الرئيسية / المقالات /
18052 مشاهدة11 مارس 2017

السؤال الذي يراوض الكثير من المصريين - STJEGYPT

السؤال الذي يراوض الكثير من المصريين - STJEGYPT


مقال بتاريخ 20 يونيه 2016

سؤال لاقيته اتكرر  كتير الفتره الاخيره بعد ما الدولار بقي بـ 9 جنيه و ناس بتسأل بجد و مش فاهمه
ليه الحكومة متطبعش فلوس كتييير و كله يبقي غني بقي .. ايه المشكله ؟؟ 
طيب خلينا الأول نوضح القانون الرسمي لاي اقتصاد في العالم و هو قانون العرض و الطلب .. يعني ايه ؟
ايه اللي بيخلي الدهب غالي و عصير القصب رخيص ؟؟
ببساطه بسبب ( النُدرة ) .. يعني كمية الدهب اللي في السوق قليلة و نادره فالطلب عليه بيزيد و بالتالي سعره بيزيد .. انما القصب مرطرط في كل حته فالطلب عليه بيقل فـ سعره بيقل .. فلو حضرتك طبعت فلوس بزياده و رطرطت في السوق قيمتها هتقل
قيمتها بتقل ازاي يعني ؟؟ 
مش ساعات والدتك تقولك هي الدنيا حصل فيها ايه ؟؟ انا كنت زمااان بنزل السوق بـ 10 جنيه اجيب طبيخ و لحمه و رز و اخد الباقي و ارجع :D دلوقتي بنزل بـ 100 جنيه و تخلص في ساعتها البركه قلت :/
لا يا حجه البركه مقلتش ... امال ايه الموضوع ؟؟
الموضوع ان عدد سكان مصر زاااد و بالتالي بقي في افواه كتير جعاااانه :D فـ الطلب علي السلع بقي اكتر و انتاجنا للسلع زي ماهو و بالتالي السلع سعرها غلي :D و الاسعار اما غليت ، الـ 100 جنيه مبقتش تكفي ،
و ده بالظبط اللي هيحصل لو الحكومة طبعت فلوس كتير .. الناس هتبقي عايزه تشتري اكتررر فـ الطلب علي السلع هيبقي اكبر و بالتالي الاسعار هتزيد اكتررررر :D و ساعتها هتيجي الست الوالده تصوت في البيت تاااني و تقول هو فيه ايه ؟؟؟ انا بقيت اروح السوق بـ 1000 جنيه و بيخلصوا في ساعتها !! البركه قلت :/ .
يا حجه اقسم بالله البركه ما قلت
طب امال المفروض الحكومة تعمل ايه ؟؟
المفروض عشان تطبع فلوس زياده لازم تزود الانتاج عشان السلع تزيد ، و اما السلع تزيد و تبقي متاحه و مرطرطه في السوق سعرها مش هيزيد و كفه الميزان ساعتها هتتعدل
هقولك مثال تاني احلي 
عارف اما تبقي في مكان مفيهوش مواصلات خالص و الناس في المحطه عماله تزيد .. ساعه ، ساعتين و الناس تزيد و مفيش مواصلات بردو !!
فيجي سواق صايع يقف عند المحطه عشان يركب الناس ، ف امه لا اله الا الله هتهجم عليه .. ساعتها هو هيستغل الموقف و هيقولهم ، أحضرااااات عدم اللامؤخذه الاجره غليت و بقت بـ 10 جنيه ( و الاجره العاديه 2 جنيه مثلا ) .. ساعتها حد هيفتح بقه و يعترض ؟؟ اكيد لا كله هيبقي عايز يمشي و خلاص ..
ده بسبب ان العرض ( المواصلات يعني ) قل و الطلب ( الناس اللي علي المحطه ) زاد .. و بالتالي السعر بيزيد و دي بقي علماء الاقتصاء بيسموها ((( التضخم )))
يعني باختصار و في جمله واحده ( طباعة فلوس كتير بدون زيادة حقيقيه في الانتاج تؤدي للتضخم )
هقولك مثال اخير بسيط يوضحلك مشكله التضخم ده ..
لو احنا دلوقتي 10 اشخاص كل شخص في جيبه 10 جنيه و روحنا محل سندوتشات
لاقينا المحل فيه 10 ساندوتشات بس و سعر الساندوتش 10 جنيه .. تمام ؟
كده كل شخص مننا هيقدر يشتري ساندوتش واحد بس .. صح كده ؟؟
فالحكومة عشان قلبها رُهيف طبعتلنا 100 جنيه و ادت لكل واحد 10 جنيه زياده ، يالا ياعم شبرق نفسك  
كده كل واحد بقي في جيبه 20 جنيه صح كده ؟؟ .. و بالتالي هيقدر يشتري ساندوتشين مش ساندوتش واحد
و بكده احنا الـ 10 كل واحد فينا عايز يشتري ساندوتيش يعني كلنا كده كشلة بقينا عايزين 20 ساندوتش  
طيب و صاحب المحل عنده 10 ساندوتشات بس .. ساعتها هيعمل ايه ؟؟
هيروح شايل اليافته ام 10 جنيه و يحط يافته بـ 20 جنيه و يقولهم يا حضرات الساندوتش بقي بـ 20 جنيه 
و بالتالي احنا غصب عننا كل واحد بردوووو اشتري ساندوتش واحد
السؤال : هل الـ 100 جنيه بتاعه الحكومه نفعتنا بـحاجه ؟؟ .. لا بالعكس هي قللت قيمه ال10 جنيه اللي كانت في جيبنا مش اكتر .
و في سبب تاني و هو ان لكل عملة نقدية في ادينا بيبقي ليها مقابل دهب او فضه في البنك المركزي للدولة فمفيش دوله تقدر تطبع ورق نقدي مادام ملهوش مقابل من الدهب في خزينة البنك و إلا يبقي تزويير  ، فـ بدل ما تقول للحكومة تطبعلك فلوس كتير لازم الاول تقولها تزودلك الانتااااج بانها تفتح مصانع اكتر و فرص عمل اكتر و تعيد استغلال الموارد بتاعتنا المهدرة دي صح فـ الانتاج يزيد و ساعتها يقدروا يطبعوا فلوس اكتر 

كتبه : أحمد عبد المنصف

Share

Suggestions

Back to Top