"ازاي تسترجع موبايلك المسروق ببساطة"
كتبت: بسملة فؤاد
التكنولوجيا الحديثة وفرت امكانية وصولك لملفاتك وتطبيقاتك، من اي جهاز، عشان كده لازم تفعل خاصية النسخ الاحتياطي تلقائياً، عشان تكون الملفات والتطبيقات متاحه انك تدخل عليها على اكتر من موبايل، لو اتسرق موبايلك ممكن تعرف تستعيد بياناتك من اي موبايل.
عرض موقع "Comparitech"المتخصص في التقنيات الحديثة، ازاي بيتم حذف البيانات الشخصية في حالة ضياع الموبايل او سرقته.
*ازاي ترجع موبايلك المسروق*
عشان تعرف ترجع موبايلك المسروق عليك انك تفعّل خدمة تتبع الموبايل بمجرد انك بتدخل حسابك على الموبايل سواء بحساب آبل على موبايلات آيفون لو حساب جوجل على أنظمة الأندرويد، عشان يتم تتبعة.
عشان تتمكن من تفعيل الخاصية دي على نظام الاندرويد هتعمل الآتي:
بتدخل على إعدادات الموبايل
Privacy & Security بتختار
Find my device بتضغط على
بتتأكد إن الخاصية اتفعلت
عشان تتمكن من تفعيل الخاصية على نظام آبل هتعمل الآتي:
هتدخل على إعدادات الموبايل
بتدخل على Apple ID
هتختار Icloud
هتلاقي تحت Find my iphone اتأكد انها اتفعلت
*ازاي تغير كلمة السر لكل حساباتك*
بعد ما تكتشف وتتأكد من ضياع الموبايل الخطوه الاولى هتكون تغيير كلمة السر، في نفس الوقت عشان ميتمكنش السارق من البحث في حساباتك.
*ازاي تستخدم تطبيق تتبع الموبايل*
ادخل على حسابك من موبايل تاني وتتبع موبايلك، وهيظهر ليك موقع الموبايل على الخريطة.
لو الموبايل مقفول هيكون قدامك عدة اختيارات، الاول هتفعل وضع الضياع واللي هيظهر في رسالة برقم موبايلك يتم تحديده للتواصل مع صاحب الموبايل.
أو أنك تمسح كل البيانات والداتا على الموبايل، وبعدها الموبايل المسروق هيبقى بلا قيمة، أو الاختيار التالت انك تفعل صفارة التنبيه.
*ازاي توقف بطاقتك الائتمانية*
لو كنت بتستخدم موبايلك في شراء منتجات من بره، أو دخلت ارقام حساباتك في البنك و بطاقاتك، عليك الاتصال بالبنك وتوقيفها وتغير كلمة السر.
*إبلاغ السلطات*
في الخطوة دي بتعمل ابلاغ عن سرقة الموبايل او ضياعة، بشرط إن يكون معاك الفاتورة والعلبة وبيانات الموبايل.
في حالة إسترجاع الموبايل، الخطوة الأولى هتكون انك لازم تعمل "ضبط مصنع" عشان تبقى آمن من اي برامج تجسس ممكن انها اتضافت على الموبايل.
