ممكن تقوم دلوقتي تدخل المطبخ ؟؟ .. اسمع مني بقي ماحنا قولنا هنبص في حياتنا
ولع عين البوتجاز .. و بعدين حاول تقرب ايدك من النار من الجنب .. يعني حاول تحوط علي الشعله بايديك من الجنب .. هتلاقي نفسك قادر تقرب ايدك اوي من النار من غير ما تحس بحرارتها .. واللي بيدخن هتلاقيه و هو بيولع السجاره قادر يحوط علي الولاعه بايده اوي من الجوانب و مش بيحس بحرارة النار أوي .
في حين انك لو حطيت ايدك علي النار من
فوق هتحس بالحراره من بعيد ... يعني لو قربت ايدك من النار من فوق مش هتقدر تقرب اوي زي ما كنت قادر تقرب ايدك من الجنب .. طب ليه ؟؟؟
قولتلي ليه
ببساطة لان الهوا اللي بيحيط بالنار من الجوانب بيسخن صح ؟؟ طب اما بيسخن بيروح فين ؟؟
بيطلع فوق ، اها انت مكانك مش هنا ، انت مكانك فووووق .. طب ليه ؟؟
لان في قاعدة في الفيزياء الحرارية او الديناميكة الحرارية مشهورة اوي بتقول
( الهواء الساخن كثافته قليلة فبيطلع لفوق و الهواء البارد كثافته كبيرة فبينزل لتحت )
و بالتالي كل اما الهوا اللي علي جانبي النار يسخن يطلع لفوق و بالتالي المنطقه اللي بتحيط بالنار من الجوانب حرارتها مش بتكون عالية فبنقدر نقرب ايدينا اوووي و نحوط علي النار او ع الكبريت عشان ميطفيش
وبما ان الحرارة كلها و الهواء الساخن بيطلع لفوق، عشان كده مش بنقدر نقرب ايدينا من النار من فوق
القاعدة دي بقي ليها تطبيقات كتير حوالينا بس احنا مش بناخد بالنا منها .. زي مثلا
ليه التكييف بيتحط في الشقق فوق ؟؟ لان الهوا البارد كثافته كبيرة فبينزل يسقع الأوضة لكن لو التكييف علي الارض هيسقع الجيران اللي تحتينا اها و الله
و كذلك الدفاية ليه بيُـفضل تكون ع الارض ؟؟ عشان الهوا السخن يطلعلنا فوق فيدفينا .. انما لو الدفاية فوق هتدفي الجيران اللي فوقينا ( عشان كده الناس اللي بتشغل التكييف في الشتا ع السخن بيلاقوه مبيعملش حاجه فيفتكروه بايظ .. لا ياحج هو شغال بس بيدفي اللي فوقيكوا
و كمان بيستخدموا القاعدة دي في المنطاد اللي بيطيروا بيه .. بيملوا المنطاد ده بالهواء السخن و بالتالي الهوا هيبقي عايز يروح فين ؟؟ يطلع فوووق فيروح رافع المنطاد لفوق بالناس اللي عليه و بعد ما تخلص رحلتك يبطل يسخن الهوا اللي جوا لحد ما الهوا في المنطاد يبدأ يبرد و بالتالي المنطاد يبدأ ينزل للارض
عشان كده متستغربش اما تلاقي الناس بترش مياه قدام المحلات في الايام الحر الناس دول مش مجانين .. لان الارض في الاجواء الحارة بتسخن طيب الحرارة اللي عندها هتوديها فين هتطلع علينا فاما نرش عليها مياه ساقعة بالنسبة لها هتقلل الصهد اللي طالع ده و ترطب الجو حبتين
بس و دي كانت أول حلقة من ليه و لسه اللي جاي أحلي باذن الله
كتبه : أحمد عبد المنصف
