الرئيسية / المقالات /
13530 مشاهدة09 نوفمبر 2018

ملخص و تحميل كتاب | لغات الحب الخمس | جارى تشابمان - STJEGYPT

ملخص و تحميل كتاب | لغات الحب الخمس | جارى تشابمان - STJEGYPT


كتاب لغات الحب الخمسة تأكدوا إنه كفيل إنه يغير حياتكم تماما سواء كنتم متجورين٬ بتفكروا في الجواز٬ أو حتى مش عايزين تتجوزوا٬ الكتاب ببساطة هيسهل تعاملكم مع أي حد نفسكم يكون بينكم وبينه لغة حب مشتركة٬ فعلا الكتاب له مفعول السحر
ملخص و تحميل كتاب | لغات الحب الخمس | جارى تشابمان
(The 5 Love Languages)
لإستشاري العلاقات الزوجية الأشهر في أمريكا د.جاري تشابمان (Garry Chapman) ٬

الكتاب ده إتباع من النسخة الإنجليزية منه ٨ مليون نسخة, وإترجم لـ ٣٩ لغة غير الإنجليزية٬ وغير حياة ملايين من الأزواج في العالم ٬ أما الأزواج اللي طبقوا مبادئ الكتاب فدايما بيقولوا إن: الكتاب ده بيعمل سحر ويصلح الحياة الزوجية مهما كانت معقدة ..

د. تشابمان كتب الكتاب دا بعد ٣٩ سنة عملها كإستشاري علاقات زوجية٬ قدر فيها يعمل معجزات في صناعة الحب بين أكتر الأزواج كرها لبعض وكرها للحياة٬ بإنه يحط طريقة حقيقية لإيجاد الحب بين الزوجين

د. تشابمن حط نظرية بناء على آلاف الأزواج اللي قابلهم٬ وهي إن في خمس لغات للحب٬ وإن كل شخص بيكون له "لغة حب معينة”٬ لو الزوج أو الزوجه قدموا للشخص ده الحب باللغة اللي يفهمها حياتهم هاتكون حياة سعيدة جدا ومليئة بالحب

**في نهاية البوست لينك لـ “كويز” مكون من ٣٠ سؤال٬ هيساعدكم تعرفوا أنتم بتتكلموا أي لغة من لغات الحب الخمسة٬ و إيه هي أولوياتكم في أختيار شريك حياتكم***

د. تشابمان وضح في الكتاب إن كل شخص بيكون عند "تانك للحب”٬ زي تانك البنزين بتاع العربية بالظبط. وعلشان الشخص يقدر يعيش حياة سعيدة, لازم تانك الحب بتاعه يكون مليان

لو إنت أو إنتي سيبتوا تانك الحب بتاع شريك حياتكم يفضى٬ هايعمل زي العربية اللي تانك البنزين بتاعها فاضي٬ مش هاتمشي

وطالما تانك الحب زي تانك البنزين العربية, ماينفعش تملاه مرة في العمر وتتوقع إنه يفضل يلف بيك طول العمر٬ لازم يتملى بإستمرار.

الطريقة بقى اللي بيتملى بيها تانك البنزين ده هو محور الكتاب كله٬ إن كل شخص بيكون عنده لغة أساسية ولغة ثانوية من خمس لغات للحب

الزوج : أنا مراتي مفيش حاجة بعملها بترضيها أو تسعدها أبدا… بالعكس… مهما عملت علشان أرضيها… مش ممكن أبدا تسيبنا نفرح بشتغل وبموت نفسي في الشغل بجتهد علشان أحل مشاكلي في الشغل وأجيب فلوس علشان أوفر مصاريف البيت مفيش كلمة شكر… وحتى ال ساعة اللي بحاول أرتاحها مع أصحابي برة… بتطلعها على عيني لما أروح مع إني بموت نفسي علشان أسعدها … بس تقول إيه !!

زوجتة: أنا بموت نفسي في البيت مع الأولاد, من الساعة ٦ الصبح تحضير للمدارسة وبنزل شغل وأرجع أطبخ وأذاكر مع الأولاد وغسيل وترتيب البيت دي مش حياة أبدا وكل ده, ولا كلمة شكر واحدة… ولا إحساس بالمسؤلية اللي مرمية عليا… في ناس مش بيتمر فيها إن الواحد يموت نفسه علشانها أنا لو كنت واحدة نكدية… كنت عرفت أرتاح وآخد حقي في الحياة… بس تقول إيه!

القصة دي ممكن تسمعها مليون مرة من زوج وزوجة٬ بتفاصيل مختلفة٬ بس بيكون نفس المحور٬ الزوج بيعمل كل حاجة هو شايف إنها المفروض تسعد زوجته وبدل ما تشكره مش طايقة الحياة معاه٬ و الزوجة بتموت نفسها علشان بيتها وعلشان تسعد زوجها٬ وبدل ما يساعدها ويشكرها بيشتكي منها. المشكلة إن كل واحد فيهم بيتكلم لغة حب مختلفة عن التاني.

طيب… إيه هي اللغات دي وإزاي نتعلمها؟

لغة الحب الأولى: كلمات التشجيع والثناء
Words of Affirmation
ـــــــــــــــــــــــــــــــــــــــــــــــــــــــــــــــ
إنك تختار إنك تقول لزوجتك: ربنا يكون في عونك على إجتهادك في البيت ومع الأولاد
إنك تختاري إنك تقولي لزوجك: ربنا يعينك على إجتهادك في الشغل
لما زوجتك تعمل أي حاجة حلوة حتى لو بسيطة, تختار إنك تلاحظها وتشكرها عليها
ولما زوجك يعمل أي حاجة حلوة, تشجيعه بكلمة شكر وتشجيع عليها
ولما تشكر في زوجتك أمام أولادكم و باباها ومامتها وأخواتها٬ ولما إنتي تعملي نفس الحكاية مع زوجك٬ فرق الحياة بيكون زي الفرق بين السما والأرض, لما نتعلم لغة الحب الأولى: كلمات التشجيع والثناء

الجميل جدا إن دي من أسهل لغات الحب إن الواحد يتعلمها
ببساطة, أي حاجة بتقولها وأي طلب بتطلبه … ممكن يطلع منك على صيغة الطلب, أو صيغة الأمر والتسلط
حاجة بسيطة بتطلبها من زوجتك زي طبق أكل معين بتحبه
ممكن تقولها: الله على طبق المكرونة اللي إنتي بتعمليه ده… مفيش حد بيعمله زيك.. فعلا نفسي أستمتع بطبق من ده بإيدك
وممكن تقول: ماتقومي تعمليلنا أكل… الواحد طالع عينه طول اليوم, وإنتي قاعدة في البيت كده مش حاسه بالواحد… إعملي مكرونة وخلاص

طريقتين للطلب٬ طريقة بتشحن تانك الحب بتاع الزوجة وتخليها كمان تتشجع إنها تلبي طلبك
وطريقة تانية تدل على إنك مش ذكي٬ بتكسر سعادة الإنسان اللي قدامك

لغة الحب الثانية تكريس الوقت وقضاء الأوقات سويا
Quality Time
ـــــــــــــــــــــــــــــــــــــــــــــــــــــــــــــــــــــــــــــــ
– بالنسبة لبعض الأزواج و الزوجات, إنهم يقضوا وقت حقيقي مع أزواجهم يعملوا فيه حاجة مشتركة… هي دي اللحظة اللي بيحسوا فيها بالحب

ده بالظبط عكس لو الزوج قاعد بيتفرج على ماتش مراته ماعندهاش أي إهتمام بيه
أو زوجة بتتفرج على مسلسل زوجها ماعندوش أي إهتمام بيه
أو كل واحد فيهم ماسك الموبايل بتاعه وعايش في كوكب لواحده

لو أحد الزوجين, اللحظة اللي بيحس فيها بالحب… هي قضاء وقت حقيقي مع الزوج أو الزوجة… يبقى لازم نتعلم إزاي نقضي وقت مع بعض
– ممكن يكون أي إهتمام مشترك الزوجين يحاولوا يتعلموه مع بعض
– ممكن يقفوا في المطبخ يطبخوا مع بعض
– ممكن يقعدوا يشربوا شاي في البلكونة
– أي حاجة مهما كانت – يشترك فيها الزوجين في عمل حاجة مشتركة… لو دي كانت أحد لغات الحب للزوجين

لغة الحب الثالثة: تقديم الهدايا
Receiving Gifts
ـــــــــــــــــــــــــــــــــــــــــــ
– بعض الأزواج… مش بيحس بقيمته عند الزوج أو الزوجة, إلا لما الشخص الأخر يجتهد في إنه يختار ويقدم له هدية
لو أحد الزوجين… بيحس بالحب… وتانك الحب بتاعه بيتملى بالهدية… يبقى دي من أهم لغات الحب اللي الطرف الآخر لازم يتعلمها
– الهدية ممكن تكون عبارة عن ورقة مكتوب فيها كلمة حب وتقدير وشكر وثناء
و ممكن تكون حاجة الزوج أو الزوجة محتاجينها
و ممكن تكون حاجة هما بيحبوها
تنوع الهدايا بين الثمين في الثمن (حسب القدرة طبعا)… والثمين في الرومانسية (زي وردة, كلمة جميلة في كارت… وخلافه)… بيضمن إن تانك الحب يكون مليان دايما
لو جبت أغلى هدية في الدنيا من شهرين… تانك الحب هايحتاج يتملى تاني برضه… حتى لو بهدية بسيطة بعد شهر أو أقل

نصيحتين مهمين جدا:
١- لو إنت جبت خاتم غالي لمراتك… وكانت لغة الحب اللي هي بتحسها هي الهداية… يبقى ماتفتكرش إنها هاتعيش بالخاتم ده تحس بالحب طول العمر
تانك الحب بيقل… لازم تجيب هدية كل فترة… مش هدية غالية خالص… بس ماتعيش طول العمر تفتكر الخاتم اللي إنت إشتريته لها هدية سنة ٧٢
٢- طقم التيفال اللي إنت إشتريته لمراتك في عيد الأم… دي مش هدية حب خالص… دي مواعين زيادة على مراتك … هاتتطبخ فيهم لكم إنتوا

إختار هدية تحسس اللي أدامك بالحب… مش تحسسه إنك بتجيبله أدوات تعذيب في المستقبل

لغة الحب الرابعة: الأعمال الخدمية
Acts of Service
ـــــــــــــــــــــــــــــــــــــــــــــــــــــ
بعض الأزواج… مش بيحسوا إن زوجاتهم بيقدموا لهم الحب, إلا لما يروح البيت يلاقي البيت مترتب والأكل جاهز ومتحضر
كده بيحس إن زوجته فعلا بتقدم أجمل لغة حب
وبعض الزوجات, مش بيحسوا إن أزواجهم بيقدموا لهم الحب, إلا لما يساعدوا في صيانة البيت, ويرموا أكياس الزبالة (أيوة… ده أكتر مثال مستخدم في الكتاب بالمناسبة بجد مش هزار… الزوجات بيحسوا بالحب من أزواجهم لما يرموا أكياس الزبالة)

الأعمال الخدمية كتيرة جدا جدا… تصليح سباكة البيت, غسيل الأطباق… تحضير الأكل, المذاكرة مع الأطفال, دفع الإيجار و فواتير الكهرباء والتليفون والغاز … وغيره وغيره وغيره
كل زوج وزجة… المفروض يعرف إيه الأعمال الخدمية اللي الطرف التاني محتاجها, ويحاول إنه يجتهد في إنه يقدمها بطريقة كويسة وفيها تشجيع
ولما يكون أحد الزوجين, هي دي الطريقة اللي بيحس فيها بالحب من الطرف الآخر… لازم يفهم إنه يطلبها بطريقة الطلب المؤدب الرقيق… مش بصيغة الأمر والزهق والتملل والحسرة

لغة الحب الخامسة: الإتصال الجسدي:
Physical Touch
ــــــــــــــــــــــــــــــــــــــــــــــــــــــــ
– بعض الأزواج والزوجات, بيحسوا بالحب من أزواجهم لما يهمتوا إنهم يمسكوا إيد بعض ويكون في إتصال جسدي بينهم٬ يعني لو أحد الزوجين اللغة اللي بيحس فيها بالحب هي إن الطرف الآخر يمسك إيده وهما ماشيين مع بعض في الشارع٬ يبقى أكيد لو واحد سابق التاني ب ٤٠ متر وهما ماشيين مع بعض٬ هايخلي تانك الحب بتاع الطرف الآخر فاضي جدا

لازم نتعلم إزاي الطرف الآخر بيحس بالحب بالإتصال الجسدي, ونبدع في تعلم وتقديم لغة الحب للطرف الآخر

في نهاية الكتاب٬ الكاتب بيجاوب على مئات الأسئلة المتداولة بين الأزواج.

الخلاصة:
ــــــــــــــ
- قبل ما تتجوزوا حاولوا تعرفوا إيه هي لغة حب شريك حياتكم٬ وإذا حسيتم إنكم مش بتتكلموها أو مش ناويين تتعلموها٬ ماتكملوش

- لو أنتم فاكرين إنكم ممكن تعيشوا حياة زوجية سعيدة٬ من غير ما تستثمروا من وقتكم في قراءة كتب عن الزواج و تتعلموا إزاي تكونوا زوج و زوجة تسعدوا بعض وأسرتك… يبقى إعرفوا إن دا صعب جدا.

- لو إنت فاكرين إن حد من أصحابكم أو أهلكم هاينصحكم نصائح تصلح لك زواجكم… يبقى يصلحوا هما زواجهم الأول… لازم نصائح الزواج تاخدوها من إستشاري متخصص في الزواج… أو كتاب كاتبه متخصص في حلول مشاكل الزواج

- الحب هو أجمل إحساس بين الزوجين٬ مسؤوليتك كا زوج إنك تخلي زوجتك تحس بحبك ليها… ومسئوليتك كازوجة تخلي زوجك يحس بالحب…. ده مش تكرم من حد فيكم… لازم تتعلموا إزاي توصلوا الحب لبعض… علشان الحب ده يرجع لكم تاني

ما تنساش تاخد أنت و اللي بتحبه "الكويز" اللي في اللينك دا علشان تعرفوا إذا كنتم بتتكلموا نفس لغة الحب ولا لأ٬ وإيه هي أولوياتكم في إختيار شريك حياتكم

للتحـميل اضغط هنا

Share

Suggestions

Back to Top