الرئيسية / المقالات /
7209 مشاهدة25 فبراير 2017

كيف يمكن ان نتحكم بالجاذبية فى الفضاء ؟ - STJEGYPT

كيف يمكن ان نتحكم بالجاذبية فى الفضاء ؟ - STJEGYPT


كيف يمكن ان نتحكم بالجاذبية فى الفضاء ؟

مش فاهم إيه اللي حصل هنا ؟!!
أول ما ركب المركبة الفضائية في الفيلم إياه .. بدأ طاقم الرحلة يتأثر بانعدام الجاذبية
فكان أول حاجة عملها البطل انه قالهم جاهزين عشان هبدأ الدوران ؟!!! 
وبعد ما مركبة الفضاء بدأت تدور حول محور ثابت .. بدأوا يثبتوا علي الارض ويحسوا بالجاذبية تاني !!!
وساعتها سألهم : كيف حال الجاذبية عندكم ؟؟ .. قالوله تمااام
- هو عمل إيه طيب عشان يحسوا بالجاذبية، مش فاهم ؟؟
= الاخ خلق جاذبية إصطناعية عن طريق دوران المركبة !!!
- ايوا ايه بقي اللي عمله  ؟؟
= هقولك بس ركز معايا عشان المعلومة دي لذيذة وهتبسطك 
أي جسم في الدنيا اما بيلف في مسار دائري بيأثر عليه قوة اسمها العجلة المركزية .. يعني قوة بتشده للمركز عشان يفضل يلف في المسار ميهربش .. تماام ؟؟

بس تلاحظ في حياتنا انك اما بتلف في مسار دائري كل ما السرعة تزيد كل ما تبعد اكتر عن مركز الدوران !!
يعني لو ماشي بعربية بسرعة كبيرة ولفيت في ملف رخم هتلاقي العربية بتحدف لبرا .. صح ؟؟
واما كنت بتركب مرجيحة الكراسي اللي متعلقة في سلاسل والمرجيحة تبدأ تلف بيك تلاقي الكرسي بتاعك بدأ يطلع لبرا كل ما السرعة تزيد .. صح ؟؟ .. ده ليه بقي ؟!!

- اقولك بقي دي خدناها في المدرسة .. بسبب قوة الطرد المركزية .. قالولنا اي جسم بيلف في مسار دائري بيأثر عليه قوة طرد مركزية ودي اللي بتخليه يبقي عايز يطلع برا المسار او تحدفه لبرا .
= منا كنت فاكر زيك بردو .. بس اما دخلت هندسة لاقيت دكتور الفيزيا بتاعنا بيقولنا
(( مفيش حاجة اسمها قوة طرد مركزية )) 

- نعم .. يعني كانو بيعلمونا غلط .. دنا اروح فيهم في داهية  .. امال إيه السبب ؟!!!

= السبب في قوة العجلة المركزية اللي قولتلك عليها فوق .. الفكرة ان العجلة المركزية اللي بتأثر علي أي جسم بيدور في مسار دائري بتبقي ثابتة مهما زادت السرعة
وقانون العجلة المركزية بيقول ايه ؟؟؟؟
((((( العجلة المكزية = مربع السرعة مقسوم علي نصف قطر المسار )))))
مع تجاهل الكتلة ... متنحش بس كده هتفهم
- مربع السرعة : المقصود بيها السرعة اللي هيدور بيها الجسم في المسار يعني السرعة اللي هتلف بيها المرجيجة واللي هتلف بيها العربية في الملف .. قشضه ؟؟
- ونصف قطر المسار : المقصود بيه نصف قطر المسار الدائري اللي هيدور فيه الجسم .. يعني بُعد الكرسي بتاع المرجيحة عن العمود اللي بيدور حواليه .. او بُعد العربية عن مركز الملف اللي بتدور فيه .. توماام ؟؟
.
واحنا قولنا ان العجلة المركزية دااايما ثابتة .. يبقي أما السرعة تزيد ايه اللي يحصل ؟؟
اللي هيحصل ان نصف القطر لااازم يزيد عشان تفضل العجلة ثابتة .
.
يعني ببساطة شديدة لو قولتلك ( 20 علي 5 = 4 ) .. ورقم 44 ده عايزه ثابت ميتغيرش
لو 20 دي بقت 100 ..... 100 أقسمها علي كام عشان تدينا بردو 4 ؟؟
حلو انت اللي قولت أهوو .. أقسمها علي 25
اذن رقم 5 زااااد وبقي 25 ... ده بالظبط اللي حصل فوق في القانون
السرعة اللي في البسط اما زاادت .. لازم نصف القطر اللي في المقام يزيد بردو وكذلك السرعة اما تقل نصف القطر يقل عشان تظل النسبة بينهم ثابتة يعني تظل العجلة المركزية ثابتة
.
فهو ده السبب اللي بيخلي العربية تحدف لبرا .. عشان عايزه تزود نصف القطر اللي بتدور فيه عشان العجلة المركزية تفضل ثابتة وتفضل العربية بتلف في المسار
وده السبب اللي بيخلي الكرسي بتاعك في المرجيحة يحدف لبرا عشان عايز يلف في نصف قطر أكبر عشان تفضل العجلة مأثرة عليه وجبراه انه يلف في المسار 
.
نرجع بقي للفيلم .. اما مركبة الفضاء ابتدت تدور بشكل رأسي وسرعتها تزداد ظهرت العجلة المركزية .. فـ اجسام رواد الفضاء بقت عايزة تبعد عشان تلف في نصف قطر أكبر .. بما انهم بيلفوا رأسيا معني كده انهم هيبعدوا لتحت .. يعني يقربوا من الارض .. طيب خلاص دول لزقوا في الارض هيبعدوا لفين تاني ؟  ... تماااام مهو ده اللي انا عايزه انهم يلزقوا في الارض كده انا خلقت جاذبية اصطناعية شدتهم للارض 
لو مش متخيلها هات جردل وحط فيه ميااة ومسكه وابدأ لفه رأسيا بسرعة كبيرة هتلاقي المياة في الجردل متدلقتش !! وده بسبب نفس القصة  جزئيات المياة أثرت عليها عجلة مركزية فخليتها عايزه تبعد عن المركز عشان تلف في نصف قطر اكبر وبالتالي اعدت تبعد لحد ما لزقت في قاع الجردل وبقت مشدودة ليه .. فمتدلقتش
.
وبالمناسبة دي فكرة عمل التجفيف في الغسالة الاتوتوماتيك .. الفريم بتاع الغسالة بيبقي فيه خروم كتير فـ الاسطوانة اما بتدور جوا الغسالة ، الهدووم بتبقي عايزه تخرج لبرا .. بس الهدوم حجمها كبير مش هتقدر تخرج فهتلز في الجدار.. يبقي مين اللي هيقدر يخرج ؟؟ أيواا المياة اللي في الهدوم هي اللي هتقدر تخرج من الخروم الصغيرة اللي ف الجدار وبالتالي انا طردت المياة وجففت الهدوم
والفكرة دي نفعت رواد الفضاء جداا وساعدتهم انهم يتلغلبوا علي انعدام الجاذبية


كتبه : أحمد عبد المنصف

Share

Suggestions

Back to Top