الرئيسية / المقالات /
6183 مشاهدة27 فبراير 2017

اعلان ناسا عن اكتشاف مجموعة شمسية جديدة - STJEGYPT

اعلان  ناسا عن اكتشاف مجموعة شمسية جديدة - STJEGYPT


أعلنت ناسا عن اكتشاف مجموعة شمسية جديدة تابعة لنجم يبتعد عنا 39 سنة ضوئية، النجم اسمه TRAPPIST-1، و حواليه 7 كواكب، لكن العجيب و الجديد و المفاجئ في الخبر، هوا ان من بين السبع كواكب دول ، فيه 3 في المنطقة الصالحة للحياة، خلينا هنا نوضح كام نقطة
1- الكواكب من النوع ده بتتصنف تحت عنوان "Exoplanet"، كواكب خارجية، يعني خارج المجموعة الشمسية, بيدورو حوالين قزم بارد جدا Ultra-cool dwarf في نفس كتلة الشمس تقريبا في كوكبة الدلو.
.
2- يعني ايه صالحة للحياة؟
يعني موجودة على مسافة من النجم ده بحيث ممكن الظروف تسمح بوجود حياة، زي الأرض مثلا، مش بعيدة فتتجمد و لا قريبة فتبقا باردة متجمدة
.
3- السؤال التقليدي: ازاي ناسا قدرت تصور كواكب على المسافة دي كلها ؟ التلسكوب كيبلر راح هناك ؟
.
لأ طبعا مستحيل يروح هناك، و مستحيل نصوره، لكن بنشوفه، مش بعنينا لكن بقوانين الفيزيا, خلينا نتخيل ان فيه لمبة منورة اصفر في وشك، قوم بقا عدينا بلية حديد قدام اللمبة دي، هتحس ان ضوء اللمبة قل شوية، هوا ده أحد التيكنيكات اللي بنكتشف بيها الكواكب دي، لما ضوء النجم يتغير بنمط معين يبقا فيه كوكب بيعدي من قدامه، من هنا مش بس بنعرف ان فيه كوكب، كمان بنعرف حجمه اللي بيتناسب مع كمية الضوء دي، و كذلك نصف قطر مداره لما الكوكب بيعدي قدام النجم مرتين ورا بعض مثلا
.
لذلك: الصورة اللي هتنتشر عن الكواكب ده تخيلية
.
إضافة : دي مش اول مجموعة كواكب نكتشفها بتدور حوالين نجم, لا فيه مئات, لكن ان 3 صالحة للحياة حوالين نفس النجم ؟ جديدة
و بعدين الفوايد كتير بالاضافة لاعطائنا قدرة اكبر على سبر اغوار المجهول و اعطاء ناسا قوة عظيمة ناعمة و غير ناعمة, على سبيل المثال لا الحصر ده ممكن يضيق دايرة بحثنا عن حياة عاقلة, كذلك بيعطينا فرصة أكبر لدراسة انظمة زي نظامنا , القوانين الفيزيائية مش بس بتمكنا من معرفة وجود الكوكب ده او لا, لكن كمان في بعض الاحيان ممكن تمكنا من معرفة لون الكوكب نفسه !
.
تخيل ازاي ممكن نعيش كبشر، مثلا، على تلات كواكب، كوكب بنها و كوكب منيا القمح و كوكب السنبلاوين مثلا :D :D
.
5- ممكن نسافر للكوكب ده؟
أه طبعا, بس هناخد حوالي 720 ألف سنة على ما المركبة توصل, لذلك خد أكل كفاية معاك و بامبرز علشان الولاد :D :D
علشان تعرف اكتر عن الاكتشاف شوف اللينك ده

Share

Suggestions

Back to Top