ازاى التسويق كان سبب نجاح شركه نسكافية؟
كتبت/ سهيلة أشرف العمروسى
بناءً على المبدأ العظيم شوق ولا تدوق
شركة نسكافيه مش بس استولت على السوق، دى استولت على قلوبنا كمان.
نسكافية احتوتنا كلنا، احتوتك أيها الطالب الغلبان ونت مسحول ف المذاكرة، واحتوت الموظف وهو مضغوط ف شغله ومش عارف يلاحقها منين ولا منين، واحتوت الأم اللى سهرانه بتكوى هدوم عيالها.
كل دول النسكافيه بيطبطب عليهم، بيخليهم حاسين بالإنسجام ناحيته،
وهنا يجي أول قانون من قوانين التسويق:
" قانون الانسجام " ودا معناه ان الشركه بتخلى العملاء يحسوا بالإنسجام تجاه المنتج بتاعهم ويحبوه، بحيث انهم بعد كدا لو لقوا منتج أحسن منه وبسعر أقل يفضلوا متمسكين بنفس المنتج بردو، لأنه بيكون بيخدم احتياجاتهم وشركة نسكافية أفضل شركة قدرت تلعب على الحته دى وقدرت تلبى احتياجات جمهورها بمختلف فئاته.
عمرك فكرت إزاي منتج عالمي و قوي زي نسكافيه في إحتمالية ان ميزانية الإعلان بتاعته أقل في التكلفة بكتيير من إعلان مشروب الطاقة ستينج يا كينج و مع ذلك نسكافيه كان مبيعاتها اكتر بأضعاف مضعفة، لأن نسكافيه قدرت تأثر فينا وتربط مشروبها باحتياجاتنا اليومية اللى بقينا منقدرش نستغني عنه واحنا بنعملها، قدرت تربط وقت المذاكره بمج النسكافيه الرايق، وقدرت تربط بين تركيزك ونشاطك ف الشغل اللى بيبدا بأجمد مج نسكافيه الصبح.
ممكن تلاقى منتج جودته أفضل من جودة نسكافية، لكن انت حاسس بالإمتنان ليه وبالتالي هتتمسك بيه أكتر ودا اللى نجحت فيه شركة نسكافيه بعد مافهمت ان الماركيتنج مش عايز فلوس الماركيتنج عايز دماغ شغالة مش بتنام.
شركه نسكافيه قدرت تعمل حاجه جامده تنين وهي انها خدت العميل بتاعها في فسحه جميله خلال عمليه صناعه المنتج لانها عارفه ان العميل هو اكثر شخص موثوق عندهم والطريقه دي بتنتجلنا ال (UGP)
User generated product
اللى بتكون بأشكال كتير وكلها ملائمه للجمهور لانه هو اللي اقترحها اصلا.
١- صور وفيديوز.
٢- التوصيات ودراسة الحالة الشخصيه.
٣- التغريدات والمنشورات وتحديث الحالات.
٤- المقالات.
وكالعاده نسكافيه لازم تبهرنا كل شويه، نسكافيه كمان طبقت قاعدة ال (EGP)
Employee Generated Product
زي ما شاركت الجمهور في صناعه المنتج هي كمان خلت الموظفين بتوعها يشاركوا وهما بردو ي جماعه بصراحه أولَى من الغُرب ودا عمل تفاعل جميل من الحلو اللي بتدور عليه، مش التاني اللي بتشخلل جيبك عشان توصله.
"نسكافيه مش جامده تنين من فراغ بردو".
وعلى الرغم من ان الطرق دي كلها بتاخذ وقت الا ان وجود الجمهور والموظفين في عمليه صناعه المنتج بآرئهم واقتراحتهم اللى بتوصل الشركه في النهايه لثقه وتأييد من الجمهور وده معناه ان الموظفين بتوعك هيبدأوا يضبطولك المنتج من غير حتى ما تطلب، أظن مفيش احسن من كده.
نسكافيه من أكتر العلامات التجارية حباً بين المستهلكين بأنواعها الكتير اللى بتلائم كل الأذواق والمناسبات، من أول النسكافيه التقليدي "Classic "، لحد أحدث منتجات نسكافيه " Greenblend " اللى بتحتوي على نسبة أكبر من مضادات الأكسدة.
والطعم الجامد بتاع القهوه دليل على تاريخها الأجمد، نسكافية ليها تاريخ كبير وعظيم مليان بهدله وتشويق.
عزيزى محب النسكافيه، لو عاوز تعرف تاريخها تابع معانا المقال الجاى.
