من فترة كان منتشر بوست بيتكلم عن مساعدة شركة مايكروسوفت لإنقاذ آبل من الإفلاس .. طبعا البوست كان لتوضيح أد إيه الأمريكان ناس كيوت و أحسن مننا في البيزنس و بيبصوا على المصلحة العامة .. ما يهمنيش ده دلوقتي لكن تعالى نشوف هل فعلا الكلام ده حقيقي ؟
← الحكاية بتبدأ بعد عودة ستيف جوبز لشركة آبل بعد طرده منها لسنوات .. كان وضع الشركة وقتها هو انخفاض في المبيعات 30 % ، و أصبح من وجهة نظر مجلس الإدارة إن عودة ستيف جوبز للشركة هي المخرج الوحيد من الورطة اللي هم فيها دي !!
فعلا رجع ستيف جوبز للشركة و بمجرد انتشار أخبار عن انخراط ستيف في العمل في آبل زاد سعر السهم من 13 $ عشان يوصل 20 دولار و دي نقطة .
← النقطة التانية و اللي حصل فيها اللبس عند الناس هي استثمار مايكروسوفت 150 مليون دولار في شركة آبل و لن تحصل في المقابل على أسهم !!
طيب إزاي الحكاية دي حصلت :
----------------------------------
خلينا نرجع بالزمن لورا شوية .. معروف إن مايكروسوفت سرقت أفكار واجهة ويندوز من آبل ، و كان بينهم قضايا و محاكم و خلافات ...
ستيف جوبز عرف إن وزارة العدل في عهد الرئيس كلينتون بتحضر قضية احتكار ضد مايكروسوفت .. فقام راح البرنس كلم المدعي العام ساعتها و شرب معاه القهوة و طلب منه ما يركزش على تعويض كبير تدفعه مايكروسوفت ، لكن يخلي الأمور تاخد وقت طويل و يخلي مايكروسوفت مشغولة أطول فترة ممكنة بالقضايا .
و قام رايح ستيف من ناحية تانية اتصل بـ بيل جيتس و قال له ، إحنا ممكن نفض القضايا دي و نعيش في هدوء ، و بدل ما نفضل نتخانق مايكروسوفت تضخ استثمار في شركة آبل و بل الخناقة نتشارك في الأرباح . ساعتها وافق بيل جيتس طبعا .
← النقطة الأخيرة :
----------------------
بعد انتهاء العرض التقديمي لستيف جوبز و اللي تم فيه الإعلان عن الشراكة ارتفع سعر سهم الشركة عشان يوصل لـ 26.21 دولار
و بالارتفاع ده بس تم إضافة 830 مليون دولار لرأس مال شركة آبل
