ينفع ادخل دبوس او عود جوا بالونه و اخرجه من الناحية التانيه من غير ما البالونه تفرقع ؟؟
اها ينفع
و الصورة دي مش فوتوشوب ، انا عملتها بنفسي
اول يوم ليا في الكلية كان في محاضرة تعريفية، البنت اللي طلعت تتكلم أول حاجه عملتها عشان تجننا شويه جابت بالونة و طلعت دبوس من الطرحه و دخلت الدبوس في البلونه و مفرقعتش ،
و بعدين دخلت الدبوس بشكل تاني فـ فرقعت ... قولنا اكيد فيه خُدعة ما ، بس الحقيقة مفيش أي خدعة
.
لو دخلت العود او الدبوس من جنب الفاتحة اللي بتنفخ منها البالون ، او دخلته من المنطقة اللي تحت اللي في مواجهة الفاتحة ، زي الصورة كده ، البالون مش هتفرقع ... طب ليه ؟؟
.
لأن المنطقة عند الفاتحة او عند أسفل البالون بتكون سميكة مقارنة بالجوانب .. بما انها سميكة يعني الروابط بين جزئيات مادة البالون مش بتكون مشدودة اوي يعني بتبقي براحتها و بالتالي بيبقي عندها مساحة انها تتمطع او تتفرد براحتها .. زي الاستك او السوسته اما تكون في وضعها الطبيعي بيكون عندها القدره انها تتمط او يحصلها ( استطالة - Elongation ) ، فاما بنيجي نأثر عليها بقوة ( قوة ضغط الدبوس او العود - Stress ) كل ذرة بتقول للي جنبها اتخري بس شويه او اتمطي عشان في دبوس رخم عايز يدخل وسطنا ..
و بالتالي الدبوس او العود بيخترق جزيئات مادة البالون من غير ما تتمزق و اكيد سُمك الدبوس بيكون قد الثقب بالظبط فمبيدخلش او يخرج هواء .. و يفضل ماشي لحد ما يخرج من الناحية التانيه بنفس الطريقة
.
بينما المنطقة عند جوانب البالون بتبقي مشدودة علي الآخر فبيكون سُمكها قليل .. ويعني الروابط بين الجزئيات بتكون مشدوده ع الاخر و يادوب بتتلكك عشان تتقطع اصلا .. فمجرد ما بتأثر عليها بقوة ضغط خلاص بتجيب آخرها و تتقطع فالبالونة تنفجر ..
بس متنفخش البالونة اوي عشان تفضل المنطقتين فوق و تحت سُمكهم أكبر و دخل العود براحه و يُفضل تدهن السن زيت او فازلين عشان يسهل من عملية الاختراق و يقلل الاحتكاك ، بس مش لازم انا عملتها من غير ما ادهن حاجه و نفعت
.
في حركة تانية، ممكن تجيب بالونة و تنفخها و تقربها من شمعة مولعة او عين بوتجاز هتفرقع علي طول صح
طيب روح املي البالونة دي مياة و قربها جدا من النار حتي لو قعدت فترة مش هتفرقع
طب ليه ؟؟ ..
ببساطة لان في الحالة الاولي البالونة ام سخت ، الهواء اللي جواها سخن بسرعة جدا و ضغط عليها فـ فرقعت .
انما في الحالة التانية البالونة اما سخت ، الحرارة هتنتقل للمياة اللي جواها و تفضل تسخن فيها ، و المياة طبعا حرارتها النوعية كبيرة يعني بتاخد وقعت كبير لحد ما تسخن، فالبالونة مش بتفرقع لانها بتنقل كل حرارتها للمياة و بتفضل حالتها مستقره
و دي حركتين كده ممكن تعملهم لو عايز تتقمص دور الساحر و تبهر ولاد أختك
كتبه :
أحمد عبد المنصف
