الاكتئاب الموسمي
كتبت/ يارا فتحي
من كلمة اكتئاب موسمي تقدر تستنتج ان فيه موسم معين بييجي فيه الاكتئاب او بتبقي عرضه لأعراض الاكتئاب اكتر و ده اسمه " Seasonal Affective disorder " او " Winter blues " حزن الشتاء
بييجي بداية من شهر 9 وبيشتد طبعا في 11/12 و بيستمر معاك بقي لحد دخله الربيع
و بيعاني منه حوالي10% : 20% علي مستوي العالم و بالذات البلاد الشمالية الي فيها الشتا أطول و أقسى و كمان الستات اكتر عُرضه ليه
أعراضه : بتحس بخمول و كسل بتبقي غضبان دايما و عصبي و مبتقدرش تمارس نشاطاتك اليومية الي انت متعود عليها بنفس درجه الكفائه بتاعتك و بتنام كتييرر و بتدخل في حالة لا مبالاة كدة و بتاكل كتير و بالذات كربوهيدرات و كلامي للبناااتتت الي بتقعد تعيط بعد الشتا مبيخلص ع ال30 كيلو الي زادوهم ف تلت شهور بس
بتحس ان رجلك و ايديك حركتهم تقيله او بطيئة عكس عادتك و بتبقي عندك حساسية مفرطة تجاه كل حاجه لو مامتك مثلا نسيت و زودتلك معلقه سكر ف الشاي هتبدأ تحس انها مبتحبكش و مش مهتمة بيك و انك عبارة عن حزمة بقدونس ف العالم القاسي ده و بتبقي حزين جدا بدون أسباب مقنعه او بدون أسباب أساساً
أسبابه : تغير في هرمونات الجسم بسبب قله التعرض للشمس و ده بيخلي المخ يقلل من إفراز هرمونين السعادة" الدوبامين و السيرتونين " الي بيعدلوا مزاج سيادتك
و كمان لغبطة ساعتك البيلوجيه لان عدد سعات النوم بيبقي أطول
"ذاكرة الجسد" كلام في سرك يعني لو حصلك ذكري وحشة في دخله الشتا بتفتكرها طبعا في نفس الوقت من كل سنه و تفضل منغصه عليك عيشتك بقي سواء فقدان شخص او شئ او حصلك موقف مبتحبش تفتكره فالشتا بيحطك في نفس مود الحدث تاني
طب و العلاج ؟!
بص الدكاترة و العلماء أتوصلوا لحل كدة أنك تتعرض للضوء سواء لضوء الشمس بأنك تصحي بدري تلحقها او صناديق بتطلع اضائه عاليه او لمبات نيون الصفرة دي كأنك بتوهم عقلك بوجود الشمس و ييبقي من 20:30 دقيقة في اليوم عشان يفرز الهرمونات دي و ده اسمه " light therapy " و حابه ألفت نظركم للناس الي بتنام طول النهار و تصحي زي الفامبيرز طول الليل ان مزاجهم الصبح او أول ما بيصحوا بيبقوا مقريفين جدا بسبب قله التعرض للنور فياريت نستحملهم و ياريت هم يظبطوا مواعيد نومهم و ميقرفوناش معاهم
و في حالات تانيه الاكتئاب بيبقي شديد جدا لدرجة انهم مبيمارسوش حياتهم بشكل طبيعي خالص و ممكن يقعدوا ف البيت و ينعزلوا عن الناس و دول لازم يروحوا لدكتور نفسي يكتبلهم أدويه مضادات الاكتئاب او مثبتات مزاجية تعوضلهم الهرمونات الناقصة في جسمهم و ده بيبقي علاج اكلينكي " Medication therapy "
الوعي : من وجهة نظري كيارا ان الاستبصار بالمرض اهم خطوة في علاجه اذا مكانتش هي نفسها العلاج يعني انت خلاص عرفت ان مامتك منسيتش سكرك اد ايه و عرفت انه تأثير الشتا و الهرمونات و انها هتأثر عليك في كذا و كذا فخلاص بقي هتتعامل بناء علي كده مش هتدور علي اسباب مش منطقيه توهم نفسك بيها ان الدنيا جايه عليك او ان الناس مش حابينك او انك خلاص انطفيت و مكتئب و بقيت مريض نفسي
أيوة طب أعمل ايه بقي عشان استعيد نشاطي تاني و أخرج من المود ده ؟!!
تاني و تالت و رابع : " الرياااضة " يا جماعه و متقوليش اصل مفيش وقت او اشتراك الجيم غالي انت عندك مليون نوع م الرياضه ان شالله حتي تقف تجري ف مكانك زي الكرة الجلد أولا هتساعدك تنظم مواعيد نومك و يومك عموما و هتظبط هرمونات مزاجك و تنشط الدورة الدموية و بتحسسك بإنجاز و بتعلي قيمة نفسك في نظرك ، ايوه الرياضة بتعمل كل ده و الي عايز يعاركني يعاركني
أشرب ميا كتير و متسيبش نفسك عطشان أبدآ و متاكلش اكل سبايسي كتير " حراق " و ياريت يا جماعة الناس الي بتاكل كتير ف الشتا تمشي علي نظام غذائي أحسن عشان كدة هنخلص من اكتئاب الشتا و هندخل في اكتئاب " انا تخنت " و شكلي وحش و كله بيتريق عليا !!
و أخيراً و ليس أخرا ضاعف وقت الحجات اي بتحب تعملها و بتحسن مزاجك كل واحد عارف هو بيفرح و هو بيعمل ايه ، مثلا قعدتك مع أصحابك بتحسن مزاجك ، فيه ناس بتلاقي نفسها اكتر في الشغل أشتغل يا سيدي و طور من نفسك ، القراءة او هواية بتحبها رسم مثلا او كروشيه ، او الفرجة ع أفلام كوميدي ، كرتون سبونج بوب او غامبول ده شئ لا نستغني عنه
و الوقاية خير من العلاج: You should know that
سيدنا علي قال : تجنبوا هواء الخريف فإنه يفعل بكم ما يفعل بأوراق الشجر
انا عارفة ان الي بيحبوا الشتاء هيفضلوا ثابتين علي موقفهم
حتي لو انتحروا بسبب الاكتئاب الموسمي
و لو عايز تعمل اختبار الأكتئاب من هنا
