لو حابب تجنن اخواتك الصغيرين بالعلم
عايزك تجيب كتابين تمام ؟ مش لازم يكونو كتب ضخمة زي اللي ف الصوره .. أي كتابين
ابدا دخلهم في بعض ، بحيث كل صفحة من كتاب يبقي فوقيها صفحه من الكتاب التاني
يعني هتفتح الكتابين و تحط غلاف كتاب فوق غلاف التاني و تبدا تنزل صفحة من واحد و فوقيها صفحة من التاني و هكذا .. لحد ما الكتابين يبقوا متداخلين تماما صفحة بصفحة بالشكل اللي انت شايفه كده
عايزك بقي تجيب
اخواتك و جيرانك واهل منطقتك و عيلتك كلها و تحاولوا تطلعوا الكتابين دول من بعض
اخرم مثلا طرف الكتاب ده و اربطه بحبل و الطرف التاني بحبل و اعملوا فريقين شد الحبل .. بردو الكتب مش هتتفك من بعض
لا ده مش بس كده .. دول جابوا عربيتين هاا عربيتين و ربطوا حبل في عربية والحبل التاني بعربية و العربيتين بدأوا يتحركوا عكس بعض باقصي عزم ليهم و بردو الكتب متفكتش !!
عارف اتفكت امتي ؟؟ اما جابوا ( دبابتين ) بدل العربيات اها و الله اتفكت بالدبابات حتي شوف بنفسك >>
و بما ان سلسلتنا اسمها ( ليه ) يبقي لازم هنسأل ... طيب ليه ؟؟؟؟
كلمة السر يا باشا تكمن في قوة الاحتكاك اللي بين الصفحات و بعض .. اما بتيجي تشد الكتاب لبرا صفحة الكتاب بتأثر علي الصفحة اللي فوقيها و اللي تحتيها بقوة احتكاك كبيرة جدااا، وكذلك صفحة الكتاب التاني هتأثر هي كمان بقوة احتكاك كبيرة جدا علي اللي فوقيها و تحتيها و الاحتكاك ده بيخلق قوة تماسك رهيبة بيبقي صعب جداااا انك تتغلب عليها ..
الاحتكاك ده موجود في كل حاجه في حياتنا .. و انت ماشي في الشارع لو مفيش احتكاك مش هتعرف تقف اديك دليل ؟؟ المتزحلقين علي الجليد بيقدروا يوقفوا نفسهم بنفسهم ؟؟ و لا بيبقي معاهم عصاية توقفهم ؟؟ ..... و ده بسبب ان الاحتكاك علي الجليد صغير جدااا ..
انت عارف انت بتتعب من المشي او الجري ليه ؟؟ لانك بتستنفد طاقة عشان تتغلب بيها علي الاحتكاك اللي بتأثر بيه الارض عليك .. عارف لو الارض سطح املس تمامًا مفيهاش أي احتكاك ؟ انت عمرك ما هتتعب من المشي، عارف لو اي حاجه بتمسكها مفيهاش احتكاك مش هتعرف تمسكها هتتزخلق من ايدك !
و الاحتكاك بردو هو اللي بيخلي العربية تستهلك بنزين اكتر و كل ما يزيد ، تستهلك اكتر و اكتر
و ده اللي كوكب اليابان الشقيق قدر يتغلب عليه، قالوا احنا عايزين نعمل قطر سريع جدااا، طب عشان نعمل القطر بالسرعه دي يبقي لازم نتغلب علي قوة الاحتكاك بينه و بين القطبان و لو عرفنا نلغيها خالص نلغيها، و ده اللي حصل فعلا ، قدروا يصنعوا قطار مش بيلمس القطبان اصلا بل بيتحرك من خلال مجالات كهرومغناطيسية بتعملها القطبان مع القطر ، و بالتالي قدروا يوصلوا لقطر سرعته 550 كيلو متر في الساعة يا مؤمن !! يعني يوديك اسكندرية و يجيبك ف ساعة ، يالا هما هيروحوا من ربنا فين
و ده بردو السبب اللي بيخلي الناس الكبيرة تشتكي من ركبتها و وجع المفاصل بسبب الاحتكاك ده ، ربنا سبحانه و تعالي برحمته خلقلنا عند المفاصل سوائل وانسجة كثيفة لينة بتتسمي بـ (الغضاريف) بين العضم عشان يفادي الاحتكاك ده ، و لما بيحصل تآكل للغضاريف دي بيبدأ الغضم يحتك ببعضه و ده السبب في الوجع الجامد اللي بيحسوا بيه ، ربنا يشفي كل مريض .
الاحتكاك ده له تأثير كبير جداا في حياتنا و له تطبيقات كتير جدااا بس احنا بردو مش بناخد بالنا منه ، لان العلم عندنا مبيخرجش برا حيز الكتب !
كتبه : أحمد عبد المنصف
