AD1
الرئيسية / المقالات /
121031 مشاهدة11 أغسطس 2017

كيفية استخدام موقع Coursera بالتفصيل - STJEGYPT

كيفية استخدام موقع Coursera  بالتفصيل - STJEGYPT


اولا: ايه هو Coursera ؟؟ ... هو عبارة عن موقع تعليمي من خلاله تقدر تاخد كورسات او كورس واحد فى اى مجال سواء كان فى الهندسة او اللغه او حتى الجوانب الانسانية والثقافات المختلفة.



---- 




ثانيا: أعمل Account عليه ازاى ؟؟ .... انت اول لما بتدخل على الموقع هتلاقى فوق على ايدك اليمين اختارين الاول هو Sign Up ده لو انت اول مرة تدخل تتعامل معاه ولسه هتعمل Account جديد وتعمل الـ password وتملى حبة بيانات كدة شخصية ليك ويسألك ايه هى المجالات اللى انت interested بيها .. والثانى هو Log In لو انت بالفعل عملت اكونت قبل كدة بتدخل الايميل بتاعك والـ password وتدخل عادى



----





ثالثا: ازاى اجيب الـ Course اللى انا عايزة ؟؟ ... هتلاقى عندك لما تدخل بعد كدة على الموقع فى search tool ممكن تكتب فيها الحاجة اللى انت بتدور عليها ممكن تلاقى كورس واحد بس وممكن تلاقى مجموعة كورسات تحت مسمي specialization أو ممكن تدخل جنب الـ search tool على حاجة اسمها catalog تختار منه الـ field او المجال بتاع الكورسات حيث لو مفيش حاجة محدده فى دماغك تلاقى مجموعة الكورسات دى ادامك فتقدر تختار اللى انت عايزة كأنك بالظبط واقف فى محل او سوبر ماركت وبتنقى اللى يعجبك.



----




رابعا: ازاى تعرف الـ level بتاع الكورس ؟؟ ... الاول level الكورس يعنى الدرجة بتاعته عامله ايه او بمعنى اخر المستوى بتاع الكورس هل اللى ياخده واحد مش عارف حاجة اى مبتدأ يعنى ولا واحد عنده خلفية شوية ولا واحد professional ... بتعرف الـ level بتاع الكورس من الـ bio بتاع الكورس بيكون مكتوب فيه اللغات بتاعت الكورس والمدة بتاعت الدراسه ومين هم الـ instructors وهكذا. 





فى حاجة بقى اسمها Course Syllabus ودى هى المحتوى بتاع الكورس يعنى الكورس كل week هتاخد فيه ايه وايه هى الحاجات اللى المفروض تعملها فيه وهكذا ... طيب انا لما بخلص الكورس ممكن اخد الشهادة بتاعته ؟؟ اه ممكن تاخدها بطريقتين ودى اللى هنتكلم عليها في النقطة "سابعا"





----



خامسا: ايه هو الـ specialization ؟؟ ... هو عبارة عن مجموعة من الكورسات مع بعضها بتديلك خلفية اكبر عن المجال اللى انت داخل تدرسه وطبعا معلومات كتير ... عامله بالظبط كأنك بتاخد مادة بس المادة دى متقسمه لكورسات جوه بعضها علشان توصل لـ level اللى هو انت خلاص بقى عندك كم من المعرفة لا بأس به فى المجال ده ... طيب هل ممكن اخد كورس واحد بس دلوقتى من مجموعة الكورسات دى واكمل الباقى بعدين ؟؟ ... اه ممكن جدا هتعمل الاتى بقى انت هتاخد اسم الكورس copy وتروح تعمله paste فى الـ search tool هيطلعلك الكورس لوحده ادخل فيه واعمل enroll.



----



سادسا: ازاى اسجل فى الكورس او اعمل enroll ؟؟ ... انت اول لما تدخل على الكورس اللى انت حابب تشتغل فيه هتلاقى على ايدك الشمال كدة مربع فيه كلمة Enroll اضغط عليه هيطلعلك مربع بيقولك فيه اختيارين ... الاول ان انت ممكن تجرب trial لمدة 7 ايام بس بيكون ليك full access لك حاجة فى الكورس واى كورس تانى وبعد ما الـ 7 ايام يخلصوا تدفع 49 دولار كل شهر علشان تفضل على موضوع الـ full access ده موجود ... الثانى ان انت تختار audit يعنى انت بتمسع الكورس بس وبتاخد المحتوى بتاعه بس انت لا ليك ان انت تقدم assignments ولا ليك شهادة ان انت خلصت الكورس.



----



سابعا: ازاى اخد الشهادة من Coursera ؟؟ ... عندك طريقتين .. الاولى ان لو انت مقتدر ومعاك المبلغ بتدفع من خلال الفيزا بتاعت النت او من خلال اى حاجة على حسب شروط طرق الدفع اللى الشركة شغاله بيها ... ثانيا ان انت تعمل Financial Aid ومن هنا بيكون ليك حق ان انت تحل كل الـ assignments بس الشهادة اللى بتطلع فى الاخر بيكون عليها اسمك واسم الكورس والجامعة اللى انت اخدتها منها وامضاء الدكتور ((ومش بيكون فيها انت جايب كام فى المية فى الكورس)) وتحت على اليمين كدة بيكون فى كود للشهادة وده حاجة مهمة جدا جدا اللى من خلالها بيعرف الشخص بتاع الـ HR لما بيتواصل مع Coursera انت فعلا واخد الكورس ده ولا انت ضارب الشهادة .. لو الكود اللى موجود هناك هو نفس الكود اللى على شهادتك وبنفس اسم الشخص خلاص فأنت تمام انما لو الكود بأسم حد فأنت هتسيب لنفسك اثر مش كويس فى المنحة او الشغل اللى انت بتقدم عليه.



----



ثامنا: ايه هو الـ Financial Aid وازاى يتعمل ؟؟ ... هو عبارة عن مساعده ماليه انت بتحتاجها علشان تاخد الشهادة زى ما قولنا فى النقطة سابعا .. انت لما بتدخل على الكورس زى ما قولنا انت مش هتقدر تقدم الـ Assignment الا فى حاله من 2 اذا كنت اشتريت الكورس او عامل الـ FA. 



لما بتدخل على الصفحه الاولى قبل ما تعمل enroll ... تحت المربع الكبير اللى موجود فيه Enroll هتلاقى كلام صغير كدة مكتوب اسمه "Financial Aid is available for learners who cannot afford the fee. Learn more and apply." هتدخل على learn and apply هيفتحلك مربع صغير اختار منه Continue to the application هياخدك للصفحة بتاعت الـ Financial Aid Application هتعمل على الثلاث مربعات اللى موجودين صح اى هتختارهم والكلمة اللى فى الاخر اللى هى I agree to the terms above تاخدها زى ما هى copy فى المربع اللى فوقيها وهتلاقى كلمة Continue فتحت فتضغط عليها هياخدك لـ application واللى من خلاله بتجاوب على اسئله اللى من خلال اجابتك بيتقيم هل انت فعلا محتاج المنحة الماليه دى ولا لأ. 




الاسئلة بتكون عبارة عن الاتى: 1- هتختار فى اول مربع انت طالب ولا خريج ولا حالك ايه ... المربع اللى جنبه بيقولك متوسط الدخل القومى بتاعك كام هتكتب 0 المربع الثالث هتختار برضو الحاجة اللى تناسبك منه على حسب وضعك ... المربع الرابع بيسألك انت ممكن تقدر تدفع كام اكتب فيها 0 او لو قادر تدفع مبلغ صغير اكتبه سواء كان انت قادر تدفع المبلغ ده كل كورس ولا كل شهر بس فى الغالب الناس بتعمله صفر وبتريح دماغها. 




2- Why are you applying for Financial Aid ؟ فى المربع ده انت ليه عاوز المنحه الماليه دى ومحتاج منك 150 كلمة ولو دخلت اقل من الـ 150 كلمة هيرفض انه يقدم الـ application بتاعك ... طيب اكتب ايه واعرف منين انهم 150 كلمة ؟؟ ... اكتب كل حاجة عن نفسك وعن والدك وعن والدتك وعن مرتبهم فى السنه متوسطه كام بالدولار وعن اخواتك انتم كام اخ وكل واحد بيدرس ازاى وكل واحد مين شغال مثلا ومتجوز وانت فعلا لو اخدت المنحه الماليه دى هتغيرك ازاى والكلام ده هتلاقى نفسك عديت الـ 300 مش الـ 150 بس ... تعرف منين بقى من خلال الـ word اكتبهم على الـ Word وحددهم وشوفهم بقوا كام كلمة ومتعملش مسطرة كتير ونقط كتير علشان تملى الـ 150 ده غلط عليك. 




3- How will taking this course help you achieve your career goals؟ فى المربع ده بيسألك ازاى الكورس ده هيساعدك ان انت توصل الاهداف بتاعتك فى حياتك ومحتاج منك 150 كلمة برضو .. اتكلم فى الجزء ده عن ازاى الكورس ده مهم ليك وازاى انت هتستفيد منه اتكلم عليه من الناحية الـ technical واتكلم عليه كمان من الناحية ان انت بتتعرف من خلاله على ناس وعلى ثقافات تانية وهكذا. 




4- Would you consider using a low-interest loan to pay for your courses؟ If you answered no, please help us understand why. 





فى الجزء ده بيقولك انت ممكن تاخد قرض قصير الاجل وبفايدة صغيرة هل توافق على حاجة زى دى اه ولا لأ ولو قولت لا قولنا ليه ... هنا انت بتقوله لأ وان السبب ان زى ما انت ذكرت فى السؤال الاول انه الدخل السنوى ليا ولوالدى ولوالدتى صغير وميكفيش ان انا اعمل قرض حتى ولو بفايدة بسيطة. 





اعمل للاجابات دى عندك على الجهاز save لان انت هتستخدمها فى كل مرة هتعمل financial aid وممكن تاخد نفس الاجابات هى هى فى كل مرة لو انت شغال فى specialization لكل كورس على حدة. 





خلال الفترة 15 يوم اللى هم شغالين فيها بيراجعوا الـ application بتاعك وبيبعتولك على الميل هل انت اتقبلت ولا لأ .. لما بتتقبل بتقدر تدخل تحل الـ assignments علشان تقدر تاخد الشهادة ... فى خلال الـ 15 يوم دول انت ممكن تدخل تذاكر وتاخد المحتوى عااادى جداااا ويبقى اللى فاضل بس ان انت تقدم الـ assignments. 





----





أخيرا ID Verification: هو عبارة عن تأكيد ان انت فعلا الشخص اللى بياخد الكورس لان ممكن يكون فى accounts تانيه بنفس الاسم فاللى بيفرق بينكم هم الموضوع ده وبيتم على 3 مراحل .. الاولى بترفع صورة من البطاقة او كارنيه الكلية او جواز السفر او الرخصة بتاعت العربية هكذا وتنتظر حبه هياخدك على النقطة التانيه وهى الصورة ممكن ترفع صورة لنفسك او تفتح الكاميرا بتاعت اللاب وتاخد صورة منها تأكد انه انت .. المرحلة الثاثلة وهى ان انت بتأكد الاسم وتاريخ الميلاد ... وبكدة يكون الخطوات بتاعت التأكيد تمت بكل نجاح وهو بيبلغك بالموضوع ده ... الموضوع بتاع الـ Verification مهم جدا لانه مش بتستلم الشهادة الا لما بتكون عامله وهو بيتعمل مرة واحده بس للأكونت الواحد.





----------





اعتقد كدة دى كل حاجة عن Coursera واللى حابب يسأل على اى حاجة تانية لم يتم ذكرها يسأل ... وبالتوفيق للجميع.





 





كاتب المقال | اسلام عادل

Coursera


Share

Suggestions






Popular Summer Training


Popular ScholarShips


Back to Top