اليومين دول العالم كله بيتكلم عن Elon Musk بعد ما شركته Tesla Motors حققت مبيعات بقيمة ١٤ مليار دولار في أول اسبوع من عرض Tesla Model 3 وده يعتبر أكبر Product Launch في العالم كله، ونجحت شركته التانية SpaceX في أنها تخلي صاروح يوصل لمحطة الفضاء الدولية وبعد كده يرجع للأرض سليم بدل ما بينزل متدمر في المحيط ويبقى جاهز لرحلة تانية للفضاء في خلال اسبوعين مثلا، وبكده "إيلون" خلى استكشاف الفضاء أرخص بنسبة ٩٠ ٪ وناسا بجلالة قدرها بعتت له تهنئة بإنجازه الغير مسبوق والموضوع بقى Trend وبقى إيلون اسطورة العصر الحديث بلا منازع تقريبا.
إيلون قبل إنجازاته الأخيرة دي كانت ثروته تقدر بـ ١٣.٥ مليار دولار أمريكي، والنهارده لو دخلت على موقع فوربس هتلاقي ثروته ١٤.١ مليار.. الثروة الضخمة دي كلها Self Made مش وارثها ولا اشترى فرخة بتبيض بيضة دهب كل يوم ولا لقى كنز! ثروة إيلون كان أصلها فكرة بسيطة جدا اسمها zip2 بتوفر خدمات لجرايد أونلاين اتباعت الشركة سنة ١٩٩٩ لشركة اسمها Compaq بمبلغ ٣٠٧ مليون دولار نصيب إيلون منهم كان ٢٢ مليون دولار، استثمر منهم ١٠ مليون دولار في شركة اسمها X.com اتحولت بعد كده لـ Paypal وبكده بقى إيلون واحد من الـ Paypal Mafia وده المصطلح اللي اتشهرت بيه المجموعة اللي كانت شغالة على Paypal.
سنة ٢٠٠٢ اتباع Paypal لصالح eBay بمبلغ ١.٥ مليار دولار وكان بيع Paypal ده فاتحة خير على البشرية كلها.. Paypal Mafia كل واحد منهم أسس حاجة جديدة.. مثلا David O. Sacks أسس Geni.com و Yammer اللي اتباعت بعد شوية لميكروسوفت بـ ١.٣ مليار، و Dave McClure اسس 500 Startups اللي استثمروا في أكتر من ١٣٠٠ شركة ناشئة، و Roelof Botha بقى شريك في Sequoia Capital اللي بيعملوا استثمارات ضخمة في أكبر شركات التقنية في العالم ومجموع حصصهم من الشركات اللي مشاركين فيها أكتر من ١.٤ ترليون دولار، و Reid Hoffman أسس Linkedin و استثمر في Facebook.. وغيرهم كتير.
نصيب إيلون منهم كان ١٧٠ مليون دولار (الـ ١٠ مليون دولار رجعت ١٧٠ مليون دولار)، المفروض يقضيها ويعيش حياته سرمحة بدل ضغط الشغل اللي كان فيه على مدار سنين، دلوقتي هو مش محتاج يشتغل وعنده فلوس تكفيه هو وأجيال من نسله! يشتغل ليه بقى؟! ببساطة ايلون قرر يفضل يشتغل لسبب واحد بس: أنه يغير العالم.. وقتها كان كل اللي بيملكه ١٨٠ مليون دولار حط منهم ١٠ مليون دولار في "Solar City" شركته المتخصصة في الطاقة الشمسية، ١٠٠ مليون دولار في SpaceX، و ٧٠ مليون دولار في Tesla Motors.. والنتيجة أنه فعلا بيساهم في تغيير العالم وأحلامه بقت واقع انعكس على ثروته اللي بقت قيمتها أكتر من ١٤ مليار دولار.
لما قرر إيلون انشاء شركة خاصة بالفضاء من أهدافها تقليل تكاليف تكنولوجيا استكشاف الفضاء كل المستثمرين اللي عرض عليهم الفكرة رفضوا لأنهم شافوها غريبة جدا خصوصا مع أفكاره أن البشر ممكن يستعمروا المريخ! إيلون تجاهل نصائح كل الخبراء و استثمر فلوسه في الشركة (١٠٠ مليون دولار) وبيقول أنه بعد ما حط كل الفلوس اللي عنده في شركاته التلاتة بقى مضطر يستلف فلوس علشان يدفع الإيجار! SpaceX كانت أكتر فكرة مجنونة فكر فيها ايلون، وهي برضه أكتر فكرة دخلته التاريخ من أوسع أبوابه بالرغم من أن باقي أفكاره ومشاريعه لا يستهان بيها زي شركة البطاريات أو السيارات الكهربائية اللي من خلالهم بيعيد تشكيل مستقبل الطافة في العالم.
في مكان آخر من الكوكب، في العالم العربي مرة حضرت event كبير كان فيه واحد من الرياديين التقال اللي عملوا شركة بيتضرب بيها المثل في النجاح وباعها لشركة أوروبية بمبلغ قريب من نصيب إيلون في بيع بايبال وكان بيكلمنا عن أن الناس بتقول الكنز في الرحلة وده مش صحيح، الكنز في الثروة.. وأنت صحيح ممكن تشتغل علشان تستمتع لكن في الاخر اللي بيحكم هو الرقم اللي في حسابك في البنك! مع كامل احترامي لرأيه وشخصه وإدراكي وتقديري لأن كل إنسان له أهدافه في الحياة اللي ممكن تختلف عن غيره وطالما مشروعة مش من حق حد يلوم على حد بس ببساطة الفرق واضح ما بين اللي بيشتغلوا علشان متعة الرحلة واللي بيشتغلوا علشان الثروة.
إيلون يعتبر حاليا من أكتر الشخصيات تأثيرا في العالم وقصة نجاحه حقيقي ملهمة جدا، وكل ده علشان الكنز في الرحلة مش الثروة، إيلون موقع على حاجة اسمها تعهد العطاء بمعنى أنه لما يموت كل ثروته هتروح لأعمال خيرية.. إيلون هو التجسيد الحي لشخصية توني ستارك في فيلم Iron Man وهو بنفسه ظهر في مشهد في الجزء الثاني من الفيلم.. وأخيرا إيلون بعد ما أخد بكالوريوس في الاقتصاد وبكالوريوس تاني في الفيزياء من جامعة بنسلفانيا حصل على منحة دكتوراة في فيزياء الطاقة في جامعة ستانفورد وقرر يسيبها بعد يومين لأن دي مش أقصر طريق لتغيير العالم من وجهة نظره ودلوقتي بقى من الناس اللي بتغير شكل الطاقة في العالم.
إيلون بدأ وهو طفل لما برمج لعبة فيديو وباعها بـ ٥٠٠ دولار، ومع كل نجاح بيظهر له نجاح أكبر يبقى عاوز يوصل له، شركة تنجح وتكبر وتتباع بملايين ياخد نصيبة منها يعمل بيه اللي بعدها، وغالبا لو باع واحدة من شركاته التلاتة دلوقتي هيعمل حاجة أعظم ألف مرة.
If you want to grow a giant redwood, you need to make sure the seeds are ok, nurture the sapling, and work out what might potentially stop it from growing all the way along. Anything that breaks it at any point stops that growth.
Elon Musk
منقول من أ/ أحمد رجب
