AD1
الرئيسية / المقالات /
8640 مشاهدة18 مايو 2018

العمل من المنزل | معلومات عليك معرفتها عن الـ Freelancing أو ما يعرف بالعمل الحر - STJEGYPT

العمل من المنزل | معلومات عليك معرفتها عن الـ Freelancing أو ما يعرف بالعمل الحر - STJEGYPT

العمل من المنزل | معلومات عليك معرفتها عن الـ Freelancing أو ما يعرف بالعمل الحر

تجربة | أيوب عبد الرحمن

المقال ده مكتوب للأشخاص اللي :-
1- عاوزة تشتغل كـFreelancers.
2- للناس اللي متعرفش نمط حياة الـFreelancers.
3- لكل Freelancer لسه بيبدأ مشواره.

النقاط اللي جاية دي مكتوبة من تجارب +1900 يوم شغل كـFreelancer منهم سنة Work From Home ONLY حرفيا.

آخيرا وقبل بدأ المقال : ليا فلسفة بتقول مفيش حاجة إسمها مميزات وعيوب مطلقة ، لأن نقطة ما ممكن أشوفها ميزة إنت تشوفها عيب ، لذلك النقاط الجاية هاتتكتب بدون تحيز لأفضلية نقطة أو سخط من نقطة تانية.

1- الفريلانسر حُر من مواعيد العمل الثابتة اليومية الروتينية إلي حد ما.

2- الفريلانسر لازم يـManage وقته بفاعلية أعلي من مواعيد العمل الثابتة اليومية ، لازم يحدد ميعاد محدد لصحيانه ولشغله ولأكله ولعيلته ، لأنه لو معملش كده هايتحول لآله حرفيا.

3- الفريلانسر لازم يخلق لنفسه بيئة عمل مناسبة ، وتكون بيئة من خياله بتحفزه للشغل ، بجانب إنه يخلق روتين خاص بيه ، لأنه لو معملش كده هايتدحرج علي الـComfort Zone أسرع من الصوت.

4- الفريلانسر مدير نفسه ، وده شئ عظيم جدا ، معناه إنك إنت اللي هاتحط لنفسك الـTasks والـDeadlines وإنك إنت اللي هتعدل علي شغلك وإنت اللي هتحمس نفسك وإنت اللي هاتوبخ نفسك ، ولازم وإنت بتعمل كل ده تطلع Quality عالية عشان مفيش حد يقولك نظبط معاك دي وتتعلم في اللي بعدها ، لو مطلعتش Quality بنسبة كبيرة مش هايكون فيّ بعدها.

5- الفريلانسر محتاج يعلم نفسه بإستمرار لأنه حرم نفسه من فرصة التعلم الجماعي اللي ممكن تحصل جوه بيئة شركة ، واللي مش هايعلم نفسه بإستمرار مش هايشتغل. بجد مش هيلاقي شغل.

6- الفريلانسر المبتدئ و الفريلانسر المحترف ، كل الفرق ما بينهم بعد خبراتهم ، إدارتهم لنفسهم وشغلهم والقواعد اللي بيحطوها عند أي تعاقد ، وأهم فرق بين الإتنين هو الإلتزام.

7- الفريلانسر عادتا ومع الوقت بتلاقي ظهوره إجتماعيا أقل ، وعادتا ده مش بيكون بمزاجه ، هو نفسه يكون إجتماعي بس الشغلانة تحكم ، زي ما هتلاقي النجار دايما إيده فيها رايش خشب كده ، المهنة تحكم.

8- الفريلانسر المتخصص أحسن من الشركة القائمة علي One Man Show. فكل ما تسعي في طريق التخصص لـMajor معين مطلوب في السوق وتزود مهاراتك فيه ، كل ما هاتكون Unique وكل ما هاتدي نفسك مساحة إنك تتعلم مهارات أعمق وTricks وحاجات من هذا القبيل.

9- الفريلانسر عنده إمكانية إنه يفصل يوم ، بس مش شرط يقدر يظبط الإمكانية دي مع نفس يومك ، راعي ظروفه :D

10- الفريلانسر مبياخدش مرتب ثابت ، ممكن في شهر يعمل $$$$ ويقعد 6 شهور بعدها بيعمل $ علي أعلي تقدير.

11- نتيجة للنقطة العاشرة ، الفريلانسر لازم يتعلم ويتقن مهارة الـExpense Management أو الـMoney Management.

12- الفريلانسر لازم يتخصص ، دي نقطة مُكررة عشان مهمة.

13- معظم الناس بره دواير شغلك مش هاتبقي فاهمة إنت بتعمل إيه ، فُكك وكمّل متزهقش.

14- في مواقع كتير ممكن تشتغل منها Freelancing زي مستقل - خمسات - Upwork ..آلخ ،المواقع دي مجال مساحته عظيمة وتقدر تبدأ منها شغل.

15- لكن أنا من أنصار إنك تشتغل Freelancer عن طريق إنك تشتغل علي الـPersonal Branding - وإنك تكون تفاعلي أونلاين وعلي الأرض ، 90% من الشغل اللي جالي كان عن طريق صفحتي وعن طريق إعلاني بأني بدور علي شغل وآخيرا عن طريق الـRecommendations. وده مش معناه إن المواقع اللي فوق ملهاش لزمة ، بالعكس ، إطلاقا ، أبدا.

16- في الإتفاقات المادية ، خليك صريح ومحدد وقلبك جامد طالما شغلك محترم ، ويا إما الدفع يبقي 50% يدفعهم العميل يستلم قصادهم نص الشغل في الميعاد المحدد ثم الـ50% الآخري ويستلم باقي الشغل ، وإما المبلغ كله مقدم. أي تساهلات تاني تعملها بعد ما تكون إتعاملت مع العميل ده فترة أكتر من 6 شهور مثلا ، وإتقابلتوا مرة أو أكتر ، وبرده التساهلات متكونش في القيمة السعرية قصاد شغلك ولكن في طرق السداد. مش كل العملاء شياطين ، لكن مش كلهم ملايكه.

17- ولو هاتمشي بالسيستيم اللي قولته في الدفع في النقطة اللي فاتت ، لازم تكون جودة شغلك عالية ، وسمعتك نضيفة وإحترافية ، سمعتك نضيفة يعني كلمتك واحدة ، شغلك لا غبار عليه ، كلام الناس في المجال عنك مش وحش ، حاطط لنفسك إجرائات تضمن حق العميل عليك ، لأن مفيش عميل هيوافق علي النقطة 16 لو مكانش واثق في سمعتك وجودة شغلك.

18- السوق عرض وطلب ، والشغلانة اللي مجاتلكش إنهارده ، هايجيلك غيرها بكره ، والعميل إللي إشتغلت معاه مرة وبس ، وارد يرجعلك تاني ، القصد ، خلي لسانك طيب في كلامك عن عُملائك ومنافسيك ، ده هايخلي اللي حواليك يحترموك ويقدروك حتي لو مفيش بينكم أي شغل.

19- مش معني إنه فريلانسر إن أسعاره عالية جدا ، مش معناها برده إنه بيشتغل ببلاش ، والفريلانسر الشاطر هو اللي يقدر يعمل Price List لخدماته تكون مساوية لقيمة الوقت والمجهود والتعلم اللي بيبذله ، ويكون Competitive للموجود في الـMarket اللي شغال فيه.

20- جزئية إنك تسعر شغلك هاتيجي مع الوقت والإحتكاك مع خبرات من نفس مجالك وقياس شغلهم مع مستوي شغلك ، بس لازم يكون ليك فئة سعرية ثابتة نسبيا.

21- الفريلانسر صديق وفيّ لكل المواقع التعليمية أمثال Udemy - Coursera Edraak ..الخ ، دول اللي هاتستمد منهم مهاراتك ومعلوماتك ، دول اللي هيأثروا مع الوقت علي جودة شغلك وبالتالي هايعلوا من فئتك السعرية ، مفيش فريلانسر مبيتعلمش.

22- الفريلانسر لازم يتعلم الصبر - طولة البال - الرد بأسلوب مهذب ودبلوماسي - ويتحمل فكرة إنه بيتعامل مع العملاء مباشرة وبالتالي هو لازم يكون Updated وفايق طول الوقت.

23- الفريلانسر (المحترم) لما بيكون مبيعرفش يعمل حاجة بيقول معرفش ، ولا بياخدها لغيره ينفذها ولا بيفتح دراعاته ويخبط فيها ، الجزئية دي مهمة جدا جدا ، وياما عملاء رشحتلي عملا تانيين عشان بس (الشخص ده لو في حاجة مش بيعرف يعملها هيصارحك ويوجدلك بدايل تختار منها) ، لا بيجود ولا بيفتي ولا كل هذا الكلام اللي يقطع عيشك مع التكرار.

24- إنت ممكن تشتغل Freelancer لأكتر من 200 نوعية شغل ، دور علي مواقع الشغل الفريلانسج وهتلاقي مسارات شغل كتير ممكن تشتغلها.

25- وآخيرا ، الفريلانسر لازم يتخصص ، والمصحف لازم يتخصص.

و علشان تبدأ بالتفصيل إبدأ من خلال الرابط -- من هنا

العمل الحر

Freelancing


Share

Suggestions

AD1

Back to Top