- لو كنت فاكر إن الصح في قضاء الصلوات إنك تقضي كل صلاة مع إلي زيها في اليوم إلي بعده أحب أبشرك إن المعلومة دي مش صحيحة .
تعالي نعرف مع بعض الصح إى من خلال نقطتين
النقطة الأولي لو فاتت منك صلاة تقضيها إمتي ؟
ـــــــــــــــــــــــــــــــــــــــــــــــــــــــــــــــــــــــــــــــــــــ
الخطأ الشائع هنا إنك تقضيها مع الصلاة إلي زيها في اليوم التاني .
الصحيح إنك بتقضيها أول ما تفوتك أو أول ما يدخل وقت الصلاة إلي بعدها .
مثال واحد فاتته صلاة الفجر ( الصبح ) لسببٍ ما وليكن لنومه إلى دخول وقت الظهر لما يجي يصلي ( الصحيح ) إنه يصلي الفجر ( الصبح ) ثم يصلي الظهر , ( الخطأ هنا ) أنه يصلي الظهر بس ويسيب صلاة الصبح لإعتقاده إن الصح في إنه يصليها مع فجر اليوم إلى بعده .
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
تنبيه بسيط الترتيب بين الفوائت أرجح و أولي و أحوط بمعني إنك تصلى الظهر قبل العصر والعصر قبل المغرب وهكذا
- وده العموم إلا في حاله واحدة وهيا دي النقطة التانية إلى هنتكلم عنها .
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
النقطة الثانية لو فات منك أكتر من فرض وقرب وقت الفرض الحاضر على الإنتهاء تعمل إى ؟
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الخطـأ الشـائع هنا إنك تقضي الفوائت مع الصلوات إلي زيها في اليوم التاني وتصلى الحاضر بس قبل خروج الوقت .
وهنا في خطأ تاني مرتبط بالتنبيه إلى فوق ( الترتيب ) إنك تصلى الفوائت بالترتيب ويكون أخر صلاة تصليها إلي هيا الفرض الحاضر إلي قرب وقته على الإنتهاء .
- في النقطة دي هنقول المثال الأول بعد كده نقول الصحيح .
المثــال واحد فاتته صلاة العصر وخرج وقتها ( يعني أذنت المغرب ) لسبب ما ودخل وقت المغرب وفاضل خمس دقايق على آذان العشاء فالصح إنه يعمل إي ؟
الصـحـيـح إنه يصلى المغرب الأول قبل خروج وقتها بعد كده يقضي صلاة العصر ( يصليها يعني ) بعد كده يصلي العشاء .
نلاحظ إي هنا إننا معتبرناش ترتيب الصلوات لإننا صلينا المغرب قبل العصر وده لسبب معين
السبب إن بإعتبار الترتيب في الحالة دي الشخص ده هيصلي العصر بعد كده هتأذن العشاء لأن الوقت الباقي صغير مش هيكفي الصلاتين مع بعض فتبقي صلاة المغرب خرجت عن وقتها وبقت قضاء زيها زي صلاة العصر فيبقي في الحالة دي الصلاتين قضاء, إنما لما تبدأ بالمغرب إلى هو وقتها خلاص فاضل خمس دقائق ويدخل وقت العشاء تبقي صلتها في وقتها أداءً بعد كده تصلي العصر بعد كده العشاء فيبقي صليت صلاة واحده بس قضاء وصلاتين أداء وده طبعاً الأحسن والأولي .
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
- سبحانك اللهم وبحمدك أشهد أن لا إله إلا أنت أستغفرك وأتوب إليك
كتبــه
يوسف محمد
