الرئيسية / المقالات /
6154 مشاهدة27 ديسمبر 2016

اسطورة الثانوية العامة وعلاقتها الوهمية بتحديد ال Career !!! - STJEGYPT

اسطورة الثانوية العامة وعلاقتها الوهمية بتحديد ال Career !!! - STJEGYPT


اسطورة الثانوية العامة وعلاقتها الوهمية بتحديد ال Career !!! 
لو خلصت ثانوية عامة ولسة مقتنع ان مجموعك هو اللى وداك لمجالك الحالى وأثر بشكل كبير على ال Career بتاعك !!!! فا هتحتاج تقرا الكلام ده 

اما لو انت لسة فى ثاوية عامة فا المقال ده اصلا ليك

مفيش حد فينا الا ومر بكابوس الثانوية العامة وكان بيحلم بالمجموع الكبير اللى هيحدد فى النهاية مستقبله وحياته بشكل عام هتمشى ازاى وكل سنة فى شباب بتعيش نفس الحلم والطموح !!!

الحقيقة بقى ان الثانوية العامة مش هى اللى بتحدد مستقبلك المهنى او ال Career بتاعك  

4 اساطير عن الثانوية العامة:

1- مجموعك الكبير فى ثانوية عامة هو اللى هيعملك مستقبل كويس ويعكس تميزك فى الكلية بعد كده !!
2- انت اللى بتختار الكلية الانسب ليك واللى حاسس انك بتحبها مش مكتب التنسيق خالص !!
3- الكلية اللى هتخشها هى اللى هتشتغل فى تخصصها لما تتخرج ان شاء الله لانك متعرفش حاجة غيرها !!
4- لو فشلت فى ثانوية عامة او جبت مجموع وحش ده معناه ان مستقبلك ملوش ملامح!!

الثانوية العامة مش هى معيار النجاح فى المستقبل المهنى بدليل الاتى:

5 حقائق عن الواقع فى سوق العمل:

1- اكثر من %50 من الخريجين مبيشتغلوش فى مجال دراستهم,

2- عندنا اكثر من %30 من الكليات تخصصاتها ملهاش وظائف اصلا فى سوق العمل,

3- لا يزيد عن 10 وظائف بس فى مصر اللى عشان تشتغلهم لازم تكون خريج كلية معينة زى "المهندس - الدكتور - والمحاسب - المحامى - الخ " وبقية الوظائف كلها بتعتمد انك تكون فاهم فى الوظيفة وبتعرف تعملها "عندك مؤهلاتها يعنى"

4- المتوسط الطبيعى لعدد مرات تغيير ال Career او المجال بتاعك هى من 5 ل 7 مرات فى حياتك المهنية 

5- الشركات المحترمة مبتسألكش على شهاداتك او مجموعك فى الثانوية العامة وبتركز اكتر انت ايه مهارتك وبتعرف تعمل الشغلانة اللى انت مقدم عليها ولا لآ بغض النظر اتعلمت ده فين !!

6 خطوات هيخلوك تحقق اللى انت عايزه بغض النظر انت درست ايه او شهادتك ايه عن طريق الاتى:

1- حدد هدفك واجرى ورا اللى بتحبه:
متحددش مستقبلك على اساس مجموعك واعرف انت عايز ايه بالظبط وايه المجال اللى نفسك تشتغل فيه بعد كده وشايف انك بتحبه وشغوف بيه جدااا 

2- اعرف اكتر عن هدفك:
لازم تجمع معلومات اكتر عن المجال اللى نفسك تشتغل فيه وايه احتياجاته وازاى تبقى من المميزين فى المجال ده وايه اكتر حاجات لازم تتعلمها وتتقنها عشان تنجح فيه

3- جرب بنفسك:
متفوتش فرصة الا لما تطبق فيها كل حاجة اتعلمتها بشكل عملى ومتكتفيش بالقرائة والمذاكرة عن مجالك واشتغل بأيدك اكتر.

4- اشتغل على نفسك:
مهارتك ومؤهلاتك هى اللى هتحدد نجاحك او فشلك فى حياتك المهنية فا مضيعش وقت واشتغل على نفسك من دلوقتى واتعلم اساسيات سوق العمل زى "الانجليزى - الكمبيوتر - المهارات الشخصية"

5-العلم مش محتاج فلوس:
دى اكبر واهم مواقع تعليمية تقدر تتعلم عليها اى مجال وببلاش بس محتاج تتعب شوية:
www.udemy.com- www.slideshare.com www.Coursera.org
www.alison.com


6- اشتغل او اتطوع فى وقت فراغك:
لو جاتلك فرصة شغل او تطوع فى الاجازة حتى لو بسيطة مضيعهاش كل شغلانة هتشتغلها او فرصة تطوع هضيفلك حاجة وهتاخد منها خبرة هتفيدك لبقية حياتك كلها 
الخلاصة:
- مجموع الثانوية العامة مش هو نهاية الكون او معيار النجاح لمستقبلك.
- متجريش ورا الالقاب او الفلوس لانك لو بتحب اللى بتعمله الفلوس والشهرة هتيجى لحد عندك 
- اهتم بالعلم اكتر من الشهادة لان فهمك وشطارتك لاى حاجة هو الاثبات الحقيقى لمستواك مش شهادتك.

الثانوية العامة اسطورة احنا اللى كبرناها وعملنا منها وحش بنخوف بيه نفسنا والاجيال اللى جاية والحقيقة ان مستقبلك فى ايدك انت بتعبك ومجهودك مش بمجموعك بس 

اتمنى الكلام ده يقراه كل طالب قى ثانوية عامة او كل واحد شايف ان حياته وقفت عند مجموعه 

كتبه : محمد ياسر

Share

Suggestions

Back to Top