الرئيسية / المقالات /
15702 مشاهدة19 يونيو 2018

الدليل الشامل للحصول علي المنح في جميع التخصصات في مختلف الجامعات - STJEGYPT

الدليل الشامل للحصول علي المنح في جميع التخصصات في مختلف الجامعات - STJEGYPT


اي منحه في العالم ليها معايير قبول .. يعني ايه معاييز قبول ؟

يعني الجامعه او المؤسسه اللي بتقدم المنحه دي عايزة تشوف فيك كام شرط وكام ميزة تكون متواجدة فيك عشان توافق عليك انها تديلك المنحه
.

معاييز القبول 4 ثوابت في اي منحه في الدنيا :

1- درجاتك وتقديراتك اللي بنسميها GPA

2- التطوع والأنشطة الطلابيه بتاعتك

3- الخطاب الشخصي بتاعك اللي بتشرح فيه مميزاتك ومؤهلاتك

4- خطابات التوصية من الدكاتره بتوعك في الجامعه اللي بيمدحوا فيك وفي مهاراتك

------------------------------------------------------
لكن الاول ايه هي انواع المنح اللي بتبقي متقدمه ؟؟

المنح عموما ك category عام بتنقسم ل 2 sub class :

1- منح اكاديميه في التخصصات المباشره
2- انترشيب مجاني او تبادل طلابي ثقافي
.

المنح الاكاديميه بتكون عايزة حد دحيح ف الثانويه او في الجامعه او في الماجستير وجايب درجات عاليه .. يعني حد يكون متفوق علميا واكاديميا

ومش شرط يكون مقطع السمكه وديلها في التطوع والقياده ..
.

الانترشيب او التبادل الطلابي بتكون بتعتمد في المقام الاول علي ان المتقدم يكون مطرقع وبيروح ويجي ويشترك في مسابقات ويشعلق بنات وبيعمل انشطه وبتاع ..

ومش بتهتم بالدرجات والتقديرات بصورة كبيره
--------------------------------------------------

ليه مبحصلش علي المنح ؟

1- البحث الغلط

معندكش منحه يا ابو حميد لتخصص فلان ؟ ابني وحيد مشربش عندك برتقال ؟

صدقني حتي لو بتكلم احمد زويل شخصيا لازم انت اللي تدور بنفسك لان محدش عارف كل ال 500 مليون جامعه حول العالم بكل ال 100 مليون تخصص ودراسه حولين العالم بكل ال 300 مليون برنامج منحه وتبادل طلابي بتتقدم !
.

دورت وملقيتش اعمل ايه يعني ؟
.

وهنا تسمع صوت الست الوالدة لما شرابك يضيع وهي تقولك ( طب ولو خشيت اجبهولك من جوة؟ )

مهو اصل لو انت دورت وملقيتش وجيت سألت حد وهو جابلك اللي بتدور عليه .. دة ملوش غير معني واحد بس يأما انت دورت غلط يا مدورتش اساسا
.

لو دورت غلط يبقي اتعلم إزاي تبحث وتدور صح .. اتعلم ازاي تدور علي منحه

كلمه منحه يعني scholarship .. انت مثلا عايز منحه في اداره الاعمال في جامعه في انجلترا
.

يبقي هتكتب كدة Scholarships in MBA In UK
وهيطلعلك كل الجامعات اللي بتعرض المنح في اداره الاعمال في انجلترا
.

يعني خطوات البحث الصحيحه علي المنحه .. تحدد التخصص .. تحدد اسم الدوله اللي عايز تدرس فيها .. تكتب كلمه scholarship قبل الجمله بتاعتك وتعمل سيرش وعيش يا معلم
------------------------------------------------

2- الجاهزيه

لازم تكون جاهز للمنحه دي .. مستعد و مرقد ليها ونايم وفايق كويس اوي عشان لما تيجي الفرصه تاخدها

* اول عنصر من عناصر الجاهزيه هو الانجليزي :

لازم يكون عندك انجلش قوي .. عشان تدخل في المواقع وتقرأ الشروط بنفسك .. تفهم مطلوب ايه منك بالظبط .. عشان تراسل الجامعه بالايميلات بنفسك .. عشان هتعمل انترفيو معاهم بالانجلش بنفسك.. عشان تقدر تكتب وتعبر صح عن نفسك في الخطاب الشخصي
.

والانجلش القوي هنا يعني بتعرف تقرأ وتكتب وتتحدث بيه كويس .. مش تكون حافظ جملتين من فيلم في MBC2 و fuck your mother و bullshit

أو تكون حافظلك كلمتين في اغنيه ل جنيفير لوبيز وكدة تبقي معتبر نفسك شاطر ف الانجلش !

ومعظم المنح بتطلب شهادة اجادة اللغه الانجليزيه اللي هي يا ايلتس يا تويفل يا سات ..

.----------------------------------------------------------------

* ثاني عنصر للحصول على منحة من عناصر الجاهزيه هي معرفه متطلبات المنحه :

يعني رحم الله امرئ عرف قدر نفسه

لازم تعرف مؤهلك ودرجاتك مناسبه للمنحة ولا لأ

وهل شروط المنحه منطبقه عليك ولا لأ

يعني متبقاش بتدور علي منحه في انجلترا لتخصص الهندسه النوويه وانت جايب مقبول ف كليتك
صدقني مش هتتقبل وبتضيع وقتك في الاتجاه الغلط
.

او تكون الكليه او الجامعه طالبه مثلا حد ادني من الدرجات GPA تكون 4 مثلا وانت تكون جايب 2 وتقول ما اقدم وانا هخسر ايه ما يمكن ليا فيها نصيب
لا مش هيكون ليك نصيب فيها عشان مخدتش بالاسباب وبتعافر في السكه الغلط
.

او تكون الجماعه طالبه يكون اشتغلت 4 سنين عمل تطوعي ويكون عندك شهادة بيهم وانت تقدم من غير ما يكون عندك ولو شهر حتي عمل تطوعي !
.

اعرف قدراتك وامكانياتك وعلي اساسها هتعرف تلاقي منحه مناسبه
.--------------------------------------------------------------

* ثالث عنصر للحصول على منحة هو : التدريب علي مراسله الجامعات ومواقع المنح :

متاخدش اي منحه مشهورة الناس بتعلن عنها علي انها الفرصه الاخيره في حياتك وخلاص لو مخدتهاش من اول مرة هتموت

لا .. خدها علي انها زي اي حاجه بتعملها لاول مرة في حياتك
.

هل لما عملت اكونت ع فيسبوك لاول مرة كنت بتفهم فيه زي دلوقتي لما عرفت يعني ايه لايف و سناب شات و اكونت صراحه وبتاع ؟؟

اكيد لا .. كانت خبرتك فيه قليله جدا جدا لكن من كتر ما قعدت علي الفيسبوك بقيت خبره فيه اكثر من مارك شخصيا
.

كذلك المنح .. ادخل ع اليوتيوب .. شوف فيديوهات مرفوعه عن ازاي تراسل الجامعات .. وادخل علي جوجل بعدها اختار اي منحه عشوائي كأنك بتلعب وروح اتدرب راسل الجامعات دي
.

مرة اولي هتغلط .. مرة تانيه هتغلط .. مرة تالته هتغلط .. مرة رابعه هتلاقي حد رد عليك .. مرة خامسه هتلاقي حد بيراسلك .. لغايه لما في يوم هترشق معاك وتعرف ايه الاخطاء ال بتعملها وبتخليهم ميردوش عليك وتعرف وقتها ازاي تصيع عليهم في المراسلات وتخليهم يردوا من اول مرة

.-------------------------------------------------------------

* رابع عنصر للحصول على منحة هو : تنظيم افكارك وتعرف المسؤلين علي المنحه ليه انت تستحق المنحه

يعني وانت بتكتب خطاب شخصي عن نفسك وعن حياتك وعن مهاراتك متكتبش حاجات تحسسهم انك هالك هوجن و مجدي يعقوب ونبويه موسي مضروبين في الخلاط

اتكلم ببساطه عن احلامك وطموحاتك بعد الحصول ع المنحه .. عن الحاجات اللي فيك شايفها هتفيد الجامعه المانحه دي .. اتكلم ببساطه وباختصار وبدقه

ودي مش هتيجي الا بالتدريب .. يعني لازم تعرف ممكن تقعد سنين علي ما تعرف تظبط المهاره دي وعلي ما تتقبل في منحه معينه في تخصصك

.---------------------------------------------------------

* خامس عنصر للحصول على منحة : عدم الاعتماد علي الاخرين في كل شئ

يعني بلاش حوار ينفع تقدملي ؟ ينفع تكتبلي خطاب تحفيزي ؟ ينفع تقرالي شروط المنحه ؟
.

عشان انت ممكن تظبط ورقك كويس اوي اوي لكن يوم الانترفيو تعك عك السنين وتترفض بسبب ان مش انت اللي كتبت بايدك .. مش انت اللي فهمت شروط المنحه بنفسك .. مش انت اللي عارف ايه اللي اتكتب وايه اللي اتعمل ..

وناس كتير جدا بتدفع فلوس لناس عشان يظبطولها كل حاجه في الورق وتيجي في الانترفيو تقلب بطه بلدي وتترفض

-----------------------------------------------------------
المنح زي اي شئ ف الحياه .. عايزة تعب .. هتتعب هتلاقي .. مش هتتعب مش هتلاقي

كتبه | أحمد محمد

Share

Suggestions

Back to Top