الرئيسية / المقالات /
5513 مشاهدة17 مايو 2018

وحوي يا وحوي | كلمة تعود أصلها للفراعنه ,, ما السر - STJEGYPT

وحوي يا وحوي | كلمة تعود أصلها للفراعنه ,, ما السر - STJEGYPT


كل سنة وأنتوا طيبين بمناسبة الشهر الكريم

طبعا اغاني رمضان مالية الشوارع والبيوت وخصوصا اغنية "وحوي ياوحوي" اللي اتربينا عليها من صغرنا وبنغنيها كل رمضان..طب تعرفوا ان كلمة وحوي اصلا كلمة فرعونية ومرتبطة بقصة حلوة كدة من عهد الاسرة السابعة عشر من الاسر الفرعونية؟؟

تعالوا نحكيها سوا..في نهاية الاسرة السابعة عشر كان الهكسوس بيهجموا علي اراضي مصر..والهكسوس هم قبائل بدوية من اصول آسيوية..وكان وقتها حاكم مصر هو الملك "سقنن رع" اللي فني حياته في محاربة الهكسوس ومات اثناء معركته ضدهم.

زوجة سقنن رع هي الملكة "اياح حتب" وهي ملكة عظيمة من ملوك مصر وكمان تعتبر اول ملكة مصرية تقعد علي عرش مصر..قدمت الملكة "اياح حتب" زوجها وابنائها فدائا لارض مصر..جوزها اتقتل وكمان ابنها "كاموس" وهما بيدافعوا عن ارضهم.

بعد مقتل جوزها وابنها اقسمت الملكة "اياح حتب" انها تنتقم من الهكسوس شر انتقام..فقدمت ابنها "احمس" ليقود جيش مصر ويحارب الهكسوس وبالفعل انتصروا علي الهكسوس.

وفي طريق عودتهم وهما منتصرين خرج الشعب المصري يحيهم وهو بيقول عبارته المشهورة "واح واح اياح" بمعني تعيش تعيش اياح..وكمان معني اسم "اياح" في اللغة الفرعونية القديمة هو "ولد القمر او الهلال".

وكان المصريون بيرددوا العبارة دي كل شهر لما بيظهر القمر هلال..وثم اتحرفت الكلمة لتصبح "وحوي ياوحوي اياحا".

وفيه بعض المؤرخين ان عبارة "وحوي ياوحوي اياحا" ترجع للغة القبطية بمعني "وحوي" وهو اقتربوا و"اياحا" يعني الهلال..ومعني الجملة "اقتربوا لرؤية الهلال".

سواء اختلفت اراء المؤرخين او تشابهت منقدرش ننكر ان وحوي ياوحوي ترجع لاصول مصرية قديمة وكل سنة وانتوا طيبين ورمضان كريم عليكم السنة دي

كتبه | أميمة عبد المنعم

Share

Suggestions

Back to Top