الرئيسية / المقالات /
13377 مشاهدة25 فبراير 2017

الشمس ازاي مشتعله من ملايين السنين في الفضاء من غير اكسجين ؟ - STJEGYPT

الشمس ازاي مشتعله من ملايين السنين في الفضاء من غير اكسجين ؟ - STJEGYPT


طيب :D مبدئيا السؤال ده جالي من ولد في 6 ابتدائي .. تمام ؟
بيقول : احنا خدنا في المدرسه ان مينفعش حاجه تشتعل من غير اكسجين ، طيب الشمس ازاي مشتعله من ملايين السنين في الفضاء من غير اكسجين ؟ ايوا عارف ان فيها نسبة اكسجين بسيطه جدا لا تتعدي الـ 1% و ده مش كفايه انه يخليها تشتعل و تطلع الطاقه الحرارية الهائلة دي من ملايين السنين و حتي الان ؟ :D

فعلا يا جماعه من شروط احتراق اي شئ وجود اكسجين يعني لو في شقه بتولع و قدرت تمنع عنها الاكسجين هتطفي  و فعلا نسبة الاكسجين في الشمس لا تتعدي الـ 1% و دي ببدأ اول شراره بس ،
يعني و يكأنك بتزق عربيه عشان تدور ، الزق بتاعك مش هيمشيها علي طول انت يادوب هتديها زقه بس و بعدين المحرك يدور و يحركها  .. اهي نسبة الاكسجين البسيطه دي هي الزقه ، طيب فين المحرك بقي ؟؟

المحرك أو السبب الأساسي اللي مخلي الشمس مشتعله حتي الان من حوالي 4.6 مليار سنه ( و ده تقدير العلماء لـعُمر الشمس ) و لسه مستمره في اشتعالها هو
(( الاندماج النووي )) اللي بيحصل في الشمس يا كبير
نزل حواجبك بس و بلاش الاندهاش ده الله يرضي عليك بص يا سيدي
اهم معلومه عن مكونات الشمس و اللي أغلب الناس عارفاها انها بتتكون من غازين أساسيين :
الهيدروجين و الهيليوم ، و دول اللي بيشغلوا حوالي 98% من حجمها
حلو اوي ، إيه بقي اللي بيحصل جوا الشمس ؟
هيجي ذرتين هيدروجين ملو هدومهم كده كل ذرة منهم كتلتها و لتكن 2 جرام مثلا .. اوكيشن ؟؟؟
واحده هتقول للتانيه بصي بقي الاتحاد قوة و متنسيش الذئب يأكل من الغنم القاصية .. طب نعمل ايه ؟
احنا نتحد سوا و نبقي شخص واحد .. و نغير اسمنا ده زهقنا منه .. طيب نسمي نفسنا ايه
ايه رأيك في هيليوم ؟ اسم حلو و موضه الايام دي ... خلاص توكلنا علي الله
بس ثواني احنا كل واحد مننا كتلته 2 جرام و إحنا 22 .. كده اما نبقي شخص واحد هيبقي كتلته 4 جرام و هنتخن :
هنتخن يعني ؟؟ مانتخن ، المهم نبقي كده
المهم اما اندمجوا و بقوا شخص واحد ، أو ذرة واحده اسمها هيليوم لقينا كتلتها مطلعتش 4 جرام !!
دي طلعت أقل !!! لا انزلوا الصيدليه اوزونوها تاني .. مفيش فايده وزنها فعلا أقل حوالي 3 جرام
يادي النيله ؟؟ فرق الكتله ده راح فين  

هو انا مقولتلكش ؟؟ :مهو أصل اينشتاين قالك فرق الكتله ده بيتحول لطاقه في النظرية النسبية
- قول وربنا ؟؟ هي النسبيه دي ورايا ورايا !!
اها والله ، الراجل كتب علي السبوره عنده معادله بتقول (E=mc^2)
E = مقدر الطاقة .... m = الكتلة ...... C^2 = مربع سرعة الضوء
و قال ان فرق الكتله اللي بينشا نتيجه الاندماج ده بيتحول لطاقه هائلة و ده اسمه قانون تكافؤ الكتلة و الطاقة

- طاقة هائلة ايه ياعم بطل أفوره ده يادوب جرام مش هيفرق حتي لو اتحول لطاقه
لااا مهو دي التركااايه بقي يا برنس  متستقلش بالجرام ، و ده لييييه بقي ؟؟
عشان الجرام ده هيتضرب في مربع سرعه الضوء .. اقولك الطاقه اللي هتطلع قد ايه ؟ بس متحزش في نفسك
90 مليون مليون جول ، أو 21.5 ألف طن من ماده TNT المتفجره َ!!!
تخيل بقي ان كل ذرتين هيدروجين يتجمعوا و يطلعوا الطاقه الهائله دي و الاندماج شغال بقي مش بيقف :
و الهيدروجين كميته كبيره اوي في الشمس فلسه قدامه ملايين السنين عقبال ما يخلص و باقي الغازان اللي ف الشمس تخلص و عمر الشمس ينتهي ، فاطمن لسه قدامنا وقت كبير .
و ده السبب اللي مخليك متدفي و انت اعد دلوقتي ^^

* طبعا أرقام الكتل اللي كتبتها فوق دي مش صح خالص
كتله ذرتين الهيدروجين متجمعه = 6.693 * (10)^-27 كليوجرام
و كتلة ذرة هيليوم واحده = 6.645 * (10)^-27 كيلوغرام
و بالتالي فرق الكتله مش جرام طبعا ، الفرق هيساوي = 0.0488 *(10)^-27 كيلوجرام
بس محبتش اكتب الارقام دي في نص الكلام عشان مترفعش حاجبك تاني و تتنح
لكن الجرام الواحد بيطلع فعلا كمية الطاقة اللي ذكرتها .

كتبه : أحمد عبد المنصف

Share

Suggestions

Back to Top