1- مستحيل تقتنع بفكرة انك هتقضي عمرك كله في نفس المكان !!
2- على طول دماغك شغالة بتخطط لرحلتك اللي جاية
3- بتبقى مبسوط جدا وانت بتحجز تذاكر السفر .. وبتكون في قمة سعادتك وانت فعلا مسافر
4- في علاقة حب غير مفهومة بيننا وبين المطارات
5- الناس حوليك بتحوش علشان تستقر وتشتري موبيلات وهدوم وتتجوز .. وانت بتحوش كل فلوسك علشان تسافر
6- كل كلامك لازم يكون فيه ع الاقل جملة واحدة من بتوع "لما كنت مسافر ..."، في الحقيقة معظم قصصك بتكون ليها علاقة بذكريات السفر اصلا.
7- درج مكتبك فيه عملات غريبة .. وبتعرف كام كلمة من لغات مختلفة .. ودولابك مليان شوية لبس عجيب أشترتهم وأنت مسافر .. وعندك صحاب من مختلف دول العالم
8- لازم تلاقي نفسك بتجمع حاجة معينة من كل البلاد اللي سافرتها (تذاكر مترو، اعلام الدول، ميداليات مفاتيح، snowballs, او حتى مغناطيس للتلاجة
9- الTo Visit List بتاعتك مش بتخلص .. بالعكس دي كل فترة بتكبر اكتر واكتتتتتتر
10- من فترة للتانية بتفتح باسبورك وتقعد تتفرج على الأختام اللي عليه .. ولا كأنك بتتفرج على اجملها لوحة فنية (احنا مجانين والله انا عارف
11- اى طيارة بتشوفها بتتمنى تكون مسافر عليها .. اى صورة في مكان حلو، بتحلم تكون هناك .. اى مغامرة بتسمع عنها، بتتخيل نفسك بتعملها !!
12- حتى لو مش مسافر قريب .. هتلاقي نفسك من وقت للتاني بتفتح مواقع حجز الطيران وتقعد تقلب كدا ولا كأنك بتعمل شوبينج
13- وحتى لو مش بتحب الجغرافيا .. متنكرش اننا بنحب شكل الخرايط وبنفضل نشوف اسامي واماكن البلاد اللي منعرفهاش - يمكن نزودهم ع الليستة !!
14- اول ما نتضايق .. نجري على ألبومات صورنا وفيديوهاتنا في السفر .. بالنسبة لنا ده مخزون من السعادة والذكريات الحلوة وطاقة قادرة تخلينا نعدي الحزن ده
15- اكتر حاجة بتخليك متحمس هو اى حاجة ليها علاقة بالسفر .. علشان كدا يا جماعة اللي يحب يهادينا في اى مناسبة، يا ريت تذكرة سفر
كتبه : أدهم الهمشري