الرئيسية / المقالات /
6252 مشاهدة25 فبراير 2017

لليه وانت بتقع من على السور بتفرد ايدك افقى زى الجناح ؟ - STJEGYPT

لليه وانت بتقع من على السور بتفرد ايدك افقى زى الجناح ؟ - STJEGYPT


من و انت صغير اما كنت بتحاول تمشي علي سور رفيع و تحس انك هتقع بتعمل ايه ؟؟؟
ايواا بتروح فارد دراعاتك جنبك تلقائيا زي اللي ف الصوره كده عشان توزن نفسك صح  ... مسالتش نفسك طب ليه ؟؟ ليه بتفرد دراعك ؟؟
ايه السبب اللي بيخلي دراعك يوازن جسمك ؟
هقولك يا سيدي ، و ركز معايا عشان دي معلومه هندسيه بس جميله جدا
دلوقتي يا سيدي ببساطه شديده ، اما بتحس انك هتقع ف احتماليه دورانك او وقوعك من علي السور ، علماء الفيزياء ادوها رمز ( ω ) اوميجا ، او Angular Velocity .. تمام كده ؟؟
يعني اما الاوميجا تزيد ، احتماليه دورانك او وقوعك من ع السور تزيد .. قشضه ؟
طيب بما انك هتقع اهو خلاص لازم يبقي في قوه تلحقك صح ؟ يعني لازم يبقي في مقاومه لوقوعك ده عشان توازن جسمك .. اهو مقاومه دوران جسمك ده يا برنس العلماء ادوها رمز ( I ) او moment of inertia
اخلص و مش عايز انجليزي كتير و هات م الاخر :3
حاضر  .. كل الموضوع ان الـ ( II ) دي ليها قانون مش لازم تعرفه.. كل اللي لازم تعرفه ان القانون ده بيتوقف علي ( عرض الجسم اللي ممكن يدور )
صلاه النبي احسن
ههههه احسسسن ، يابني اصبر طيب اخلص و ان شاء الله هتفهم صدقني
يعني من الاخر اما عرض الجسم اللي ممكن يدور ده يزيد >> الـ ( I ) او مقاومه دورانه هتزيد ... تماام كده ؟؟
تمااام يا برنس
في بقي قانون بيقول ان
" حاصل ضرب الاوميجا ( ω ) في المقاومه ( I ) بيساوي ثابت "
و بدام حاصل ضربهم ثابت يبقي في علاقه عكسيه بين الاتنين ... يعني لو المقاومه قلت احتماليه الدوران اللي هي الاوميجا هتزيد و العكس صحيح
شفاهم ايتوها حاجه
يعني م الاخر اما عرض الجسم يزيد مقاومته للدوران هتزيد في هيبقي صعب انه يقع ..
اهاااااا ... ايوا يعني عايز تقول ايه بردو
يعني اما بتكون ماشي علي السور و تحس انه هتقع فـ تفرد دراعك جنبك انت كده بتزود العرض ، و بالتالي بتزود الـ ( I ) يعني بتزود مقاومه جسمك للدوران او الوقوع يعني ، و بالتالي بتقلل احتماليه وقوعك او الـ ( ω ) و ده بيخليك تتزن اكتر
يا الله !!! ايه ده يعني الـ ...
ايوااا بظبط  يعني المهرج اللي بيبقي ماشي علي حبل و ماسك عصايه طويـــــلة من النص ده كده مش برنس ولا حاجه ده كده مرتاح و هو ماشي و لو زود طول العصايه هيرتاح اكتر ، لكن البرنس بجد هو اللي يمشي من غير ما يمسك اي حاجه ، عشان بعد كده اما تروح السرك متنبهرش اوي ، تبقي فاهم و مصحصح
تصدق العلم نور والله ! تعاشب شاي بقي

كتبه : أحمد عبد المنصف

Share

Suggestions

Back to Top