ساعتها كنت في اسكندرية .. اعد ع البحر عمال ابحلق فيه و سؤال واحد عمال يزن و يزن و يزن في دماغي و مش بيبطل
(( مش الميا ملهاش لون ؟؟ طب ليه البحر لونه ازرق
و ده كان نفس السؤال اللي سألته اما بصيت للسما
و اما بحثت لاقيت كتاب كامل بعنوان ( ما السر في زرقة البحر ؟ )
حملته و قراته كله عشان اعرف ... لحد ما عرفت الحمد لله
الزتونه كلها بقي طلعت في جزئيات المياه يا كبير .. يعني ايه ؟؟
جزئ المياه في ذرتين هيدروجين و ذره اكسجين صح؟ .. بسبب مدي بُعد الذرتين دول عن الذره دي او قربهم بيحصل ذبذبات في جزيئات المياه ..
الذبذبات او الاهتزازات دي بقي بيبقي ليها تردد معين ..
يجي ضوء الشمس الابيض ( اللي مكون من 77 الوان اللي هما الوان الطيف ) المفروض السما خدت منه جزء من الاطوال الموجيه بتاعه اللون الازرق و نشرته بالعرض فبقت زرقا .. بس لسه الضوء فيه اطوال موجيه للون الازرق .. الضوء ده هينزل علي مياه البحر .. حلو ؟
يحصل توافق بين تردد الذبذبات بتاعه جزيئات المياه اللي قولنا عليها مع تردد اللون الاحمر اللي في الضوء الساقط ، التوافق ده العلماء بيسموه ( رنين ) ...
اما بيحصل الرنين ده جزيئات المياه بتمتص طاقه اللون الاحمر اللي في
الضوء لان طاقه اللون الاحمر او تردده يعني قليل فيسهل امتصاصه .. تمام ؟
فيجي تردد اللون الازرق اعلي بكــــتير من الاحمر فـ تقوله شطبنا احنا اكتفينا و عندنا طاقه تكفينا .. طيب يعني اعمل ايه دلوقتي حرتك؟؟
لا الموضوع خرج من ايدي انت تطلع ع السطح ، فـ بتعكس الاطوال الموجيه بتاعه اللون الازرق ع السطح .. و ده بيخلينا نشوف البحر ازرق
سامعك يا اللي هتقول بس البحر بيبقي لونه اخضر قرب الشاطئ اقولك ده بسبب ان امواج البحر بتحدف علي الشاطئ عوالق بحريه زي ( الطحالب ) و دي بيبقي لونها اخضر و الطحالب دي بيبقي فيها صبغات بتخلي البحر قرب الشاطئ مخضر .. مش اكتر و لكن في الاصل ازرق
طيب بالليل بيبقي اسود ليه يا فكيك ؟؟
لا حضرتك مش بيبقي اسود ، هو سطح المياه بيبقي زي مرايه .. بيعكس لون السما السوده اللي فوقيه مش اكتر لان مفيش ضوء ساقط عليه .
عارف عارف هتقولي طيب ليه متقولش انه في النهار مرايه بردو بيعكس لون السما الزرقه اللي فوقيه
اقولك اصل الغواصين اما نزلوا تحت لاعماق كبيره لاقوا بردو لون المياه زرقه ف ده ملهوش علاقه بزرقه السما ..
بس يا سيدي بعد كده هعد ع الكورنيش و انا بالي مستريح
الجميل ان ربنا خلي المناظر الطبيعية اللي عنينا بتيجي عليها لوناهها ازرق .. لان اللون الازرق مريح للعينين و بيساعد علي الاسترخاء و الارتياح .. و ده السبب اللي خلي مارك يعمل الفيس ازرق .. لو كان عمله احمر كان اعصابك هتتوتر مع الوقت .. فعلا زي ما ربنا قال
( إن في خلق السماوات و الارض و اختلاف الليل و النهار لآيات لأولي الألباب )
كتبه : أحمد عبد المنصف
