من حوالي ثلاث سنوات بدأت تعلى اصوات بتقول ان الروبوتات حتاخد وظايف البشر
كتبه
تامر أحمدفي وظايف كثيرة كانت على قمة التهديد زي السائقين و عمال الشحن و التفريغ
الموضوع دلوقتي بقى أخطر بكثير
اللي في البلكونة يدخل بقى و يسيب ماتش الكورة و يسمع كلمتين مهمين
الروبوتات دلوقتي بقت بتهدد اساسيات الاقتصاد الحالي و خاصة في منطقة جنوب شرق أسيا اللي واضح انها و خلال سنتين بالكثير حتشهد اضطرابات مخيفة كنتيجة للتحول ده
من حوالي ٣٠ سنة بدأت النمور الاسيوية في الظهور و كان على رأسهم تايوان و سنغافورة و تبعتهم ماليزيا و اندونيسيا و مؤخراً انضم لهم فيتنام و كمبوديا و بنجلاديش
في الدول دي كان النمو الاقتصادي مبني على نظرية بسيطة و هي ان الايدي العاملة الرخيصة بتخلي الصناعات كثيفة العمالة قليلة التكنولوجيا تهاجر من الدول المتقدمة زي اليابان و كوريا و تروح للدول دي و اهم مثال على الصناعات اللي من النوع ده هو صناعة المنسوجات بانواعها، فوط و ملايات و تي شيرتات و جينز.
و حالياً بتقبع دول زي بنجلاديش و كمبوديا في قاع السلسلة دي و هم اللي بينتجوا المنسوجات دي لباقي اسيا و العالم كمان
ايدي عاملة رخيصة و شغالين طيب فين المشكلة ؟
المشكلة في الروبوتات
لأول مرة بدأت شركات ناشئة زي شركة اسمها softwear في امريكا تصنع و تبيع اول روبوتات بتعمل المنسوجات دي
طبعاً بتعمل كميات اكبر و بجودة اعلى بكثير من البشر علشان ده روبوت ما بيغلطش و لا بيحتاج اجازة و لا بيأكل و لا بيروح من المصنع
قاعد يومياً في المصنع و بينتج قد ٣٠ عامل في الوردية
و طبعاً تكلفة تشغيله هي الكهرباء بس يعني ما بياخدش مرتب و الكهرباء هي نفسها تقريباً اللي العمال بيستهلكوها مع ماكينات الخياطة التقليدية
طيب ده حيعمل ايه في البلاد دي ؟
يكفي اقولكم ان المسئولين في دولة من الدول دي اول ما اتعرض عليهم الرؤية دي لطموا بالبلدي و قالوا دي مصيبة، الناس كده حياكلونا
الروبوتات دي مش بس حترفد العمال دي حترفد بلاد بحالها(مصر من بينهم على فكرة و حاقولكم ليه)
الروبوتات دي بتنتجها مصانع امريكية و اوروبية و منطقي ان الامريكان و الاوروبيين و الصينيين حيشتروها و كده هما مش محتاجين يشغلوها في بلاد زي بنجلاديش و لا كمبوديا و لا مصر علشان. مافيش اي معنى اننا نشحن من الدول دي لبلادهم خلاص، نقطة الايدي العاملة الرخيصة انتهت و للأبد
حيحطوا الروبوتات في بلادهم و يخلوها تنتج المنسوجات و اي منتجات ثانية في بلاد الاستهلاك.
طيب حد عمل كده من الشركات الكبيرة؟
ايوه اديداس فعلياً نقلت مصنع ضخم من بنجلاديش لالمانيا و شغلته بالروببوتات و حيبدأ انتاجه السنة دي
التوفير في الشحن و مصاريف الانتاج كده رجع اوروبا و امريكا يبقوا منافسين لجنوب اسيا
طيب الفترة المتوقعة لكده أمتى؟
حسب المقالة سنتين بالكثير بس انا حأقول خمسة
خمسة سنين و حنلاقي مصانع اسيا بقت اطلال
حينتهي نموذج العمالة الرخيصة للأبد و ماحدش خلاص حيقدر يتبع نفس النموذج الصيني و لا نموذج النمور الاسيوية
طيب مصر، يكفي اقولكم ان حالياً احنا تقريباً اكبر مُصدر للفوط في العالم و عندنا مصانع كثيرة شغالة في المجال ده، مع الثورة التكنولوجية دي حنعاني كثير
رؤيتي للموضوع بتقول ان مش المنسوجات بس،كون الروبوتات وصلت للمنسوجات اللي هي من اكثر الصناعات اللي بتحتاج العامل البشري فده معناه معظم الصناعات خلاص جاية في الطريق.
طيب نعمل ايه في مصر ؟
مبدئياً كده نبتدي نخلى عن فكرة التصنيع التقليدي و اننا حنشغل ايدي عاملة كثير في مصر بمصانع بتصدر او حتى بتنتج لاستهلاك المحلي
انسى يا عمرو.
كدولة لازم نبتدي نفكر و نخطط و ننفذ لمرحلة ما بعد اكتساح الروبوتات للمصانع
انا هنا بافتح النقاش أي حد عنده حلول او مقترحات لمستقبلنا الاقتصادي في ظل التغيير الخطير ده!
ارجوكم خرجوا السياسة بره الموضوع
فكروا كما لو كانت انظف حكومة منتخبة ديمقراطية هي اللي بتحكم
للقراءة أكثر عن الموضوع من
هنا
