ( Qubit ) اختصارا لـ ( Quantum bit ) وده اللي العلماء عايزين يستغلوه .. لو قدرنا نصنع كمبيوتر يكون وحدة التخزين الاساسية فيه هو الالكترون وقدرنا نستغل طبيعته الموجية العجيبة دي ، الكمبيوتر ده هيقدر يعمل عمليات حسابية معقدة جداا منحلمش بيها أصلا .. حسابات ممكن تاخد مننا مئات السنين عقبال ما نعملها .. هو ممكن يعملها في دقائق .

طيب ليه صعب جداا اننا نقدر نعمل الكمبيوتر الكمي ده حاليا ؟؟ .. لان المشكلة في الظروف المحيطة .. الاشعة الكونية او الاشعاعات اللي في الجو اللي انت مش حاسس بيها او الاهتزازات البسيطة اللي بتحصل في الارض ممكن تدمر الحركة الدورانية للالكترونات او الدالة الموجية بتاعته اللي احنا عايزينها ومشكلة تانية وهي عدم قدرتهم علي التحقق من صحة نتائج عمل الكمبيوتر الكمي ده ... ولكن التصور المبدئي للكمبيوتر موجود .. و في شركات بدأت تعمل نموذج أولي منه قدرته لا تتجاوز عدة كيوبات - حسب ما قرأت - ولكن لسه محتاجين تعديلات كبيرة عليه . و يوم ما يوصلوا للجهاز ده بالشكل الامثل ساعتها هيحصل انجاز لم تشهد البشرية مثله قبل كده .

كتبه :أحمد عبد المنصف

رئيس الوزراء الكندي


Share

Suggestions

AD1

Back to Top