AD1
الرئيسية / المقالات /
4254 مشاهدة25 فبراير 2017

ليه بتحس بالوجع في صباعك بعد كل لسعة أو خبطه - STJEGYPT

ليه بتحس بالوجع في صباعك بعد كل لسعة أو خبطه - STJEGYPT

اما كنت بتلسع زمان من الكبريت كنت بعد اتأمل في صباعي كده و ابقي نفسي أعرف ايه اللي خلاني أحس بوجع ؟؟
كان نفسي ادخل بطريقه ما جوا جسمي العجيب ده اشوف ايه اللي بيحصل جواه عشان احس بالوجع ده و المسكنات اللي بناخدها ازاي بتخلينا منحسش بالوجع !...
و لذلكـ
اسمحلي اخد من وقتك دقيقتين و 433 ثانية و اخدك في رحلة ظريفة بسيطه جدا افرجك علي اللي بيحصل جواك اما بتتلسع او بتحس بوجع عموما من باب (و في أنفسكم أفلا تبصرون) 
أول ما النار تلمس جلدك .. الخلايا بتاعتك فورا تشغل اللمبه الحمره و السرينه تشتغل تحذيرر هجوم خارجي بكرر هجوم خارجي  ف خليه هتقول للتانيه هنتصرف ازاي دلوقتي ؟؟!! ف التانيه هتقولها : و دي عايزه كلام يا هبله لازم نفرز حالا حمض ( Arachidonic Acid )
مين ياختي ؟؟ .. انتي لسه هتسألي ، يالا بسرعه .. ف يفرزوا الحمض ده في الدم
الحمض ده بقي يعرف انزيمين صحابه من زمان و توأم ، اول ما ينزل في الدم لازم يقابلهم
انزيم اسمه ( cox-1 ) .. و اخوه التوأم اسمه ( cox-2 ) ... تمام
المهم الحمض ده يتفاعل مع الانزمين دول ... و من كتر الحب و الموده اللي بينهم تحسهم شخص واحد .. ايوا فعلاا اما بيتفاعلوا بيبقوا حاجه واحده اسمها ( Prostaglandine )
اهو البروستاجلاندين ده اما بيكون في الدم معناه ان في ضرر في المكان ده و اللمبه الحمره تنور .. طيب مين اللي هيشوف الاخ ده في الدم و يبلغ الدماغ بكده ؟؟
هنا يجي دور طيارات الهيليكوبتر الاستكشافيه اللي بتمشي في الدم تدور عليه
الطيارات دي عباره عن شبكه من الاعصاب المتخصصه اسمها ( nociceptors )
أول ما تشوف صاحبنا بروستاجلاندين في الدم تعرف علي طول ان في مصيبه ف تروح باعته مسج بـ 35 قرش أو إشاره كهربية للدماغ عن طريق اسلاك ، الاسلاك دي اسمها ( الخلايا العصبيه اللي ف الصوره دي ) .. الاسلاك دي يا سيدي واصله لحد المخ و النخاع الشوكي
في المخ في حاجه اسمها مستقبلات ألم اللي هي ال (inbox ) يعني  اول ما يوصلها الاشاره الكهربيه دي .. تترجمها في اوضه المعالجه ف تفهم ان ده ألم فتحس بيه
بس يا سيدي تخيل بقي ان الرحله دي كلها بتحصل في جزء من الثانيه
- طيب امال المسكنات دي بتعمل ايه بقي يا كبير في الرحله اللتشيفه دي
أنا سعيد انك سألتني السؤال ده  .. بص يا كبير
فرق مكافحه الالم اللي هي المسكنات دي نوعين .. في نوع خفيف بنستخدمه في حالات الالم اللي مش جامده اوي و دي بنسميها ( مسكنات غير أفيونية ) ..
أفيونيه مين ياعم انت مصطبح ولا ايه ... سبني اكمل يا ظريف :3
النوع الخفيف ده زي ال Asprine او Iboprofenn .. طيب ده بيعمل ايه ؟؟؟
ده كل الموضوع انه بيخلي الحمض ميتفاعلش مع الانزيمين .. اها بيفرق الراجل عن صحابه  بيدخل جوا الانزيم ف بيملي الفراغ اللي كان جواه ف يجي الحمض يخبط عشان يدخل جوا الانزيم يقوله كان علي عيني بس مفيش مكان والله  و بكده هيقطع الرحله السعيده اللي فوق دي ف مش هيتحولوا لـ بروستاجلاندين فالطياره مش هتقفشه ف مفيش اشارات هتتبعت فمش هنحس بالم
و النوع التاني و ده الجامبو ( المسكنات الأفيونية ) زي المورفين و الكودايين .
مورفين !! انا قولت انت مصطبح مصدقتنيش
شهرد عليك ، ده بقي بيستخدموه في حالات الالام المزمنه ، ده يا سيدي مبيفرقش صحاب و الكلام الفاضي ده ، ده بيروح علي الدماغ علي طول مبيضيعش وقت  .. سطو مسلح علي الدماغ فـ يحتلها و يدخل جوا شبكه المستقبلات اللي ف الدماغ و الحبل الشوكي ( ال inboxx اللي قولنا عليها ) و بكده يسيطر علي مراكز الألم في الدماغ .. من النهارده مفيش دماااغ .. انا الدمااااااااغ  فمش هيهمه الاشارات الكهربية اللي عماله تجيله وتحذره ان في الم ولا هيعالجها طبعا لانه هيعملها Deletee و بكده مش هنحس بحاجه و المسكن يعمل نسكافيه و يعد يشربه as a boss  .. سيطرنا ع الوجع بنجاح إلا قولي بقي ايه الزرار اللي هناك ده ؟؟ اها ده بتاع مركز البهجه .. طيب دوسلنا عليه بقي و زودهولنا عشان نتمزج 
و عشان كده خطر جداا اننا نستخدم المسكنات الافيونيه دي و صرفها لازم يبقي بروشته لانها بتصيب الانسان بالادمان و ده لانها بتاثر علي مراكز البهجه في الدماغ .. منا بقولك سطو مسلح

كتبه : أحمد عبد المنصف

Arachidonic Acid


Share

Suggestions

AD1

Back to Top