الرئيسية / الكورسات / 9051 مشاهدة07 ديسمبر 2016

عايز ادرس فيزياء من الأول خالص مع نفسي .. اعمل ايه ؟ - STJEGYPT


عايز ادرس فيزياء من الأول خالص مع نفسي .. اعمل ايه ؟ - STJEGYPT
انا اما فتحت الرسائل اكتشفت ان ناس كتير جداااا من كل التخصصات العلمية او الأدبية عندها شغف انها تدرس الفيزياء ومتأكدة ان الفيزياء ممتعة لكن هم اللي كرهونا فيها .. وهم اللي خلوا الطلبة تطلع من امتحانها وتنتحر او تنهار في العياط .. بس الفكرة مش عارفين يبدأوا منين ؟
.
وأنــا عادة مبحبش أفتي فاستشرت اتنين من الدكاترة اللي بحترمهم جدا قبل ما اكتب البوست ده
د. M El Banna : استاذ مساعد بقسم الفيزياء ، كلية الهندسة جامعة عين شمس
د. Ahmed Farag Ali : استاذ مساعد بقسم الفيزياء كلية العلوم جامعة بنهـــا
والاتنين أجمعوا علي ان أي حد مبتدئ في علم الفيزيــاء عليه وعلي كتاب ( Serway )
وسيرواي مرجع فيزياء شهير جداا اي حد في كلية علوم او هندسة لازم يكون سمع عنه ( احنا بندرس منه في الكلية ) .
انا قرأت كتير عن النسبية وشوفت تقريبا كل الأفلام الوثائقية اللي ليها علاقة بالنسبية وكنت مسمتمع ، بس يوم ما حضرت محاضرة لدكتور وشرحلنا معادلات النسبية وقدر يثبتلنا بالمعادلات والرياضة ازاي الزمن هيتمدد او هيتباطئ مع زيادة السرعة وبتاع ، حسيت اني مستمتعش في حياتي قد المتعة دي اقسم بالله ، خلصت المحاضرة وطلعت من الكلية الساعة 8 بالليل وانا في قمة سعادتي وكنت عايز ارقص ف الشارع :D
.
صدقوني متعة العلم ده فعلا انك تدخل وتغرق في مراجعه ومعادلاته مش بس تاخد قشوره ، ساعتها بس هتعرف طعم المتعة الحقيقة وكمان هتدرك عظمة الناس دي وعبقريتهم بجد .
.
فـ كل المطلوب انك تدرس الكتاب ده وتحل المسائل اللي فيه من الجلدة للجلدة وبكده انت هتبقي قادر انك تدخل إمتحان (GRE PHYSICS) وتجيب درجة عالية فيه كمان باذن الله ، وده امتحان له مراكز امتحانية في القاهرة واسكندرية ( معرفش فين بالظبط ) .. ولو جبت درجة حلوة في الامتحان ده هيبقي فرصك انك تتقبل في منح دراسة في جامعات عالمية في امريكا او كندا هتبقي عالية جدااا ، لو اللغة بتاعتك كويسة ومعاك TOEFL .
.
ده لينك الكتاب
بس طبعا المرجع بالانجلش :D .. وفي حاجات مش هتعرف تفهمها مع نفسك فـده هيخليك تبص علي اول صفحتين فيه وبعدين تركنه إلي أجل غير مسمي !!
.
دكتور حازم سكيك قام بترجمة جزء كبير من كتاب سيروي في موقع الفيزياء التعليمي

ده غير محاضرات جميلة مصورة في الفيزياء العامة والالكترونيات والفيزياء الحيوية وغيره
..
وفي حل بقي جميل انا بعمله ، ايه هو ؟
حضرتك هتفتح الكتاب ، وبعدين تفتح الفهرس بتاعه ، تمام ؟
الفهرس عبارة عن 6 أجزاء :
- الجزء الاول : ميكانيكا
- التاني : الذبذبات والموجات الميكانيكية
- التالت : الديناميكا الحرارية
- الرابع : الكهربية والمغناطيسية
- الخامس : الضوء والبصريات
- السادس : الفيزياء الحديثة ( النسبية وميكانيكا الكم .. الخ )
.
لازم تدرس الاجزاء دي بالترتيب ده عشان تبني الأساسيات عندك صح ، متتفزلكش وتدخل في النسبية وانت معندكش اساسيات الميكانيكا عشان متنحش :D
اول جزء ده هم أهم جزء في الكتاب وممتع وسهل جدا ولو خلصته في الاجازة يبقي انت عملت انجاز بجد :D
الجزء الأول هتلاقيه في الفهرس تحتيه 14 عنوان .. حضرتك خد كل عنوان واكتبه في جوجل ودور علي اي حد يكون شرحه وهتلاقي كتيــر .. دور في مواقع الكورسات زي كورسيرا او خان اكاديمي او edx ..
وعشان مبقاش حرمتك من حاجة .
.
د. البنا - الله يباركله - من أفضل الدكاترة اللي انا سعيد انه درسلي وحببني في الفيزياء بجد وخلاني اشوفها في حياتي وفي كل حاجة حواليا .. ومحاضراته شرح فيها اجزاء كتير جدا من سيرواي باسلوب بسيط جدا جدا وسهل واي حد عنده اساسيات رياضية بسيطة هيقدر يفهمها باذن الله
.
ده أول كورس فيزياء خدته في الكلية للدكتور ( 10 محاضرات بس ) كل محاضرة ساعة وشويه شوفوا كل يوم محاضرة هتستفيدوا جدا و هتستمتعوا جدااا جدااا
وده تاني كورس
.
وطبعا اللي مسمعش عن بروفيسور والتر لوين .. ولا شاف محاضرة ليه يبقي مشافش شرح فيزياء قبل كده حرفيا 
انا كنت كاتب بوست مخصوص عنه والبوست انتشر جدااا وحاطط فيه لينكات محاضراته المترجمة كمان تقدر تشوفها وهتفهمها بسهولة جدا ، وهو شارح في المحاضرات دي اجزاء كتير من سيراوي
المقال اهو 
.
ولو الانجلش عندك كويس إلي حد ما انصحك بالكتاب الرائع ده من سلسلة ( for dummies ) ودي سلسلة جميلة لتبسيط العلوم للمبتدئين ، سلسلة كنز بجد ونحمد ربنا انها موجودة ببلاش ع النت
كتاب الفيزياء  للمبتدئين  
وممكن تشوف محاضرات د مايكل يانج في جامعة SBCC شرح فيها المرجع ده بالكامل ،و بيشرح وهو فى غاية الحماس والحب للفيزيا. الراجل هيخليك تحب الفيزيا لانه بيشرح كل حاجة بالتفصيل والتمثيل والتجارب . متعة فعلا . المرجع كله بتاع 80 محاضرة كل محاضرة ساعتين فيه محاضرات بيحل فيها مسائل كتير من الكتاب ، المحاضرات هتلاقيها علي قناته دي
.
ودكتور احمد فرج كان كاتب مقال مخصوص للطلبة اللي نفسهم يدرسوا الفيزياء ورشح كتب تانية وكمان رشح كتب للناس اللي عايزة تتعمق في الفيزياء كمان وتعمل دراسات عليا فيه
اقراؤه هتستفادوا جداا
.
وانا هقول حاجة بس ناس هتضايق مني ، بصراحة منهج الفيزياء بتاع ثانوية عامة جميل جدا ( كمنهج ) مليش دعوة بالشرح او الامتحانات 
كمنهج هيديك نبذة او موجز مختصر لموضوعات كتير جداا من مرجع سيرواي ..
وفي واحد اسمه محمد عبد المعبود كان شارح كل فصول منهج الفيزياء ده علي اليوتيوب باسلوب سلس وبسيط جدا وسهل ويتفهم بسهولة وساعدني جدا اما كنت في ثانوية ، انصح اي حد ، اي حد ، يشوفها ، مش عشان تمتحنوا او تلموا درجات .. شوفوها عشان العلم اللي فيها بس :D
يُفضل تدرس منهج الثانوية بتاع الفيزياء قبل ما تبدأ في سيرواي عشان ترتاح قدام اكتر .
لينك المحاضرات
.
مسك الختام بقي هو 3 محاضرات رشحالهي دكتور الفيزياء وقال حرفيا عليهم ( يكفي انك تكون مش عارف يعني إيه فيزياء و لا حتي علم وتسمع الثلاث محاضرات دول لدكتور طارق عن قصة علم الفيزياء و هذه المحاضرات كفيلة انها تغير أساسا مفهومك للحياة و الطبيعة بشكل كبير لتتبني المنهج العلمي في كثير من أمورك )
، وانا بصراحة مهما شكرته مش هوفيله حقه ،
3 محاضرات روعة بصراحة وطلعت منها بكمية معلومات رهيبــة !!
وهي للبروفيسور طارق ابراهيم وهو بروفيسور فيي الفيزياء في مدينة زويل ألقاها في مؤتمر ( جائزة نوبل واكتشاف العلم من القديم إلي الحديث ) في مكتبة اسكندرية .

المحاضرات دي هياخدك فيها الدكتور من الأول خالص ، هيرجع بيك في الزمن وهتبدأ تطلع لقدام والافكار الفيزيائية عن الكون هتلاقي بتتطور قدامك مع كل دقيقة بتمر في المحاضرة ، وازاي كل عالم كان بيجي يحط التاتش بتاعه ع اللي قبليه وكانوا بيفكرواا ازاي وبيعملوا تجاربهم ازاي . من نيوتن مرورا بالعظيم جاليليو الي اينشتاين وغيرهم من العظماء دول .
هتحس انك خدت وجبة شهية ودسمة من العلم الرائع ده مع نهاية المحاضرات اللي مكنتش عايزها تخلص ^^ وهتشوف المنهج العلمي السليم في اسمي معانيه ، عشان تعرف تفرق بينه وبين العلم المزيف اللي انتشر اليومين دول .
استمتعوا 

العلم دلوقتي بقي في كل حتة مش مقتصر علي كلية او مدسة ، العلم قدامك فوق اهو اهووو يا ناااس ، كل المطلوب منك انك تبدأ :D
وفي النهاية مش لاقي انسب من الجملة الشهيرة اللي قالها د والتر لوين
( اولـئك الذين جعلوا من الفيزيـــاء شيـئــــًا مملا ، مجرمـــون )

كتابة : أحمد عبد المنصف

Share

Suggestions

Back to Top