الرئيسية / المقالات /
38654 مشاهدة15 أبريل 2017

عناوين شركات بترول و كيماويات و غيرها للتقديم علي تدريب صيفي أو شغل - STJEGYPT

عناوين شركات بترول و كيماويات و غيرها للتقديم علي تدريب صيفي أو شغل - STJEGYPT


بمناسبة ان التقديم للتدريب الصيفى فى الشركات والهيئات بدأ من اول شهر 4 :
فنصيحة لو انت بتدرس كيميا او جيولوجيا او فيزيا او بيولوجى شوف البوست دة قبل ماتنزل وتلف ع الشركات وترجع تشتكى من (الواسطة )(فيتامين واو) وان الشركات عاوزة واسطة عشان تدخلها والكلام اللى كل مصر عارفاه ....

خلينا نبقي مقتنعين الواسطه موجودة و السعي برده من غير واسطه موجود و بينفع و عن تجارب كتير

1- شركة بتروجلف مصر (بترول ) ..
ودى موجودة فى المعادى ,, بتركب المترو وتنزل محطة ثكنات المعادى , وتركب سوزوكى رايح العرب وبتقوله ينزلك عندها ,,, وديه بتاخدك يا اما تنزلك فيلد ودة بيبقى فى خليج السويس يا اما تنزل اوفيس .. انت وحظك =D .

2- شركة شمال البحرية للبترول (نوربيتكو ) ..
ودى موجودة قدام كارفور المعادى , بتركب المترو وتنزل محطة الزهراء , وبتخرج تركب سوزوكى رايح كارفور المعادى , هاتلاقيها قدام كارفور على طول ,,
ودى بتاخدك اسبوع اوفيش (يعنى تدريب فى مقر الشركة ) واسبوع فيلد(بتروح الحقول فى الواحات , الصحرا الغربية ) .. يعنى بتقعد اسبوعين فيها وبتدلع . 

3- شركة الامل للبترول (امابيتكو ) ...
ودى موجودة فى القطعة التانية ,بلوك ج , شارع احمد حسن متفرع من ش مصطفى النحاس , الحى التاسع , مدينة نصر ,القاهرة , قريب من مدارس منارة هليوبوليس المتكاملة للغات ,,

4- شركة الدهانات والصناعات الكيماوية (باكين ) ...
ودى موجودة فى العبور , بتنزل المرج الجديدة وتركب عربية راحة العاشر , وبتنزل موقف العاشر وتسأل على عربيات راحة العبور وتقول السواق نزلنى عند بنزينة كالتكس , وانزل عندها واسأل ع الشركة ,, ودى بتاخد اى حد ,,,

5- شركة القاهرة الكبرى لمياه الشرب ...
ودى بتنزل محطة الشهداء (مترو ) وهاتلاقيها قدام مسجد الفتح, رمسيس , ودة المقر الرئيسى بياخد اثبات القيد بتاعك , وبعد كدة بيوزعك على اقرب شركة مياه لمنطقتك , وبتنزل تدريب فيها ..

6- شركة الحديد والصلب المصرية ..
ودى موجودة فى التبين ,حلوان .... ودى ممكن تنزلك فيلد بس لمنجم حديد ...
وابقى اسأل تروحها ازاى ...

7- شركة انابيب البترول ..
ودى موجودة فى القليوبية , مسطرد, شارع شركات البترول , بجوار شركة الخزف الصينى

8- شركة السكرى لمناجم الذهب ..
ودى فى اسكندرية , سيدى جابر , 3611 طريق الحرية , برج اية الغنيمى , الدور الحادى عشر,, ودى بتنزلك فيلد فى منجم السكرى ,, واللى بيقدم فيها ع طول طلبة علوم اسكندرية , يابختهم =D ,,

9- مصلحة الكيمياء ..
ودى موجودة فى 122 شارع رمسيس , وسط البلد , امام نقابة المحامين .

10- الهيئة القومية للاستشعار عن بعد وعلوم الفضاء (NARSS)..
ودى موجودة فى شارع جوزيف تيتو , النزهة الجديدة ,, تنزل المرج الجديدة , وتركب عربية راحة موقف العاشر , وتركب عربية من هناك راحة صلاح سالم , وتنزل عن الهيئة .

11-معهد بحوث البترول ..
ودة بتركب المترو الخط التالت , وبتنزل العباسية , وبتركب من ميدان العباسية عربية راحة اول عباس العقاد , وبتنزل وبتركب عربية تانية رايحة شركة انبى , هاتلاقى المعهد جنب انبى على طول , ودى بتاخد اى حد ع حسب العدد المتقدم

12- هيئة الطاقة الذرية ..
ودى جنب معهد بحوث البترول اللى قولناها فوق ,, بتركب من ميدان العباسية عربية راحة اول عباس العقاد وتركب عربية تانية رايحة انبى , هاتلاقيها جنب انبى ومعهد بحوث البترول .

13- الهيئة المصرية العامة للثروة المعدنية (المساحة الجيولوجية )..
ودى موجودة جنب ميدان العباسية ,, بتركب مترو الخط التالت , وتنزل محطة العباسية , وتركب من ميدان العباسية عربية راحة السيدة عائشة وتنزل عند مسجد الرحمن الرحيم
فى صلاح سالم ,,,

14- المركز القومى للبحوث ..
ودى بتركب مترو الخط التانى , وبتنزل محطة البحوث , وتسأل عليها , وبتمشى حتة صغيرة اوى .

15- المعهد القومى للبحوث الفلكية والجيوفيزيقية (مرصد حلوان )..
ودى فى حلوان ,, مش عارف فين بالظبط , بس ع جوجل مابس , شايف انها جنب محطة حلوان ,وكلية الهندسة جامعة حلوان ,, ع العموم ابقى اسأل قبل ماتروح .

كل اللى فوق دة حمادة واللى جاى حمادة تانى ,,, بمعنى الجزء تانى من البوست بصراحة عاوز واسطة, بس احنا مش هانقف ونتفرج ونعيط ونقول حرام , لأ احنا نسعى برضو , ونعمل اللى علينا , جايز تضرب .

طيب , ايه الجديد ,, بص ياعم ,,

فى شركة اسمها ايست زيت بيتروليام (زيتكو ) ..
دى بتركبلها المترو وتنزل محطة حدائق المعادى , وتركب تاكسى ب 55 جنيه , وبينزلك قدامها , بس وانت بتقدم بتملى استمارة , فى اخرها مكتوب reference (يعنى واسطتك ايه فى الشركة عشان تتدرب ) .. بص هاتعمل نفسك رايح الحمام وتروح رايح على اى مكتب وتحفظ اى اسم من ع الابواب , وترجع تكتب الاسم فى الورقة ,,
عشان تتقبل يااابرنس , ودى حصلت مع ناس واتدربو فى الشركة , او تحاول تعرف اى اسم داخل الشركة وانت رايحها ,و عشان تتقبل ,و عشان دى عاوزة وسايط .

قيس على كدة شركات ممكن تكون زى دى بتملى استمارة وف اخر الاستمارة مكتوب الواسطة , فهاتعمل زى ماقولتلك .....

طيب اروح فين تانى , اقولك بس دى ممكن تيجى معاك وممكن لأ ..
انزل محطة المعادى واركب عربية راحة الشارع اللى فيه شركات البترول ,, هاتلاقى (جابكو, قارون, رشيد,خالدة,الشركة العامة ,...) دول لازم واسطة , فأنت لف ولعل وعسى تلاقى واحد من جوا الشركة معدى , فيشوف الغلب اللى انت فيه وياخد ورقك , وتضرب معاك وتضرب معاك وتتدرب 

وبرضو انزل ثكنات المعادى , ولف فيها هاتلاقى (الفرعونية , ايوك , ...) وبرضو الشركات دى عاوزة واسطة ,, فأنت وحظك ياعم 

المهم تروح الشركات اللى ف اول البوست عشان دى مضمونة , وبعد كدة روح دول 

ونصيحة لطلبة الفرقة التانية وبذات بتوع الجيولوجيا قبل ماننهى البوست, هات تقدير كويس فى الكلية عشان الكلية بتبعت الاوائل واللى جايبين تقدير كويس للشركات العالمية والنضيفة وطبعا لما بتروح هناك بتاخد خبرة الانترفيو , ولو اتقبلت بتاخد خبرة التدريب هناك 

كل فرص التدريب الصيفي لعام 2017

Share

Suggestions

Back to Top