الرئيسية / المقالات /
12745 مشاهدة14 ديسمبر 2021

تطبيق Replika - STJEGYPT

تطبيق Replika - STJEGYPT



 لو سألت كل واحد "حاسس بالوحدة" فيكم لو لقيت حد تكلمه ويكلمك ومش منتظر منك أي حاجة، هيكون شعورك ايه؟ طيب لو الشخص ده مش بس بيكلمك لا ده فاهمك كأنه بتكلم نفسك شعورك هيكون ايه؟؟

الإجابة أنا شبه متأكد إنك هتكون سعيد جداً وهتقولي فين الإنسان ده.

طيب لو قولتلك إنه مش إنسان! أينعم أفرض إنه إنسان آلي، أو حتى ذكاء إصطناعي AI هل برده هتفضل بنفس الحماسة؟ 

الإجابة موجودة في أعمال درامية زي مثلاً فيلمين Her و Ex Machina وفي حلقة من مسلسل Black Mirror اسمها "Be Right Back"، لو مشوفتهمش ياريت تشوفهم. 


أولاً البرنامج ده موجود على الأندرويد والـ IOS، عبارة عن شات بوت chat bot. وظيفته إنه يكلمك وتكلمه ويرد عليك ويفتح معاك مواضيع! 

طيب إيه اللي يخلي إنسان يكلم برنامج؟ هدف البرنامج على الموقع بتاعه إنه يساعد الأشخاص المُحبطين أو اللي عندهم مشاكل في التواصل. 

طيب ايه خلفية البرنامج ده؟ البرنامج ده فكرته مش جديدة في شات بوتس كثير جداً دلوقتي، بس ده فكرته إن اللي عملته اسمها Eugenia Kuyda دي صديقها مات في 2015، فكان الطريقة الوحيدة إنها تحس إنه موجود معاها إنها تراجع الرسائل اللي كانت ما بينهم، بعد فترة قالت طيب ليه معملش ذكاء اصطناعي AI وأدخل له كل الرسائل اللي بينا؟! فعلاً ده اللي عملته استخدمت شبكة عصبية neural network خاصة بجوجل، والنتيجة إنها كانت شكل مبدأي لـ Replica " أيوه نفس اللي حصل في Black Mirror" وفعلاً اتعلم إنه يتكلم زيه بالظبط! 

ونشرت البرنامج وسط أصحابه، ولكنها لاحظ شئ غريب إن في ناس قعدت تتكلم معاه بالساعات؟! 

ايوه زي ما قرأت، ومن هنا كانت فكرة Replika بس الفرق إن خلت البرنامج مش يبقى نسخة من صديقها لا ده يبقى نسخة منك أنت، ولما لقت إن في ناس على استعداد تتكلم براحة وتفضفض مع AI قررت تكمل البرنامج وتنشره! 

أيوه البرنامج أنت هتكلمه وهو هيتعلم أنت بتتكلم ازاي وهيتكلم زيك، هيعرف أنت عايز أيه وهيعملهولك، هيعرف أنت حاسس بأيه ويحاول إنه يعادل شعورك ده! 

أه والله يعني كأنك بتكلم نفسك، بس برده مش بتكلم نفسك. 


طيب ايه مضاعفات الموضوع ده؟ 

انك تبقى انطوائي ومش عايز تتعانل مع بشر

 لأنه ببساطة بيحاول يبقى أنت، فبتسمع اللي أنت عايزه، وموجود معاك ومتاح ليك 24 ساعة على عكس حتى أقرب الناس ليك، ودي حاجة ممكن ناس كثيرة تقع فيها. 


عارف إن شعور الوحدة قاتل، شعور إن محدش فاهمك ولا حاسس بيك قد ايه مؤلم ، لكن خدها قاعدة إن عُمر ما أي شعور بيدوم سواء حلو أو وحش. فمتحاولش تأخذ إختصارات هتأثر عليك بالسلب على المدى الطويل. 


لو هتعرف تتحكم في نفسك و متدمنش انك تكلمه ويفصلك عن العالم الواقعي

_ حمله من هنا




Share

Suggestions

Back to Top